Read Toraja-Sa'dan KADIBILANGAN 30 Bible Online

KADIBILANGAN 30 - Toraja-Sa'dan bible

KADIBILANGAN 30

¹Ma’kadami tu Musa lako pangulunna suku to Israel nakua: Inde sia tu kada mangka Napepasanan PUANG.

²Iake den misa’ muane mangallonan lako PUANG, ba’tu umpalao sumpa la umpassan misa’ tanggungan, tae’ na la tang umpopembuai tu kada; mintu’ tu apa sun dipudukna la napopembua.

³Apa iake den misa’ baine mangallonan lako PUANG sia umpassan misa’ tanggungan lan banuanna ambe’na, tonna mangurapa,

⁴sia narangimo ambe’na tu pangallonanna sia iatu tanggungan napassan, apa napa’loko-lokoi ambe’na tu baine iato, manassa iatu mintu’ pangallonanna la dadi sia mintu’ tanggungan napassan la dadi.

⁵Iake tang napasituru’i ambe’na, tonna rangii, manassa tae’ na la dadi tu mintu’ pangallonan sia mintu’ tanggungan napassan; la Napagarri’ PUANG tu iannato, belanna tang napasituru’ ambe’na.

⁶Iake to kemuane, anna tontong bangsia umpassan pangallonanna ba’tu tanggunganna, tu naallu’, tu tae’ natangnga’ meloi,

⁷anna rangi muanena, apa napa’loko-lokoi bang tonna rangimi, manassa la dadi tu pangallonanna sia mintu’ tanggungan napassan la dadi duka.

⁸Apa iatonna rangimi muanena sia tang napasituru’, anna dampai tu pangallonan natanggung sia iatu tanggungan napassan, tu tang natangnga’ melo; la Napagarri’ PUANG tu iannato.

⁹Apa iatu pangallonanna baine balu ba’tu baine mangka ditantang, iatu mintu’ tanggungan napassan, la dadi lako kalena.

¹⁰Sia iake mangallonanni lan banuanna muanena ba’tu umpalao sumpa la umpassan misa’ tanggungan,

¹¹sia narangi muanena, apa napa’loko-lokoi bang sia tae’ nama’kada kumua tang napasituru’, manassa la dadi mintu’ pangallonanna sia mintu’ tanggungan tu napassan la dadi.

¹²Apa iake nadampa tonganni muanena, ke narangii manassa tae’ misa’ apa tu tassu’ dio pudukna, tu pangallonanna sia iatu tanggunganna la dadi; nadampamo muanena, sia la Napagarri’ PUANG tu iannato.

¹³Mintu’ pangallonan sia mintu’ tanggungan napalaoan sumpa la umpamadiong kalena, ma’din la napadadi muanena sia ma’din la nadampa muanena.

¹⁴Iake napa’loko-lokoi muanena kiallo-kiallo, manassa napadadi tu mintu’ pangallonanna ba’tu tanggungan napassan; napadadi, belanna napa’loko-lokoi, ke narangimi.

¹⁵Apa iake nadampa tonganni, tonna rangimi, manassa la natanggung tu kakadakeanna.

¹⁶Iamote tu mintu’ aluk dipondok, tu Napepasanan PUANG lako Musa diona kakuasanna misa’ muane lako bainena sia kakuasanna misa’ ambe’ lako anakna baine, ke mangurapi, tu torro lan banuanna ambe’na.