Read Toraja-Sa'dan KADIBILANGAN 26 Bible Online

KADIBILANGAN 26 - Toraja-Sa'dan bible

KADIBILANGAN 26

¹Iatonna ra’damo tu kasanggangan iato, ma’kadami tu PUANG lako Musa sia lako Eleazar, anakna to minaa Harun, Nakua:

²Ia’mi tu mintu’ bilanganna kasirampunan to Israel, randuk dio mai tau siduangpulona taunna sia la’bi situru’ rapunna, iamotu to malemo messurodadu lan Israel.

³Attu iato ma’kadami tu Musa sia to minaa Eleazar lako tau iato mai dio padang Moab dio biring Yordan sitingoan Yerikho, kumua:

⁴Randuk dio mai siduangpulomo taunna sia la’bi! — susitu mangka Napepasanan PUANG lako Musa, iamotu to Israel, tu tassu’ lan mai tondok Mesir.

⁵Iatu Ruben anak pa’bunga’na Israel; bati’na Ruben, iamotu dio mai Henokh pa’rapuanna to Henokh; dio mai Palu pa’rapuanna to Palu;

⁶dio mai Hezron pa’rapuanna to Hezron sia dio mai Karmi pa’rapuanna to Karmi.

⁷Iamote tu pa’rapuanna to Ruben, iatu iaranna den patangpulo ntallu sa’bu pituratu’ ntallungpulo.

⁸Na iatu anakna Palu iamotu Eliab,

⁹na iatu anakna Eliab iamotu Nemuel, Datan sola Abiram. Iate Datan sola Abiram to ditambai lan mai kasirampunan, tu umbali Musa sola Harun dio lu to massituru’ lan kapabali-balianna Korah, tonna sigaga umbali PUANG.

¹⁰Apa menganga tu padang anna ampello’i tu tau iato sola Korah, tonna mate tu to massituru’ iato, belanna duaratu’ limangpulo tu muane nakande api, naurungan dadi misa’ tanda pa’pakilala lako tau.

¹¹Apa iatu anakna Korah tae’ namate.

¹²Na iatu bati’na Simeon unturu’ pa’rapuanna, iamotu dio mai Nemuel pa’rapuanna to Nemuel; dio mai Yamin pa’rapuanna to Yamin; dio mai Yakhin pa’rapuanna to Yakhin;

¹³dio mai Zerah pa’rapuanna to Zerah nadio mai Saul pa’rapuanna to Saul.

¹⁴Iamote tu pa’rapuanna to Simeon, den duangpulo ndua sa’bu nduaratu’.

¹⁵Iatu bati’na Gad, situru’ pa’rapuanna, iamotu dio mai Zefon, pa’rapuanna to Zefon; dio mai Hagi pa’rapuanna to Hagi; dio mai Syuni pa’rapuanna to Syuni;

¹⁶dio mai Ozni pa’rapuanna to Ozni; dio mai Eri pa’rapuanna to Eri;

¹⁷dio mai Arod pa’rapuanna to Arod, nadio mai Areli pa’rapuanna to Areli.

¹⁸Iamote tu pa’rapuanna bati’na Gad situru’ bilanganna, den patangpulo sa’bu llimaratu’.

¹⁹Iatu bati’na Yehuda, iamotu Er sia Onan; na iatu Er sola Onan mate lan tondok Kanaan.

²⁰Iatu bati’na Yehuda situru’ pa’rapuanna, iamotu dio mai Syela pa’rapuanna to Syela; dio mai Peres pa’rapuanna to Peres na dio mai Zerah pa’rapuanna to Zerah.

²¹Iatu bati’na Peres, iamotu dio mai Hezron pa’rapuanna to Hezron na dio mai Hamul pa’rapuanna to Hamul.

²²Iamote tu pa’rapuanna Yehuda situru’ bilanganna, den pitungpulo nnannan sa’bu llimaratu’.

²³Iatu bati’na Isakhar situru’ pa’rapuanna, iamotu dio mai Tola pa’rapuanna to Tola; dio mai Pua pa’rapuanna to Pua;

²⁴dio mai Yasub pa’rapuanna to Yasub, na dio mai Simron pa’rapuanna to Simron.

²⁵Iamote tu pa’rapuanna Isakhar situru’ bilanganna, den annan pulona nna’pa’ sa’bu ntalluratu’.

²⁶Iatu bati’na Zebulon situru’ pa’rapuanna, iamotu dio mai Sered pa’rapuanna to Sered; dio mai Elon pa’rapuanna to Elon, na dio mai, Yahleel pa’rapuanna to Yahleel.

²⁷Iamote tu pa’rapuanna to Zebulon situru’ bilanganna, den annan pulona sa’bu llimaratu’.

²⁸Iatu bati’na Yusuf situru’ pa’rapuanna iamotu Manasye sola Efraim.

²⁹Iatu bati’na Manasye, iamotu dio mai Makhir pa’rapuanna to Makhir; na Makhir undadian Gilead; dio mai Gilead pa’rapuanna to Gilead.

³⁰Inde sia tu pa’rapuanna Gilead, iamotu dio mai Iezer pa’rapuanna to Iezer; dio mai Helek pa’rapuanna to Helek;

³¹dio mai Asriel pa’rapuanna to Asriel; dio mai Sekhem pa’rapuanna to Sekhem;

³²dio mai Semida pa’rapuanna to Semida, na dio mai Hefer pa’rapuanna to Hefer.

³³Na iatu Zelafehad, anakna Hefer tae’ muane nadadian, apa undadian sia baine; na iatu sanganna baine nadadian Zelafehad, iamotu Mahla, Noa, Hogla, Milka na Tirza.

³⁴Iamote tu pa’rapuanna Manasye sia bilanganna den limangpulo ndua sa’bu mpituratu’.

³⁵Inde sia tu bati’na Efraim situru’ pa’rapuanna, iamotu dio mai Sutelah pa’rapuanna to Sutelah; dio mai Bekher pa’rapuanna to Bekher, na dio mai Tahan pa’rapuanna to Tahan.

³⁶Sia inde sia tu bati’na Sutelah, iamotu dio mai Eran pa’rapuanna to Eran.

³⁷Iamoto tu pa’rapuanna Efraim situru’ bilanganna, den tallungpulo ndua sa’bu llimaratu’. Iamote tu bati’na Yusuf situru’ pa’rapuanna.

³⁸Iatu bati’na Benyamin situru’ pa’rapuanna, iamotu dio mai Bela pa’rapuanna to Bela; dio mai Asbel pa’rapuanna to Asbel; dio mai Ahiram pa’rapuanna to Ahiram;

³⁹dio mai Sefufam pa’rapuanna to Sefufam na dio mai Hufam pa’rapuanna to Hufam.

⁴⁰Sia iatu bati’na Bela iamotu Ared sia Naaman; dio mai Ared pa’rapuanna to Ared na dio mai Naaman pa’rapuanna to Naaman.

⁴¹Iamote tu bati’na Benyamin situru’ pa’rapuanna na iatu bilanganna den patangpulo llima sa’bu nnannanratu’.

⁴²Inde sia tu bati’na Dan situru’ pa’rapuanna, iamotu dio mai Suham pa’rapuanna to Suham. Iamote tu pa’rapuanna Dan situru’ pa’rapuanna.

⁴³Mintu’ pa’rapuanna to Suham situru’ bilanganna den annan pulona nna’pa’ sa’bu nna’pa’ratu’.

⁴⁴Iatu bati’na Asyer situru’ pa’rapuanna, iamotu dio mai Yimna pa’rapuanna to Yimna; dio mai Yiswi pa’rapuanna to Yiswi na dio mai Beria pa’rapuanna to Beria.

⁴⁵Iatu diona bati’na Beria, iamotu dio mai Heber pa’rapuanna to Heber, na dio mai Malkiel pa’rapuanna to Malkiel.

⁴⁶Na iatu baine nadadian Asyer disanga Serah.

⁴⁷Iamote tu pa’rapuanna bati’na Asyer situru’ bilanganna, den limangpulo ntallu sa’bu nna’pa’ratu’.

⁴⁸Iatu bati’na Naftali situru’ pa’rapuanna iamotu dio mai Yahzeel pa’rapuanna to Yahzeel; dio mai Guni pa’rapuanna to Guni;

⁴⁹dio mai Yezer pa’rapuanna to Yizer, na dio mai Syilem pa’rapuanna to Syilem.

⁵⁰Iamote tu pa’rapuanna Naftali situru’ pa’rapuanna, sia bilanganna den patangpulo llima sa’bu nna’pa’ratu’.

⁵¹Iamoto tu mintu’ bilanganna to Israel, den annan ratu’ mmisa sa’bu pituratu’ ntallungpulo.

⁵²Ma’kadami tu PUANG lako Musa Nakua:

⁵³Tau iamote mai la ditaa-taan tu padang la napotaa mana’ situru’ bilangan sanganna.

⁵⁴Iake budai la mupakalua’ tu taa mana’na, iake sidi’ri la mupabitti’ tu taa mana’na; situru’ bilanganna la pantan diben taa mana’na.

⁵⁵Moi susito la ditaa tu padang unturu’ pa’loterei; situru’ sanganna suku nene’ to dolona tu la napotaa mana’.

⁵⁶Pa’loterei iato la umpamanassai tu taa mana’na, ke sangsukuoi unturu’ kabudanna sia kasidiranna bilanganna.

⁵⁷Inde sia tu bilanganna to Lewi situru’ pa’rapuanna, iamotu dio mai Gerson pa’rapuanna to Gerson; dio mai Kehat pa’rapuanna to Kehat, na dio mai Merari pa’rapuanna to Merari.

⁵⁸Inde sia tu pa’rapuanna to Lewi, iamotu pa’rapuanna to Libni, pa’rapuanna to Hebron, pa’rapuanna to Mahli, pa’rapuanna to Musi, pa’rapuanna to Korah.

⁵⁹Iatu Kehat undadian Amram, Iatu bainena Amram disanga Yokhebed, anakna Lewi, tu dipadadian Lewi dio Mesir. Anna padadianni Amram tu Harun sia Musa sia Miryam, anak daranna.

⁶⁰Iatu dipadadian Harun, iamotu Nadab, Abihu, Eleazar na Itamar.

⁶¹Matemi tu Nadab sola Abihu, tonna baai tu api tang sipatu dio oloNa PUANG.

⁶²Na iatu bilanganna den duangpulo ntallu sa’bu, muane nasang, randuk dio mai sangbulan ba’tu la’bi; tau iato tae’ nadipasibilang to Israel, belanna tae’ nadiben taa mana’ dio lu to Israel.

⁶³Iamote, tu to nabilang Musa sola to minaa Eleazar, tu umbilang to Israel dio lu padang Moab dio biring Yordan sitingoan Yerikho.

⁶⁴Dio lu tau iato tae’ misa’ tu to nabilang Musa sia to minaa Harun, tonna ia’ to Israel lan padang pangallaran Sinai.

⁶⁵Belanna mangka Napokada PUANG diona tau iato Nakua: Tonganna la mate lan padang pangallaran. Nadio mai tau iato tae’mo tau tinampe sangadinna Kaleb, anakna Yefune na Yosua, anakna Nun.