Read Toraja-Sa'dan KADIBILANGAN 33 Bible Online

KADIBILANGAN 33 - Toraja-Sa'dan bible

KADIBILANGAN 33

¹Inde sia tu inan kapelayoanna to Israel, tonna ke’de’mo lan mai tondok Mesir situru’ tuntunan surodadunna, panglalananna Musa sola Harun.

²Belanna nasura’ Musa tu kalingkanna tau iato dio mai inan kapelayoanna sae lako inan kapelayoanna pole’o, situru’ parentaNa PUANG; inde sia tu inan kapelayoanna lan kalingkanna:

³Ke’de’mi tu tau iato dio mai Rameses tonna bulan bunga’na, allo ma’pessangpulo limanna bulan bunga’; iamotu sangallo lendu’na na allo Pa’pasa natassu’ tu to Israel tete dio lima makuasa dio pentirona mintu’ to Mesir,

⁴tonna marassan tu to Mesir ullamun mintu’ to Nasanggang PUANG, iamotu mai anak pa’bunga’na, belanna PUANG umparampoi ukungan tu mai deatanna.

⁵Ke’de’mi tu to Israel dio mai Rameses, nama’tenda dio Sukot.

⁶Nake’de’ dio mai Sukot, nama’tenda dio Etam, dio randan padang pangallaran.

⁷Ke’de’mi dio mai Etam anna sule lako Pi-Hahirot, tu sitingoan Baal-Zefon, anna ma’tenda sitingoan Migdol.

⁸Nake’de’ dio mai Pi-Hahirot, anna male ullamban tasik lako padang pangallaran; anna male tu tau iato lan kalingkan tallung allo ullendu’i padang pangallaran, anna ma’tenda dio Mara.

⁹Nake’de’ dio mai Mara, nasae lako Elim; dio Elim nanii tu sangpulo dua kalimbuang sia kayu koroma pitungpulo, anna ma’tenda dio.

¹⁰Ke’de’ dio mai Elim ma’tenda dio randananna tasik Teberau.

¹¹Nake’de’ dio mai tasik Teberau, anna ma’tenda dio padang pangallaran Sin.

¹²Nake’de’ dio mai padang pangallaran Sin, anna ma’tenda dio Dofka.

¹³Nake’de’ dio mai Dofka, anna ma’tenda dio Alus.

¹⁴Nake’de’ dio mai Alus, anna ma’tenda dio Rafidim, tu inan tang nanii bangsa iato unniru’ uai.

¹⁵Nake’de’ dio mai Rafidim, anna ma’tenda lan padang pangallaran Sinai.

¹⁶Nake’de’ dio mai padang pangallaran Sinai, anna ma’tenda dio Kibrot-Taawa.

¹⁷Nake’de’ dio mai Kibrot-Taawa, anna ma’tenda dio Hazerot.

¹⁸Nake’de’ dio mai Hazerot, anna ma’tenda dio Ritma.

¹⁹Nake’de’ dio mai Ritma, anna ma’tenda dio Rimon-Peros.

²⁰Nake’de’ dio mai Rimon-Peros, anna ma’tenda dio Libna.

²¹Nake’de’ dio mai Libna, anna ma’tenda dio Risa.

²²Nake’de’ dio mai Risa, anna ma’tenda dio Kehelata.

²³Nake’de’ dio mai Kehelata, anna ma’tenda dio Har-Syafer.

²⁴Nake’de’ dio mai Har-Syafer, anna ma’tenda dio Harada.

²⁵Nake’de’ dio mai Harada, anna ma’tenda dio Makhelot.

²⁶Nake’de’ dio mai Makhelot, anna ma’tenda dio Tahat.

²⁷Nake’de’ dio mai Tahat, anna ma’tenda dio Tarah.

²⁸Nake’de’ dio mai Tarah, anna ma’tenda dio Mitka.

²⁹Nake’de’ dio mai Mitka, anna ma’tenda dio Hasmona.

³⁰Nake’de’ dio mai Hasmona, anna ma’tenda dio Moserot.

³¹Nake’de’ dio mai Moserot, anna ma’tenda dio Bene-Yaakan.

³²Nake’de’ dio mai Bene-Yaakan, anna ma’tenda dio Hor-Gidgad.

³³Nake’de’ dio mai Hor-Gidgad, anna ma’tenda dio Yotbata.

³⁴Nake’de’ dio mai Yotbata, anna ma’tenda dio Abrona.

³⁵Nake’de’ dio mai Abrona, anna ma’tenda dio Ezion-Geber.

³⁶Nake’de’ dio mai Ezion-Geber, anna ma’tenda dio padang pangallaran Zin, iamotu Kadesh.

³⁷Nake’de’ dio mai Kadesh, anna ma’tenda dio buntu Hor, dio passaparanna tondok Edom.

³⁸Attu iato kendekmi tu to minaa Harun langngan buntu Hor unturu’ parentaNa PUANG anna mate dao, tonna taun ma’patangpulona to Israel tassu’ dio mai tondok Mesir, lan bulan ma’pellima, tonna bunga’na bulan iato.

³⁹Iatu Harun saratu’mo duangpulo ntallu taunna, tonna mate dao buntu Hor.

⁴⁰Attu iato narangimi to Kanaan, iamotu datu Arad, tu umpa’tondokki Padang lo’na lu lan tondok Kanaan, kumua la rampomo tu to Israel.

⁴¹Ke’de’ pole’omi tu tau iato mai dao mai buntu Hor, anna ma’tenda dio Zalmona.

⁴²Ke’de’mi dio mai Zalmona, anna ma’tenda dio Funon.

⁴³Ke’de’mi dio mai Funon, anna ma’tenda dio Obot.

⁴⁴Ke’de’mi dio mai Obot, anna ma’tenda dio Abarim, tu tondok daun lauanmo lan lili’na Moab.

⁴⁵Ke’de’mi dio mai padang daun lauanmo, anna ma’tenda dio Dibon-Gad.

⁴⁶Ke’de’mi dio mai Dibon-Gad, anna ma’tenda dio Almon-Diblataim.

⁴⁷Ke’de’mi dio mai Almon-Diblataim, anna ma’tenda lan ma’buntunna Abarim sitingoan Nebo.

⁴⁸Ke’de’mi dio mai ma’buntunna Abarim, anna ma’tenda dio pa’padanganna Moab dio biring Yordan sambalinna lu Yerikho.

⁴⁹Ma’tendami sipeupu’ biring Yordan randuk dio mai Bet-Yesimot sae lako Abel-Sitim dio pa’padanganna Moab.

⁵⁰Ma’kadami tu PUANG lako Musa lan pa’padanganna Moab dio biring Yordan sambalinna lu Yerikho, nakua:

⁵¹Ma’kadako lako to Israel sia kuanni kumua: Iake ullambanmokomi Yordan ma’palulako tondok Kanaan,

⁵²manassa la miula’i tu mintu’ to ma’tondok dio tingayomi sia la misanggang tu mintu’ panggaraga dipa’na tu dipa’deatai; sia ia duka tu mintu’ rapang-rapang dipodeata dipati’no’na la misanggang sia mintu’ inan madaona la misabu’i.

⁵³La miala tu tondok iato ammi poapai, sia minii ma’tondok, belanna mangkamo Kupa’bengan lako kalemi la mipotaa.

⁵⁴Na tondok iato pada la mipamanassa situru’ pa’loterei tu mipotaa mana’ unturu’ pa’rapuammi, iamotu ianna pa’rapuan makamban la mipakapua tu taa mana’na, ianna pa’rapuan tang makamban la mipasidi’ tu taa mana’na. Iatu apa dipamanassan tau iato tete dio pa’loterei, manassa pada la napoapamo; situru’ tu suku nene’mi pada la mipamanassammo tu taa mana’na.

⁵⁵Apa iake tae’i miula’i tu to ma’tondok dio tingayomi, la susito duri lan matammi sia la susi apa patossok dio la’pekmi, anna pakario-riokomi lan tondok, tu minii ma’tondok.

⁵⁶Manassa la Kupogaurangkomi, susitu mangka Kutangnga’ la umpogau’i lako tau iato.