Read Toraja-Sa'dan KADIBILANGAN 23 Bible Online

KADIBILANGAN 23 - Toraja-Sa'dan bible

KADIBILANGAN 23

¹Ma’kadami tu Bileam lako Balak nakua: Pabendananna’ pitu inan pemalaran inde te sia parandananna’ pitu sapi laki sia pitu domba laki inde te.

²Napogau’mi Balak susitu napokada Bileam, anna pemalaranni Balak sola Bileam tu misa’ sapi laki sia misa’ domba laki, ke misa’oi inan pemalaran.

³Mangkato ma’kadami tu Bileam lako Balak nakua: Malekomi bendan dio to’ pemala’ ditunu pu’pu’mi, angku male; umbai la sae tu PUANG umpessitammuina’, sia apa tu Napamanassanna’, iamoto la kupa’peissannan lako kalemi. Attu iato tuka’mi langngan misa’ tanete karing.

⁴Saemi tu Puang Matua umpessitammui Bileam, nama’kada tu Bileam lako nakua: Mangkamo kuparandan tu pitu inan pemalaran, simisa’ inan pemalaran misa’ sapi laki sia misa’ domba laki kupemalaran.

⁵Napatamami PUANG tu misa’ kada dio pudukna Bileam, Nama’kada Nakua: Sulemoko lako Balak, ammu ma’kada susite.

⁶Iatonna sulemo lako, bendan bangsiapa tu Balak dio to’ pemala’ ditunu pu’pu’na, la ia la iatu mintu’ arungna Moab.

⁷Naparandukmi tu Bileam umpokadai tu kada peada’na, anna ma’kada nakua: Dio mai Aram, nanii ussolanna’ Balak, datunna Moab, dio mai ma’buntunna rampe matallo, nakua: Malekomi mai, mitampakanna’ ropu tu Yakub, sia malekomi mai ullangdo Israel.

⁸Umba la kukua untampakki ropu, anna tau iato tae’ Natampakki ropu Puang Matua? Umba la kukua ullangdoi, anna tau iato tae’ Nalangdoi PUANG?

⁹Belanna dao mai potok buntu batu kunii untiroi, sia dao mai tanete kunii umpenunui. Kutiro misa’ bangsa, tu torro misa sia tae’ nasangai sangbilangan dio lu bangsa senga’.

¹⁰Mindara ma’din umbilangi tu barra’-barra’na Yakub sia mindara unnia’i kabudanna Israel? Kumatemora susitu kamateanna to bulo lolong sia iatu lampakku la susi duka tau iato!

¹¹Ma’kadami tu Balak lako Bileam nakua: Apara tu mupogau’? Kutambaikomi la untampakki ropu tu ualingku, ammi ma’passakkeora.

¹²Apa mebalimi nakua: Iatu aku, tae’ kutang la umpokada tonganna susitu apa Napatama PUANG dio pudukku.

¹³Ma’kadami tu Balak lako nakua: Tamale pole’ sola lako inan senga’, tu minii ma’din untiroi (tu tau iato mai); tampakna manna la mitiro tu tau iato, apa iatu mintu’na tae’ mitiroi; na inde to minii untampakanna’ ropu tu tau iato.

¹⁴Nasolammi lako padangna To ma’penunu, langngan bottona Pisga, napabendanmi pitu inan pemalaran, anna pemalaranni tu misa’ sapi laki sia misa’ domba laki, ke simisa’o inan pemalaran.

¹⁵Anna ma’kada lako Balak nakua: Malemokomi bendan inde te to’ pemala’ ditunu pu’pu’mi, angku dikamasei kasitammuan inde to dio.

¹⁶Sitammumi PUANG tu Bileam, anNa patamai pudukna tu misa’ kada, anNa ma’kada tu Puang Nakua: Sulemoko lako Balak, ammu ma’kada susite.

¹⁷Iatonna sulemo lako, bendan bangsiapa tu Balak dio to’ pemala’ ditunu pu’pu’na sisola tu arungna Moab. Ma’kadami tu Balak lako nakua: Apara tu Napokada PUANG?

¹⁸Naparandukmi tu Bileam umpokadai tu kada peada’na anna ma’kada nakua: Ke’de’komi, o Balak, sia perangii; tanannina’ talinga, e anakna Zipor.

¹⁹Iatu Puang Matua tangia tolino, anNa ma’kada tang tongan; ba’tu misa’ ma’rupa tau, anNa menassan. Ma’kadaraka anna tang umpogau’i, ba’tu mangallu’, anNa tang umpadadii?

²⁰Manassa dibenmo’ parenta la ma’passakke sia iake Puang ma’passakke, umba la kukua undampai.

²¹Tae’ napenunui tau tu kamandasan dio lu Yakub, sia tae’ natiroi tu kasanggangan dio lu Israel. Iatu PUANG, Kapenombanna, urrondongi, sia arrakna to untendeng Datu den dio lu tau iato mai.

²²Puang Matua, tu ussolanni lan mai Mesir, Iamo napomatoto’ butung to tanduk sapi laki lampung,

²³belanna tae’ gai’na tu kada la ullangdo Yakub, sia pa’basa-basa la dinii unnea Israel. Totemo melo ke dipokadai tu diona Yakub sia diona Israel apa tu la Napogau’ Puang Matua.

²⁴Tiromi, misa’ bangsa tu bendan butung to misa’ singa birang, sia tunannang butung to misa’ singa laki, tu tae’ nabambangan kalena, ke tae’pi nakande pealanna sia unniru’ rara to mate tibambang.

²⁵Ma’kadami tu Balak lako Bileam nakua: Iake tonganna tae’ miporai untampakki ropu tu tau iato mai da pissanmo mipassakkei.

²⁶Apa mebali tu Bileam nama’kada lako Balak nakua: Tae’raka kupokadangkomi, kumua: Mintu’na apa la Napokada PUANG, iamoto tu la kupogau’?

²⁷Ma’kadami tu Balak lako Bileam: Malekomi mai, angku solangkomi lako inan senga’; umbai nasipatu sia dio pentiroNa Puang Matua, na inde to dio mai minii untampakanna’ ropu tu tau iato.

²⁸Nasolammi Balak tu Bileam langngan bottona Peor, tu nanii untiroi tu Padang aak.

²⁹Ma’kadami tu Bileam lako Balak nakua: Pabendananna’ pitu inan pemalaran indete sia parandananna’ pitu sapi laki sia pitu domba laki indete.

³⁰Napogau’mi Balak susitu mangka napokadanni Bileam, sia napemalaran tu misa’ sapi laki sia misa’ domba laki, ke misa’o inan pemalaran.