Read Toraja-Sa'dan KADIBILANGAN 29 Bible Online

KADIBILANGAN 29 - Toraja-Sa'dan bible

KADIBILANGAN 29

¹Lan bulan ma’pempitu, ke allo bunga’na bulan iato la mipogau’ tu misa’ kasirampunan masero sia da’ mitoe pengkarangan dakaran kande; allo iato la minii kumalasi-lasi.

²Sia la miparandan tu pemala’ ditunu pu’pu’, la dipobau busarungngu’ lako PUANG, iamotu misa’ anak sapi laki, misa’ domba laki sia pitu domba sisangtaunmo, tu tae’ tattanna;

³sia dipasisola kande dipemalaran, iamotu ta’pung manisak dipasigerok minna’ tallung taan sangpulona tu sapi laki, duang taan sangpulona tu domba laki,

⁴sia sangtaa sangpulona, ke misa’oi tu pitu domba.

⁵Sia misa’ bembe’ laki diposuru’ pengkalossoran, la umpadenangkomi kadiseroian kasalan.

⁶Senga’ iatu pemala’ ditunu pu’pu’ ke bulanoi sia kande dipemalaran dipasisola sia pemala’ ditunu pu’pu’ kiallo-kiallo, dipasisola kande dipemalaran, sia dipasisola pemala’ pantedok situru’ atoranna, dipobau busarungngu’, iamotu misa’ pemala’ pantunu lako PUANG.

⁷Iake allo ma’pessangpulo lan te bulan ma’pempitu la mipogau’ tu kasirampunan masero sia la umpamadiongkomi penaammi sia da mipogau’ misa’ pentoean.

⁸Allo iato la mipennoloan lako PUANG tu misa’ pemala’ pantunu pu’pu’, la dipobau busarungngu’, iamotu misa’ anak sapi laki, misa’ domba laki sia pitu domba sisangtaunmo, tu tae’ tattanna;

⁹sia dipasisola kande dipemalaran, iamotu ta’pung manisak dipasigerok minna’, tallung taan sangpulona tu sapi laki, duang taan sangpulona tu misa’ domba laki,

¹⁰sia sangtaa sangpulona, ke misa’oi tu pitu domba.

¹¹Sia misa’ bembe’ laki diposuru’ pengkalossoran; senga’pi tu suru’ pengkalossoran tu umpaden kadiseroian kasalan sia pemala’ ditunu pu’pu’ kiallo-kiallo dipasisola kande dipemalaran sia dipasisola pemala’ pantedok.

¹²Sia iake allo ma’pessangpulo lima lan bulan ma’pempitu la mipogau’ tu kasirampunan masero sia da’ mitoe pengkarangan dakaran kande. Lan pitung allo minii umpakaraya allo kapua la umpakala’bi’ PUANG.

¹³La mipennoloan tu pemala’ ditunu pu’pu’, tu pemala’ pantunu, la dipobau busarungngu’ lako PUANG, iamotu sangpulo tallu anak sapi laki, da’dua domba laki sia sangpulo a’pa’ domba sisangtaunmo tu tae’ tattanna.

¹⁴Sia dipasisola kande dipemalaran, iamotu ta’pung manisak dipasigerok minna’, tallung taan sangpulona, ke misa’oi tu sangpulo tallu sapi laki, duang taan sangpulona ke misa’oi tu da’dua domba laki,

¹⁵sia sangtaa sangpulona ke misa’oi tu sangpulo a’pa’ domba.

¹⁶Sia misa’ bembe’ laki diposuru’ pengkalossoran, senga’pi ia tu pemala’ ditunu pu’pu’ kiallo-kiallo, dipasisola kande dipemalaran sia dipasisola pemala’ pantedok.

¹⁷Iake allo ma’penduan sangpulo dua sapi laki mangura, da’dua domba laki sia sangpulo a’pa’ domba sisangtaunmo, tu tae’ tattanna,

¹⁸dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

¹⁹Sia misa’ bembe’ laki la diposuru’ pengkalossoran, senga’pi iatu pemala’ ditunu pu’pu’ kiallo-kiallo, dipasisola kande dipemalaran sia dipasisola pemala’ pantedok.

²⁰Iake allo ma’pentallun sangpulo sapi laki, da’dua domba laki sia sangpulo a’pa’ domba, sisangtaunmo, tu tae’ tattanna;

²¹sia dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

²²Sia misa’ bembe’ laki diposuru’ pengkalossoran; senga’pi iatu pemala’ ditunu pu’pu’ kiallo-kiallo, dipasisola kande dipemalaran sia dipasisola pemala’ pantedok.

²³Iake allo ma’penna’pa’ sangpulo sapi laki sia da’dua domba laki sia sangpulo a’pa’ domba sisangtaunmo, tu tae’ tattanna,

²⁴dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

²⁵Sia misa’ bembe’ laki diposuru’ pengkalossoran; senga’pi ia tu pemala’ ditunu pu’pu’ kiallo-kiallo, dipasisola kande dipemalaran sia dipasisola pemala’ pantedok.

²⁶Iake allo ma’pellima kasera sapi laki sia da’dua domba laki sia sangpulo a’pa’ domba sisangtaunmo, tu tae’ tattanna,

²⁷dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

²⁸Sia misa’ bembe’ laki diposuru’ pengkalossoran; senga’pi iatu pemala’ ditunu pu’pu’ kiallo-kiallo dipasisola kande dipemalaran sia dipasisola pemala’ pantedok.

²⁹Iake allo ma’pennannan karua tu sapi laki sia da’dua domba laki sia sangpulo a’pa’ domba sisangtaunmo, tu tae’ tattanna:

³⁰dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

³¹Sia misa’ bembe’ laki diposuru’ pengkalossoran; senga’pi iatu pemala’ ditunu pu’pu’ kiallo-kiallo dipasisola kande dipemalaran sia dipasisola pemala’ pantedok.

³²Iake allo ma’pempitu, pitu tu sapi laki sia da’dua domba laki sia sangpulo a’pa’ domba sisangtaunmo, tu tae’ tattanna;

³³dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

³⁴Sia misa’ bembe’ laki diposuru’ pengkalossoran; senga’pi iatu pemala’ ditunu pu’pu’ kiallo-kiallo, dipasisola kande dipemalaran sia dipasisola pemala’ pantedok.

³⁵Iake allo ma’pengkarua la mipogau’ tu misa’ kasirampunan umpakaraya allo kapua sia da’ mitoe pengkarangan dakaran kande.

³⁶Allo iato la mipennoloan tu pemala’ ditunu pu’pu’, iamotu pemala’ pantunu, dipobau busarungngu’ lako PUANG, iamotu misa’ sapi laki, misa’ domba laki sia pitu domba sisangtaunmo, tu tae’ tattanna;

³⁷dipasisola kande dipemalaran sia dipasisola pemala’ pantedok sisola tu sapi laki sia domba laki sia iatu mai domba situru’ bilanganna sia atoranna.

³⁸Sia misa’ bembe’ laki diposuru’ pengkalossoran, senga’pi tu pemala’ ditunu pu’pu’ kiallo-kiallo, dipasisola kande dipemalaran sia dipasisola pemala’ pantedok.

³⁹Iamote tu la miparandanan PUANG, ke allo kapuami dipopemala’ ditunu pu’pu’mi sia dipokande dipemalarammi sia dipopemala’ pantedokmi sia dipopemala’ kasalamarammi; senga’pi iatu pemala’ pangallonammi sia pemala’ tanning penaammi.

⁴⁰Napokadami Musa lako to Israel mintu’ tu apa mangka Napepasanan PUANG lako Musa.