Read Toraja-Sa'dan KADIBILANGAN 25 Bible Online

KADIBILANGAN 25 - Toraja-Sa'dan bible

KADIBILANGAN 25

¹Iatonna torromo tu to Israel dio Sitim, naparandukmi ma’gau’ sala sola baine to Moab.

²Belanna natambai tu bangsa iato lako to’ pemala’ pangrere’ dipemalaran deatanna, anna kumande dio tu bangsa iato, anna menomba lako deatanna baine iato.

³Iatu to Israel menturu’mo lako Baal-Peor, iamoto anna dukku tu kasengkeanNa PUANG ullaoi Israel,

⁴sia ma’kada tu PUANG lako Musa, Nakua: Alami tu mintu’ pangulunna bangsa iato, ammu toke’i dio tingayona to buda la umpamatande PUANG, kumua anna soro’ tu kare’dekan ara’Na PUANG dio mai Israel.

⁵Ma’kadami tu Musa lako mintu’ to ma’paolai salunna to Israel nakua: Pantan la mipatei dio lu taummi minda-minda tu menturu’mo lako Baal-Peor.

⁶Pakalan saemi misa’ to Israel umbaa misa’ baine to Midian lako siulu’na dio pentirona Musa sia mintu’ kasirampunan to Israel, tonna marassan tu tau sitangiran dio to’ ba’ba Tenda Kasitammuan.

⁷Iatonna tiromi Pinehas, anakna Eleazar, anakna to minaa Harun tu iannato, ke’de’mi lan mai tangngana kasirampunan, nasitetang misa’ doke.

⁸Attu iato undimi naula’ tu muane to Israel, anna lambi’i lan inan kamammaran, anna rokki tu tau sola duai la iatu muane Israel la iatu baine diong to’ banneanna. Attu iato ra’dami tu kasanggangan urrampoi to Israel.

⁹Iatu to mate belanna kasanggangan iato, den duang pulo nna’pa’ sa’bu.

¹⁰Ma’kadami tu PUANG lako Musa, Nakua:

¹¹Iatu Pinehas, anakna Eleazar, anakna to minaa Harun, umpara’dai tu kare’dekan ara’Ku dio mai to Israel, belanna maparrang tongan dio lu tau iato mai umpakala’bi’Na’, iamoto natae’mo Kumaparrang ussabu’i tu to Israel.

¹²Iamoto pokadanni: Tonganna, la Kukamasei basse kasalamarangKu.

¹³Kumua anna ia sia mintu’ bati’na umpobassei tu diona katominaan matontongan, belanna maparrang umpakala’bi’ Kapenombanna sia umpadenan kadiseroian kasalan to Israel.

¹⁴Iatu to Israel tu dipatei sola baine to Midian, disanga Zimri, anakna Salu, iamotu pangulu rapunna to Simeon.

¹⁵Sia iatu baine to Midian tu dipatei, disanga Kozbi, iamotu anakna Zur; tu pangulu rapunna suku to Midian.

¹⁶Ma’kadami tu PUANG lako Musa, Nakua:

¹⁷La mipogau’ lako to Midian susito mipogau’ lako ualimmi sia patei,

¹⁸belanna iatu penggauranna lako kalemi susito uali untangnga’-tangnga’ kadake unneakomi diona Peor sia diona Kozbi, anak arungna to Midian, iamo siulu’na baine, tu dipatei tonna allo kasanggangan tete dio Peor.