Read Toraja-Sa'dan KADIBILANGAN 3 Bible Online

KADIBILANGAN 3 - Toraja-Sa'dan bible

KADIBILANGAN 3

¹Inde sia tu bati’na Harun sola Musa, tonna sipa’kada PUANG tu Musa dao buntu Sinai.

²Iamote tu sanganna anakna Harun: iatu pa’bunga’na disanga Nadab, namane Abihu, Eleazar na Itamar.

³Iamote tu sanganna anakna Harun, iamotu to minaa dibolloi minna’ tu mangka natokko la untoe pentoean to minaa.

⁴Apa iatu Nadab sola Abihu mate dio oloNa PUANG dio padang pangallaran Sinai, tonna pennoloan api tang sipatu dio oloNa PUANG, natae’ anakna sola duai. Mangkato iatu Eleazar sola Itamar untoe pentoean to minaa, tonna tuopa Harun, ambe’na.

⁵Ma’kadami tu PUANG lako Musa Nakua:

⁶Suai tu suku Lewi ma’pampangan sia popennoloi dio olona to minaa Harun, anna kamayai tu Harun,

⁷sia la nakarang tu apa dipatageranni untundui Harun sia untundui mintu’ kasirampunan dio olona Tenda Kasitammuan, belanna untoe pentoean sikandappi’ kema.

⁸Iatu tau iato mai la ungkampai tu mintu’ pareananna Tenda Kasitammuan, sia ungkarangi tu apa dipatageranni untundui to Israel, belanna untoe pentoean sikandappi’ kema.

⁹La musorong tu to Lewi lako Harun sia anakna; dio mai mintu’ to Israel la dipa’benganmo lako Harun tang naola kada.

¹⁰Apa lako Harun sia iatu mai anakna la mupasan anna toei tu pentoean to minaa; minda-minda tang sipatu anna reke’i tu pentoean iato, la mate dipongko.

¹¹Ma’kadami tu PUANG lako Musa, Nakua:

¹²Manassa iatu Aku, Kualamo tu to Lewi dio mai mintu’ to Israel la ussonda mintu’ anak pa’bunga’na to Israel, tu bunga’na urrubak pa’tambukan indo’na, kumua na iatu to Lewi taungKu,

¹³belanna mintu’ anak pa’bunga’ taungKu nasang. IatongKu pata’pai lima tu mintu’ anak pa’bunga’ lan tondok Mesir, Kupamarimbanganan Kaleku tu mintu’ anak pa’bunga’ lan Israel la tau la olo’-olo’; apangKu nasang; Akumo tu PUANG.

¹⁴Ma’kadami tu PUANG lako Musa lan padang pangallaran Sinai, Nakua:

¹⁵Ia’i tu to Lewi situru’ rapunna sia pa’rapuanna, iamotu muane, randuk dio mai to sisangbulan sia la’bi, la muia’ nasang.

¹⁶Naia’mi Musa tu tau iato mai unturu’ parentaNa PUANG, susitu mangka Napasananni.

¹⁷Inde sia tu sanganna anakna Lewi, iamotu Gerson, Kehat na Merari.

¹⁸Inde sia tu sanganna anakna Gerson situru’ pa’rapuanna, iamotu Libni na Simei.

¹⁹Na iatu anakna Kehat situru’ pa’rapuanna, iamotu Amram, Yizhar, Hebron na Uziel.

²⁰Na iatu anakna Merari situru’ pa’rapuanna, iamotu Mahli na Musi. Iamote tu pa’rapuanna to Lewi unturu’ rapunna.

²¹Iatu pa’rapuanna to Libni sia to Simei naala bilanganna Gerson; iamotu pa’rapuanna to Gerson.

²²Iatu mangkanna diia’ situru’ bilanganna mintu’ muane randuk dio mai to sisangbulan sia la’bi, den pitung sa’bu llimaratu’.

²³Iatu pa’rapuanna to Gerson ma’tenda dio boko’ kema dio rampe matampu’.

²⁴Iatu pekaamberanna to Gerson disanga Elyasaf, anakna Lael.

²⁵Diona tu Tenda Kasitammuan la kema la iatu tenda natu’gunmo to Gerson tu papana sia kulambu dio to’ ba’ba Tenda Kasitammuan,

²⁶sia tenda tarampak sia iatu kulambu dio to’ ba’ba tarampak, tu untikui kema sia inan pemalaran, sisola ulangna, situru’ tu mintu’ apa sipatu dipogau’ dio.

²⁷Iatu pa’rapuanna to Amram, to Yizhar, to Hebron na to Uziel naala bilanganna Kehat; iamote tu pa’rapuanna to Kehat.

²⁸Iatu mangkanna diia’ situru’ bilanganna mintu’ muane randuk dio mai to sisangbulan sia la’bi, den karua sa’bunna nnannanratu’; iatu tau iato mai untu’gunmo apa maindan.

²⁹Iatu mintu’ pa’rapuan to Kehat ma’tenda sipeupu’ kema rampe lo’na lu.

³⁰Iatu pekaamberanna mintu’ pa’rapuan to Kehat disanga Elisafan, anakna Uziel.

³¹Iatu tau iato untu’gun patti, meda, tongkonan palita, mintu’ inan pemalaran sia mintu’ pareanan maindan, tu dipake umpogau’ kamenomban, kulambu sia mintu’ apa sipatu dipogau’ dio.

³²Iatu pangulu lompona to Lewi, disanga Eleazar, anakna to minaa Harun, tu umpetayanni nasang tau untu’gunni tu apa maindan.

³³Iatu pa’rapuanna Mahli sia Musi naala bilanganna Merari.

³⁴Iatu mangkanna diia’ situru’ bilanganna mintu’ muane randuk dio mai to sisangbulan sia la’bi, den annan sa’bunna nduaratu’.

³⁵Na iatu pekaamberanna mintu’ pa’rapuan to Merari disanga Zuriel, anakna Abihail. Tau iato mai ma’tenda sipeupu’ kema rampe daanna lu.

³⁶Iatu to Merari dipatu’gunni papan kema, pesa’pi’na, lentongna, lette’na mintu’ pareananna sia mintu’ apa sipatu dikarang dio,

³⁷sia iatu lentong dio tarampak tiku lao, sia iatu lette’na, tangki’na sia ulangna.

³⁸Iatu to la ma’tenda dio tingayona kema dio rampe matallo, dio tingayona Tenda Kasitammuan rampe dio kabu’tuan allo, iamotu Musa sola Harun sia anakna, tu untu’gun inan maindan ussonda to Israel; apa minda-minda tu tang sipatu urreke’ inan maindan, manassa la mate dipongko.

³⁹Iatu mangkanna diia’ situru’ bilanganna mintu’ muane randuk to sisangbulan sia la’bi, den duangpulo ndua sa’bu.

⁴⁰Ma’kadami tu PUANG lako Musa, Nakua: Ia’i tu mintu’ muane pa’bunga’na to Israel randuk dio mai to sisangbulan sia la’bi, sia patamai sura’ tu bilanganna sanganna tau iato.

⁴¹Sia la mualanNa’ tu to Lewi, la ussonda mintu’ pa’bunga’na to Israel — Akumo tu PUANG — sia ia duka tu patuoanna to Lewi la ussonda mintu’ anak bunga’na patuoanna to Israel.

⁴²Naia’mi Musa, susitu Napasananni PUANG, tu mintu’ pa’bunga’na to Israel.

⁴³Iatu mintu’ muane pa’bunga’ situru’ bilangan sanganna, randuk dio mai to sisangbulan sia la’bi, iatonna diia’mo manassamo duangpulo ndua sa’bu nduaratu’ mpitungpulo ntallu.

⁴⁴Ma’kadami tu PUANG lako Musa, Nakua:

⁴⁵Alami tu to Lewi ussonda mintu’ anak pa’bunga’na to Israel, susi duka tu patuoanna to Lewi ussonda patuoanna, kumua na iatu to Lewi mendadi taungKu: Akumo tu PUANG.

⁴⁶Iatu doi’ pangla’bakna duaratu’ pitungpulo ntallu anak pa’bunga’na to Israel, tu losong na bilanganna to Lewi,

⁴⁷iatu doi’ pangla’bak iato la muala silima sikele’ ke misa’oi tau, situru’ sikele’ maindan;[1] iatu sikele’ iato duangpulo gera.[2]

⁴⁸Na iatu doi’ iato la mupa’bengan lako Harun sia lako anakna, dipangla’bakan tu tau losong na bilanganna to Lewi.

⁴⁹Naalami Musa tu doi’ pangla’bakna tu tau losong na bilanganna tu to nala’bak to Lewi.

⁵⁰Naalami tu doi’ iato dio mai anak pa’bunga’na to Israel, sangsa’bu ntalluratu’ annan pulona llima sikele’, situru’ sikele’ maindan.

⁵¹Napa’benganmi Musa tu doi’ pangla’bak iato lako Harun sia lako anakna unturu’ parentaNa PUANG, susitu mangka Napepasanan PUANG lako Musa.