Read Toraja-Sa'dan KADIBILANGAN 24 Bible Online

KADIBILANGAN 24 - Toraja-Sa'dan bible

KADIBILANGAN 24

¹Belanna natiro Bileam kumua melomo dio pentiroNa PUANG, ke dipassakkei tu to Israel, tae’mi nalao susitu bunga’na sia ma’penduanna undaka’ lalan, anna langdoi, sangadinna mempatu lu lako padang pangallaran.

²Iatonna bangunanni Bileam tu matanna, sia natiro tu to Israel ma’tenda unturu’ sukunna. Narampoimi PenaanNa Puang Matua.

³Naparandukmi umpokadai tu kada peada’na sia ma’kada nakua: Kada peada’na Bileam, anakna Beor, sia kada peada’na muane, tu millikmo matanna;

⁴kada peada’na tu to umperangiimo kadanNa Puang Matua, tu to untiromo patiroNa To umpoissan angge maritik, tonna matindo tibungka’ matanna.

⁵Lendu’ mala’bi’na tu tendamu, o Yakub, tu katorroammu, o Israel!

⁶Butung to lombok tiampa’; butung to pa’lak dio biring salu; butung to pondan daa Natanan PUANG; butung to kayu arasi’ dio to’ uai.

⁷Nalolongmora tu uai dio mai petimbana, nalempanmora tu uai pangambo’na; ondongpi natongloimira datunna tu Agag sia natarompo’mora tu kadatuanna.

⁸Puang Matua, tu ussolanni lan mai Mesir, Iamo napomatoto’ butung to tanduk sapi laki lampung. Mintu’ bangsa tu napouali naampello’mira, sia iatu mai bukunna nale’to-le’to, sia natarru’mira tinaran tu tau iato mai.

⁹Umbukku kalena, anna sumpandan susito singa laki, sia butung to misa’ singa birang; mindara la umpabendanni? Nadipassakkemora tu to umpassakkeko sia naditampakkimora ropu tu to untampakkiko ropu!

¹⁰Dukkumi tu kasengkeanna Balak lako Bileam, napasisala’pami tu limanna, anna ma’kada tu Balak lako Bileam nakua: Kutambaikomi la untampakki ropu ualingku, nakutiro pentallunmokomi situru’-turu’ umpassakkei tu tau iato.

¹¹Totemo, pallaimokomi lako to’ inanmi; mangkamo kupokada kumua: La kusaroi la’da’komi, apa manassa Nadampa PUANG tu saromi.

¹²Apa ma’kada tu Bileam lako Balak nakua: Tang kupokadaraka lako mintu’ sumbungan pudukmi tu misua umpellambi’ina’, kumua:

¹³Moi nabenna’ Balak ponno banuanna tu salaka sia bulaan, tae’ duka kuma’din ullendai parentaNa PUANG la umpogau’ kalenai tu misa’ apa melo ba’tu kadake; apa tu Napokada PUANG, iamoto tu la kupokada.

¹⁴Na totemo tiromi, la ke’de’mo’ sule lako bangsaku, iamoto melo ke kupa’nubuarangkomi apa tu la naparampoanni bangsa iate tu bangsami.

¹⁵Naparandukmi Bileam umpokada kada peada’na, anna ma’kada, nakua: Kada peada’na Bileam, anakna Beor, sia kada peada’na muane, tu millikmo matanna;

¹⁶kada peada’na tu to umperangiimo kadanNa Puang Matua, sia to unnissan kapaissannanNa To patodoranna, tu to untiromo patiroNa To umpoissan angge maritik, tonna matindo tibungka’ matanna.

¹⁷Kutiro tu tau iato, apa tae’ natotemo, kupenunu tu tau iato, apa tae’ namandappi’; misa’ bintoen bu’tu lan mai Yakub, misa’ tekken kapayungan lan mai Israel, sia untesse pili’na Moab, sia umpipping mintu’ bati’na Set.

¹⁸Attu iato iatu Edom la dadimo lili’ ditalo, sia Seir la dadimo lili’ ditalo — iamotu ualinna. — Apa iatu to Israel la umpasombo kuasanna,

¹⁹sia lan mai Yakub nanii untoe kaparentan, sia la ussanggangi tu to mallai lan mai kota.

²⁰Iatonna tiromi tu Amalek, naparandukmi umpokada kada peada’na, anna ma’kada nakua: Iatu pamulanna mintu’ bangsa iamotu Amalek, anna ma’katampakanna iamotu kasanggangan.

²¹Iatonna tiromi tu to Keni, naparandukmi umpokada kada peada’na, anna ma’kada nakua: Moi matoto’mo tu banuammu, digaragaimo tu serangmu dao buntu batu,

²²apa la narampoi duka kasanggangan tu Keni; sangapapa masainna tu Asyur urrampako?

²³Naparandukmi umpokada kada peada’na, anna ma’kada nakua: A’a! mindapara la tuo, ke Napogau’i Puang Matua te mintu’na te?

²⁴Apa iatu mai kappala’ dio mai biring tasik to Kitim! Tau iato mai la umpatunduk Asyur sia umpatunduk Heber, apa la sanggang duka tu bangsa iato.

²⁵Mangkato ke’de’mi tu Bileam anna sule lako inanna, sia iatu Balak sule dukamo.