Read Toraja-Sa'dan KADIBILANGAN 28 Bible Online

KADIBILANGAN 28 - Toraja-Sa'dan bible

KADIBILANGAN 28

¹Ma’kadami tu PUANG lako Musa Nakua:

²La mupasan tu to Israel sia pokadanni, kumua: la mikanandai mipennoloanni lako Kaleku tu pemala’ dipemalaran lako Kaleku, iamotu kandeKu, dipopemala’ pantunu, dipobau busarungngu’ dio oloKu, lan attu dipamanassa.

³Sia pokadanni lako tu tau, kumua: Iamote tu pemala’ pantunu tu la mipennoloan lako PUANG, iamotu da’dua domba sisangtaunmo, tu tae’ tattanna, dipopemala’ ditunu pu’pu’ kiallo-kiallo.

⁴Iatu misa’ domba la muparandan, ke melambi’, iatu misa’na la muparandan, ke makaroenni.

⁵Dipasisola pissan taa sangpulona epa[10] ta’pung manisak dipasigerok minna’ dio mai saitun dilambuk sangtaa a’pa’na hin[11] la dipokande dipemalaran.

⁶Iamote tu pemala’ ditunu pu’pu’ kiallo-kiallo, tu dipondok dao buntu Sinai, la dipobau busarungngu’, iamotu misa’ pemala’ pantunu dipemalaran lako PUANG.

⁷Sia pemala’ pantedok, tu dipasisolanni la sangtaa a’pa’na hin, ke misa’o domba; tedokanni PUANG tu pemala’ pantedok dio mai apa diiru’ tu mepamalango lan inan maindan.

⁸Na iatu domba senga’ la muparandan, ke makaroenni; la muparandan susitu kande dipemalaran ke melambi’, sia susi pemala’ pantedok, tu dipasisolanni, iamotu pemala’ pantunu dipemalaran lako PUANG, dipobau busarungngu’.

⁹Na iake allo katorroan la mupemalaran tu da’dua domba sisangtaunmo tu tae’ tattanna sola duang taanna ke sangpuloi ta’pung manisak, dipasigerok minna’, dipokande dipemalaran, sia pemala’ pantedok, tu dipasisolanni.

¹⁰Iamote tu pemala’ ditunu pu’pu’na allo katorroan, ke allo katorroanoi, senga’ iatu pemala’ ditunu pu’pu’ kiallo-kiallo, sia pemala’ pantedok dipasisolanni.

¹¹Iake pamulanna bulanmi la mipemalaran lako PUANG tu pemala’ ditunu pu’pu’, iamotu da’dua anak sapi laki, misa’ domba laki, pitu domba sisangtaunmo, tu tae’ tattanna,

¹²dipasisola tallung taanna ke sangpuloi ta’pung manisak, dipasigerok minna’ la dipokande dipemalaran, ke simisa’o sapi laki; sia duang taanna ke sangpuloi ta’pung manisak, dipasigerok minna’ dipokande dipemalaran, ke misa’o domba laki.

¹³Sia sangtaanna ke sangpuloi ta’pung manisak dipasigerok minna’ dipokande dipemalaran, ke misa’o domba, iamote tu pemala’ ditunu pu’pu’, dipobau busarungngu’, iamotu pemala’ pantunu, dipemalaran lako PUANG.

¹⁴Iatu pemala’ pantedok, la dipasisolanni, iamotu uai anggoro’ sangtangnga hin, ke misa’o sapi laki, sia sangtaa tallunna hin, ke misa’o domba laki, sia sangtaa a’pa’na hin, ke misa’o domba. Iamote tu pemala’ ditunu pu’pu’, ke sangbulanoi lan simisa’-misa’ bulan lan mintu’ bulan ke taunoi.

¹⁵Sia misa’ bembe’ laki la diparandan diposuru’ pengkalossoran lako PUANG, sia pemala’ pantedok dipasisolanni, senga’ na iatu pemala’ ditunu pu’pu’ kiallo-kiallo.

¹⁶Lan bulan bunga’na, allo ma’pessangpulo a’pa’na bulan iato la dipogauran Pa’pasa tu PUANG.

¹⁷Sia lan allo ma’pessangpulo lima lan bulan iato, la den allo kapua; pitung allo la nanii tau ungkande roti tang diragii.

¹⁸Iake allo bunga’na la den tu kasirampunan masero; da’ mitoe pengkarangan dakaran kande.

¹⁹La mipemalaran lako PUANG tu pemala’ pantunu, iamotu pemala’ ditunu pu’pu’, da’dua anak sapi laki, misa’ domba laki sia pitu domba sisangtaunmo, tu tae’ tattanna.

²⁰Iatu kande dipemalaran la miparandan, iamotu ta’pung manisak dipasigerok minna’, tallung taan sangpulona, ke misa’oi sapi laki sia duang taan sangpulona tu domba laki;

²¹sangtaan sangpulona la miparandan, ke misa’oi tu pitu domba.

²²Na misa’ bembe’ la diposuru’ pengkalossoran, la umpadenangkomi kadiseroian kasalan.

²³Senga’ iatu pemala’ ditunu pu’pu’ ke melambi’, tu dipasangbilangan pemala’ ditunu pu’pu’ kiallo-kiallo, la miparandan tu iannato.

²⁴Susimoto la miparandan kiallo-kiallo lan pitung allo tu kande pemala’ pantunu, iamotu dipobau busarungngu’ lako PUANG. Senga’ iatu pemala’ ditunu pu’pu’ kiallo-kiallo la diparandan la dipasisola pemala’ pantedok.

²⁵Sia iake allo ma’pempitu la mipakaraya tu kasirampunan masero; da’ mitoe pengkarangan dakaran kande.

²⁶Iake allo pangrakanan, ke umpennoloangkomi kande dipemalaran ba’ru lako PUANG, ke pa’gauran minggummi la mipogau’ tu kasirampunan masero sia da’ mitoe pengkarangan dakaran kande.

²⁷Sia la mipemalaran tu pemala’ ditunu pu’pu’ la dipobau busarungngu’ lako PUANG, iamotu da’dua anak sapi laki sia misa’ domba laki sia pitu domba sisangtaunmo;

²⁸dipasisola kande dipemalaran, iamotu ta’pung manisak dipasigerok minna’, tallung taan sangpulona, ke misa’oi sapi laki sia duang taan sangpulona tu misa’ domba laki,

²⁹sia sangtaan sangpulona, ke misa’oi tu pitu domba,

³⁰sia misa’ bembe’ la umpadenangkomi kadiseroian kasalan.

³¹Senga’ ia tu pemala’ ditunu pu’pu’ kiallo-kiallo la miparandan tu iannato di pasisola tu kande dipemalaran; la tae’ tattanna tu patuoan iato, dipasisola pemala’ pantedok.