Read Toraja-Sa'dan KADIBILANGAN 22 Bible Online

KADIBILANGAN 22 - Toraja-Sa'dan bible

KADIBILANGAN 22

¹Attu iato ke’de’mi tu to Israel, anna ma’tenda dio padang Moab, sambalinna lu salu Yordan, sipatu Yerikho.

²Iatonna tiromi Balak, anakna muane Zipor, tu mintu’ apa napogau’ to Israel lako to Amori,

³tiramban tonganmi tu Moab diona bangsa iato, belanna buda tongan, sia mataku’ tu Moab napobua’ to Israel.

⁴Ma’kadami tu Moab lako pekaamberanna Midian, nakua: Totemo iatu to buda iato la ungkande pu’pu’ mintu’ tondokta, susito misa’ sapi ungkande pu’pu’ riu dio padang. Iatonna attu iato iatu Balak, anakna Zipor, undatui Moab.

⁵Nasuami tu sumbungan puduk lako Bileam, anakna Beor, lako Petor, tu dio biring salu, lu lako tondok sangbangsana la untambai nakua: Inde sia tu misa’ bangsa tassu’ dio mai Mesir manassa tongan ussitutu’i mintu’ tondok lao, anna ma’tenda ussitingoanna’.

⁶Iamoto maimokomi, ammi tampakanna’ ropu te bangsa iate, belanna mandu matoto’ na aku; dennoupa’ angku taloi sia urrambai lan mai tondok iate. Belanna kuissan kumua: minda-minda tu mipassakke, masakke-sakke tu tau iato sia minda-minda mitampakki ropu, maropu tu tau iato.

⁷Pakalan malemi tu pekaamberanna Moab sia Midian umbaa saro disaroan to pakita-kita; iatonna rampomo lako Bileam, naparampomi tu kadanna Balak lako.

⁸Ma’kadami tu Bileam lako tau iato mai nakua: Ma’bongikomi indete bongi iate, angku pebaliikomi susitu la Napokadanna’ PUANG. Torromi tu arungna Moab sola Bileam.

⁹Saemi tu Puang Matua lako Bileam Nama’kada, Nakua: Mindara te mai muane musolan?

¹⁰Mebalimi tu Bileam lako Puang Matua, nakua: Balak, anakna Zipor, datu Moab, umparampo kada lako kaleku nakua:

¹¹Manassa den misa’ bangsa tassu’ lan mai Mesir ussitutu’imo mintu’ tondok lao; iamoto maimokomi, ammi tampakanna’ ropu; dennoupa’ angku bela siai urrarii sia la kurambai.

¹²Ma’kadami tu Puang Matua lako Bileam, Nakua: Da’ mumale sola tau iato, da mutampakki ropu tu bangsa iato, belanna to dipamasakke tu tau iato.

¹³Millikmi tu Bileam tonna melambi’, anna ma’kada lako arungna Balak, nakua: Sulemokomi lako tondokmi, belanna tae’ Napasiolai PUANG, ke maleki’ sola.

¹⁴Malemi tu mintu’ arungna Moab, rampo lako Balak, nama’kada nakua: Iatu Bileam tae’ napasiolai, ke saekan sola.

¹⁵Apa iatu Balak ussua pole’ arung, mandu buda sia mala’bi’ na iatu dolona.

¹⁶Iatonna rampomo lako Bileam ma’kadami nakua: Susite tu kadanna Balak, anakna Zipor, nakua: Da’ mididampa sae umpellambi’ina’,

¹⁷belanna la kusaroi la’da’komi; mintu’ apa tu mipokada, la kupogau’; maimokomi sia tampakanna’ ropu te bangsa iate.

¹⁸Mebalimi tu Bileam sia ma’kada lako to mase’ponna Balak nakua: Moi nabenna’ Balak ponno banuanna tu salaka sia bulaan, tae’ duka kuma’din ullendai parentaNa PUANG, Kapenombangku, la umpogau’ misa’ apa bitti’ ba’tu misa’ apa kapua.

¹⁹Iamoto torro dukakomi indete bongi iate, angku issanni, ba’tu apa la Napokada pole’ PUANG lako kaleku.

²⁰Rampomi tu Puang Matua lako Bileam to bongi iato, anNa ma’kada lako kalena, Nakua: Belanna saemo te mai muane untambaiko, millikmoko, ammu male sola, apa ia manna tu kada la Kupokadangko, tu la maturu’.

²¹Millikmi tu Bileam tonna melambi’, nalapikki tu keledai birangna, anna male sola arungna Moab.

²²Apa iatu kasengkeanNa Puang Matua dukkumo, tonna male tu Bileam, na iatu Malaeka’Na PUANG bendanmo dio lalan la unneai; iatu Bileam messake dao keledai birangna, nada’dua taunna nasolan.

²³Iatonna tiromi keledai birang tu Malaeka’Na PUANG dio lalan sitangke pa’dang tinonok, sumepangmi dio mai lalan lako to’ pa’lak; nabambami Bileam tu keledai birang la napasule lako lalan naolai.

²⁴Mangkato bendanomi tu Malaeka’Na PUANG dio lalan mabo’bok dio alla’na pa’lak anggoro’, tu nanii tembo’ patomali.

²⁵Iatonna tiromi keledai birang tu Malaeka’Na PUANG, umpasi’pinmi kalena lako tembo’, anna tirimpi’ tu lette’na Bileam tama tembo’; nabamba pole’omi tu keledainna.

²⁶Dolo pole’omi tu Malaeka’Na PUANG anna bendan dio to’ lalan si’pi’, tu tae’mo inan nanii sumepang kanan ba’tu kairi.

²⁷Iatonna tiromi keledai birang tu Malaeka’Na PUANG, unno’pakmi diongna lu Bileam. Re’dekmi tu ara’na Bileam nabambai tekken tu keledai birang iato.

²⁸Nabungka’mi PUANG tu sadangna keledai birang iato, anna ma’kada lako Bileam nakua: Apamora tu kupogau’ lako kalemi ammi bambana’ totemo pentallun?

²⁹Ma’kadami tu Bileam lako keledai birang iato nakua: Belanna mupopaningoanna’; kengku toe pa’dang, manassa kupateiko.

³⁰Apa ma’kada tu keledai birang iato lako Bileam nakua: Tae’raka angku keledai birangmi, tu miposakean tempon tuomi sae lako allo iate? Denmoraka kuma’gau’ susito lako kalemi? Mebalimi Bileam nakua: Tae’.

³¹Attu iato Napamillikki PUANG tu matanna Bileam; natiromi tu Malaeka’Na PUANG sitangke pa’dang tinonok bendan dio lalan, anna malinguntu’ lumbang sae rokko padang.

³²Ma’kadami tu Malaeka’Na PUANG lako, nakua: Ma’apai mubambai totemo tu keledai birangmu pentallun? Manassa tassu’Na’ la unneako, belanna iate lalan iate mebaa lako kasanggangan dio oloKu.

³³Iatonna tiroNa’ tu keledai birang, pentallun ussepangiNa’; ianna tae’ nasepangiNa’, manassako Kupatei, apa iatu keledai birang iato la Kupatuo.

³⁴Ma’kadami tu Bileam lako Malaeka’Na PUANG, nakua: Kasalammo’, belanna tae’ kutandai, kumua Kamu tu bendan dio lalan unneana’, na totemo, iake kadakei dio pentiroMi, melo ke sulemo’.

³⁵Apa ma’kada tu Malaeka’Na PUANG lako Bileam, Nakua: Maleko sola te muane iate, apa ia manna tu kada, la Kupokadangko, la mupokada. Malemi tu Bileam sola tu mai arungna Balak.

³⁶Iatonna rangimi Balak, kumua la saemo tu Bileam, malemi umpessitammui sae lako kotana Moab, lan lili’na Arnon, dio tampak passaparanna lili’na.

³⁷Ma’kadami tu Balak lako Bileam nakua: Tae’raka angku tonganni umpesuangkomi? Ma’apai natae’ misae lako kaleku? Misangaraka tae’ kubelai ussaroikomi?

³⁸Apa mebali tu Bileam lako Balak nakua: Manassa, saemo’ lako kalemi totemo. Ma’dinra’ka la umpokada misa’ kada? Iatu kada la Napatama Puang Matua pudukku, iamo la kupokada.

³⁹Malemi tu Bileam sola Balak, anna rampo lako Kiryat-Huzot.

⁴⁰Napemalaranmi Balak tu sapi sia domba, anna pa’peai tu duku’na lako Bileam sia iatu mai arung nasisolan dio.

⁴¹Masiang pole’ to nasolammi Balak tu Bileam, nasuai kendek langngan inan madoanna Baal. Na inde to nanii untiro nasangi sae lako tampakna tu bangsa iato.