Read Toraja-Sa'dan KADIBILANGAN 19 Bible Online

KADIBILANGAN 19 - Toraja-Sa'dan bible

KADIBILANGAN 19

¹Ma’kadami tu PUANG lako Musa sola Harun, Nakua:

²Inde sia tu atoran sukaran aluk tu Napepasanan PUANG, kumua: Pokadanni to Israel, kumua la nabangko misa’ sapi birang mararang, tu tang tattan, sia tang dipapassannipa ayoka.

³La misorong lako to minaa Eleazar, anna baai tau lako salian to’ tenda sia la natunu dio tingayona.

⁴La naoton to minaa Eleazar tu rakka’na tama to’ rara sapi iato, anna pa’pi’pikanni pempitu tu rara iato umpempatui olona Tenda Kasitammuan.

⁵Namane untunu mampu’i tau tu sapi birang iato dio pentirona, anna mennau; la kuli’na, la duku’na sia rarana la natunu mampu’ tau sola tai lanna tambuk barinni’na.

⁶Sia la naala to minaa tu kayu arasi’, supa sia bannang karamisi, napembuanganni dao tangngana sapi birang tu nakande api.

⁷La nabusukki to minaa tu pakeanna sia la mendio’, namane tama to’ tenda, apa iatu to minaa la maruttak sae lako makaroen.

⁸Iatu to mangka untunu mampu’i, la umbusukki pakeanna sia la mendio’, apa la maruttak sae lako makaroen.

⁹Iatu aunna sapi birang iato la narampun misa’ to masero, napatorroi dio lu salian to’ tenda dio inan masero, kumua anna dinannan kasirampunan to Israel, la dipasirau uai ma’pamasero; iamoto tu napolalan la usseroi sala.

¹⁰Iatu to mangkamo urrampun aunna sapi birang iato la umbusukki pakeanna, apa la maruttak sae lako makaroen. Iamote tu dipoaluk dipondok matontongan lako to Israel sia lako to sae, tu misisolan.

¹¹Minda-minda ungkaka’ batang rabukna sala umbanna misa’ tau, la maruttak pitung allo.

¹²Iake allo ma’pentallun la napake tu uai ma’pamasero usseroi salana, anna allo ma’pempitu la maseromo. Apa iake allo ma’pentallun natae’ naseroi salana, tae’ na la masero ke allo ma’pempitu.

¹³Minda-minda tu ungkaka’ batang rabukna, sala umbanna misa’ to mate sia tae’ naseroi salana, iamo umpamaruttak KemaNa PUANG sia la disabu’i dio mai to Israel; belanna tae’ nadipi’pikki uai ma’pamasero, iamoto anna maruttak; iatu maruttakna dio siapa kalena.

¹⁴Inde sia tu atoranna sukaran aluk, kumua iake denni misa’ tau mate lan tenda: minda-minda tu tama tenda iato sia minda-minda tu torro lan, la maruttak pitung allo,

¹⁵susi duka tu mintu’ busso, tang dipori sampin pesambona, la maruttak.

¹⁶Minda-minda duka la ungkaka’ to mate nakande pa’dang dio lu padang, ba’tu batang rabukna tau, ba’tu bukunna misa’ tau, ba’tu panglamunan, la maruttak pitung allo.

¹⁷Iatu to maruttak iato la dialan dio mai tu aunna patuoan ditunu mampu’ la usseroi sala, sia la dibolloi uai kalimbuang tu au lan busso.

¹⁸Sia misa’ to masero la unnala supa, anna otonni tama to’ uai iato, napa’pi’pikanni tenda sia mintu’ pareanan dapo’ sia mintu’ tau lan tenda iato sia to ungkaka’ buku to mate, ba’tu to mate dipongko, ba’tu batang rabuk, ba’tu panglamunan.

¹⁹Iake allo ma’pentallun sia iake allo ma’pempitu la napi’pikki to masero tu to maruttak, sia iake allo ma’pempitu la naseroi tu salana: anna busukki tu pakeanna sia mendio’, sia la masero ke makaroenni.

²⁰Apa iake maruttakmi tu misa’ tau sia tae’ napopeseroi tu salana, la disabu’i lan mai kombongan, belanna umpamaruttak inan maindanNa PUANG: tae’ nadipi’pikki uai ma’pamasero, iamoto namaruttak.

²¹La dadimo lako tau iato mai misa’ aluk dipondok matontongan. Minda-minda umpa’pi’pikanni tu uai masero, la umbusukki pakeanna sia minda-minda ungkaka’i tu uai ma’pamasero, la maruttak sae lako makaroen.

²²Mintu’ tu apa nakaka’ to maruttak, la maruttak sia minda-minda ungkaka’i, la maruttak sae lako makaroen.