Read Toraja-Sa'dan KADIBILANGAN 2 Bible Online

KADIBILANGAN 2 - Toraja-Sa'dan bible

KADIBILANGAN 2

¹Ma’kadami tu PUANG lako Musa sola Harun Nakua:

²Iatu mintu’ to Israel la pantan umpabendan tendana dio to’ banderana situru’ tu mai bate-bate rapunna; la ma’tenda tu tau iato tiku lao sikambela tu Tenda Kasitammuan.

³Dio rampe matallona, tu dio kabu’tuan allo, la nanii bendan banderana dio to’ tendana to Yehuda, situru’ tuntunanna. Iatu arung bati’na Yehuda disanga Nahason, anakna Aminadab.

⁴Iatu tuntunan surodadunna, tu mangka diia’, den pitungpulo nna’pa’ sa’bu nnannanratu’na.

⁵Dio sa’dena la nanii ma’tenda tu suku Isakhar. Iatu arung bati’na Isakhar disanga Netaneel, anakna Zuar.

⁶Iatu tuntunan surodadunna, tu mangka diia’, den limangpulo nna’pa sa’bu nna’pa’ratu’.

⁷Sia iatu suku Zebulon: iamotu arung bati’na Zebulon disanga Eliab, anakna Helon.

⁸Iatu tuntunan surodadunna, tu mangka diia’, den limangpulo mpitu sa’bu nna’pa’ratu’.

⁹Iatu mintu’ mangkanna diia’ dio to’ tendana to Yehuda den saratu’ karuapulona nnannan sa’bu nna’pa’ratu’ situru’ tuntunanna. Tau iato mai la ke’de’ dolo.

¹⁰Iatu bandera dio to’ tendana Ruben la dio rampe lo’na lu situru’ tuntunanna. Iatu arung bati’na Ruben disanga Elizur, anakna Syedeur.

¹¹Sia iatu tuntunan surodadunna, tu mangka diia’, den patangpulo nnannan sa’bu llimaratu’.

¹²Dio sa’dena la nanii ma’tenda tu suku Simeon. Iatu arung bati’na Simeon disanga Selumiel, anakna Zurisyadai.

¹³Sia iatu tuntunan surodadunna, tu mangka diia’, den limangpulo ngkasera sa’bu ntalluratu’.

¹⁴Sia iatu suku Gad; iamotu arung bati’na Gad disanga Elyasaf, anakna Rehuel.

¹⁵Sia iatu tuntunan surodadunna, tu mangka diia’, den patangpulo llima sa’bu nnannanratu’ llimangpulo.

¹⁶Iatu mintu’ mangkanna diia’ dio to’ tendana to Ruben, den saratu’ limangpulo mmisa sa’bu nna’pa’ratu’ limangpulo situru’ tuntunanna. Tau iato mai la ma’penduan ke’de’.

¹⁷Iatu Tenda Kasitammuan, tu natikui to’ tendana to Lewi, la dipake’de’ male dio tangngana to’ tenda iato; susitu to umpabendan tendana, la susi dukato ke’de’ male, pantan dio to’ inanna unturu’ banderana.

¹⁸Iatu bandera dio to’ tendana Efraim situru’ tuntunanna la dio rampe matampu’. Iatu arung bati’na Efraim disanga Elisama; anakna Amihud.

¹⁹Sia iatu tuntunan surodadunna, tu mangka diia’, den patangpulo sa’bu llimaratu’.

²⁰Dio sa’dena nanii tu suku Manasye. Iatu arung bati’na Manasye disanga Gamaliel, anakna Pedazur.

²¹Sia iatu tuntunan surodadunna, tu mangka diia’, den tallungpulo nduang sa’bu nduaratu’.

²²Sia iatu suku Benyamin; iatu arung bati’na Benyamin disanga Abidan, anakna Gideoni.

²³Sia iatu tuntunan surodadunna, tu mangka diia’ den tallungpulo llima sa’bu nna’pa’ratu’.

²⁴Iatu mintu’ mangkanna diia’ dio to’ tendana to Efraim, den saratu’ karua sa’bu ssaratu’ situru’ tuntunanna. Tau iato mai la ma’pentallun ke’de’ male.

²⁵Iatu bandera dio to’ tendana Dan la dio rampe daanna lu situru’ tuntunanna. Iatu arung bati’na Dan disanga Ahiezer, anakna Amisyadai.

²⁶Sia iatu tuntunan surodadunna, tu mangka diia’ den annanpulona ndua sa’bu mpituratu’.

²⁷Dio sa’dena nanii ma’tenda suku Asyer. Iatu arung bati’na Asyer disanga Pagiel, anakna Okhran.

²⁸Sia iatu tuntunan surodadunna, tu mangka diia’ den patangpulo mmisa sa’bu llimaratu’.

²⁹Sia iatu suku Naftali. Iatu arung bati’na Naftali disanga Ahira, anakna Enan.

³⁰Sia iatu tuntunan surodadunna, tu mangka diia’ den limangpulo ntallu sa’bu nna’pa’ratu’.

³¹Iatu mintu’ mangkanna diia’ dio to’ tendana to Dan, den saratu’ llimangpulo mpitu sa’bu nnannanratu’. Tau iato mai la ma’katampakanna ke’de’ male situru’ banderana.

³²Iamote tu mintu’ to diia’ dio mai to Israel unturu’ rapunna; iatu mintu’ mangkanna diia’ dio to’ tenda situru’ tuntunanna, den annan ratu’ ntallu sa’bu limaratu’ limangpulo.

³³Apa iatu to Lewi tae’ nadipasiia’ to Israel, susitu mangka Napepasanan PUANG lako Musa.

³⁴Napogau’mi to Israel susito; susi tongan tu mangka Napepasanan PUANG lako Musa, naturu’mo, iamotu umpabendan tendana unturu’ banderana, sia pantan ke’de’mo male situru’ pa’rapuanna, dio lu rapunna.