Read Toraja-Sa'dan KADIBILANGAN 34 Bible Online

KADIBILANGAN 34 - Toraja-Sa'dan bible

KADIBILANGAN 34

¹Ma’kadami tu PUANG lako Musa Nakua:

²Mesuako lako to Israel sia ma’kadako lako kumua: Iake rampomokomi tama tondok Kanaan, iamote tu tondok la mipotaa mana’, iamotu tondok Kanaan situru’ passaparanna.

³Iatu tampak rampe lo’na lu la randuk dio mai padang pangallaran Zin sipeupu’ Edom sia passaparanna padangmi rampe lo’na lu la randuk dio mai tampak tasik Ma’sin rampe matallo.

⁴Anna tibangko tu passaparanna randuk dio mai rampe lo’na lu ma’palulako sapa’ Te’tek buku,[13] tarru’ lako Zin sia iatu tampakna la rampe sau’ Kadesh-Barnea, natarru’ lako Hazar-Adar sia tarru’ lako Azmon.

⁵Na passaparan dio mai Azmon la tibangko lu lako salu’-salu’ Mesir, na iatu tampakna la rampo lako tasik.

⁶Sia iatu passaparan padangmi dio rampe matampu’ iamotu tasik kapua sia biring tasik; iamote tu passaparammi dio rampe matampu’.

⁷Inde sia tu passaparan padangmi rampe daanna lu, iamotu randuk dio mai tasik kapua la mipamanassa tu gorri’na lu lako buntu Hor.

⁸Dio mai buntu Hor la mipamanassa tu gorri’na sae lako lalan lu lako Hamat, na iatu tampak passaparanna la dio Zedad.

⁹La tarru’ tu passaparan lako Zifron, na iatu tampakna la dio Hazar-Enan; iamote tu passaparan padangmi rampe daanna lu.

¹⁰Na iatu passaparan dio rampe matallo la mipamanassa tu anggenna randuk dio mai Hazar-Enan lu lako Sefam.

¹¹Na dio mai Sefam, iatu passaparanna la lu rokko Ribla, rampe matallona Ain; namane passaparan iato lu rokko sia sipeupu’ tasik Kineret dio rampe matallo.

¹²Napassaparan iato lu rokko Yordan sia iatu tampakna iamotu tasik Ma’sin, iamote tu anggenna padangmi situru’ passaparanna tiku lao.

¹³Mepasanmi tu Musa lako to Israel nakua: Iamote tu tondok la pantan mipamanassa tu taa mana’na tete dio pa’loterei, tu Napepasanammo PUANG.

¹⁴Belanna iatu suku Ruben sia iatu suku Gad mangkamo untarima taa mana’na situru’ rapunna; susi duka tu sangsese suku Manasye mangkamo untarima taa mana’na.

¹⁵Da’dua ssangsese tu suku mangkamo untarima taa mana’na sambalinna lu Yordan sitingoan Yerikho lan rampe matallo, dio kadellekan allo.

¹⁶Ma’kadami tu PUANG lako Musa Nakua:

¹⁷Inde sia tu sanganna tu to la umpamanassangko tu tondok la dipotaa mana’, iamotu to minaa Eleazar na Yosua, anakna Nun.

¹⁸Sia la miala simisa’ arung dio mai simisa’-misa’ suku, kumua natau iato umpamanassai tu tondok la dipotaa mana’.

¹⁹Inde sia tu sanganna tu tau iato, iamotu Kaleb, anakna Yefune, umpamanassanni tu suku Yehuda,

²⁰Samuel, anakna Amihud, umpamanassanni, tu suku to Simeon.

²¹Elidad, anakna Kislon, umpamanassanni tu suku Benyamin.

²²Buki, anakna Yogli, iamotu misa’ arung, umpamanassanni tu suku to Dan.

²³Iatu bati’na Yusuf, Haniel, anakna Efod, iamotu misa’ arung, umpamanassanni tu suku to Manasye,

²⁴na Kemuel, anakna Siftan, iamotu misa’ arung, umpamanassanni tu suku to Efraim;

²⁵Elisafan, anakna Parnah, iamotu misa’ arung, umpamanassanni tu suku to Zebulon.

²⁶Paltiel, anakna Azan, iamotu misa’ arung, umpamanassanni tu suku to Isakhar;

²⁷Ahihud, anakna Selomi, iamotu misa’ arung, umpamanassanni tu suku to Asyer.

²⁸Pedael, anakna Amihud, iamotu misa’ arung, umpamanassanni tu suku to Naftali.

²⁹Iamote tu mintu’ to Napasan PUANG la umpamanassanni tu taa mana’na mintu’ to Israel lan tondok Kanaan.