Read Toraja-Sa'dan KADIBILANGAN 27 Bible Online

KADIBILANGAN 27 - Toraja-Sa'dan bible

KADIBILANGAN 27

¹Sae mengkareke’ tu mai anakna baine Zelafehad, anakna Hefer, anakna Gilead, anakna Makhir, anakna Manasye, dio mai pa’rapuanna Manasye, anakna Yusuf — inde sia tu sanganna anakna baine, iamotu Mahla, Noa, Hogla, Milka sia Tirza —

²anna bendan dio olona Musa sia to minaa Eleazar sia iatu mai arung, sia mintu’ kasirampunan dio to’ ba’ba Tenda Kasitammuan nama’kada, nakua:

³Iatu ambe’ki mate lan padang pangallaran, apa tangia iatu sangbilangan to massituru’ umbali PUANG, iamotu to massituru’ lan kapabali-balianna Korah, apa natumang ia kasalanna kalena, namate, anna tae’ tu anakna muane.

⁴Ma’apai na iatu sanganna ambe’ki la pa’de poto’ lan mai pa’rapuanna, belanna tae’ anakna muane? Benkan kami ba’gingki tu apa dio lu siulu’na ambe’ki.

⁵Naparampomi Musa tu pekutananna baine iate dio oloNa PUANG.

⁶Ma’kadami tu PUANG lako Musa, Nakua:

⁷Iatu anakna baine Zelafehad tonganna tu napokada; manassa la muben ba’ginna, tu apa dio lu siulu’na ambe’na, sia la mupalele tu taa mana’na ambe’na lako kalena.

⁸Lako to Israel la ma’kadako kumua: Iake den misa’ tau mate natae’ tu anakna muane, manassa iatu taa mana’na la mupalele lako anakna baine.

⁹Iake tae’i tu anakna baine, la muben tu taa mana’na lako siulu’na.

¹⁰Iake tae’i tu siulu’na, la muben tu taa mana’na lako pa’amberanna.

¹¹Iake tae’i tu siulu’na ambe’na, manassa la muben tu taa mana’na lako sangdadian marengke’na dio mai pa’rapuanna, anna poapai. Iamote tu misa’ atoran dipondok lako to Israel, susitu Napepasanan PUANG lako Musa.

¹²Ma’kadami tu PUANG lako Musa, Nakua: Kendekko langngan buntu Abarim, ammu tiroi tu tondok, mangka Kukamasean to Israel.

¹³Iake mutiromi, la sisarak dukamoko angin dipudukmu sule lako nene’ to dolomu susi siulu’mu Harun.

¹⁴Belanna tonna pabali-bali tu kasirampunan lan padang pangallaran Zin, miea tu parentaKu tu Kukua: La mipakala’bi’Na’ dio pentirona tau iato mai dio to’ uai. Iamoto tu uainna Meriba sikandappi’ Kadesh dio padang pangallaran Zin.

¹⁵Ma’kadami Musa lako PUANG, nakua:

¹⁶Iatu PUANG, Kapenombanna penaanna mintu’ apa tuo, la unnangka’ misa’ muane umpangului tu kasirampunan,

¹⁷tu lu tama lu lan mai dio tingayona tau iato mai sia iatu ussolanni tassu’ sia ussolanni sule tu tau iato, kumua da nasusi to domba tae’ panglaana tu kasirampunanNa PUANG.

¹⁸Ma’kadami tu PUANG lako Musa Nakua: Alami tu Yosua, anakna Nun, tu misa’ muane, tu naponnoi penaa, muremme’i limammu,

¹⁹ammu popennoloi lako to minaa Eleazar sia lako mintu’ kasirampunan, sia pokadanni parentamu dio tingayona tau iato mai,

²⁰sia soronganni pira tu kataromposammu, kumua anna rangii mintu’ kasirampunanna to Israel.

²¹La bendan dio olona to minaa Eleazar anna pekutananni to minaa Eleazar tu pangra’ta’na Urim dio oloNa PUANG. Anna tete dio parentaNa anna lu tama lu lan mai tu tau iato mai, la ia la iatu mintu’ to Israel nasisolan, sia mintu’ kasirampunan.

²²Napogau’mi Musa, susitu Napasananni PUANG, nasolammi tu Yosua lako olona to minaa Eleazar sia dio tingayona mintu’ kasirampunan.

²³Naremme’imi limanna sia napokadan parentana, susitu mangka Napokada PUANG nalopian Musa.