Read Toraja-Sa'dan KADIBILANGAN 4 Bible Online

KADIBILANGAN 4 - Toraja-Sa'dan bible

KADIBILANGAN 4

¹Ma’kadami tu PUANG lako Musa sia lako Harun, Nakua:

²Alami tu bilanganna to Kehat dio lu to Lewi, situru’ pa’rapuanna sia rapunna,

³randuk dio mai tallungpulo taunna sia la’bi sae lako limangpulo taunna, iamotu pantan sipatu mengkarang la ungkarang pentoean lan Tenda Kasitammuan.

⁴Inde sia tu la natoe to Kehat lan Tenda Kasitammuan, iamotu la untu’gun mintu’ apa tarru’ maindan.

⁵Iake la ke’de’mi dio mai to’ tenda, iatu Harun sola anakna la tama inan maindan, anna popengkalaoi tu kulambu pererung, anna samboi tu patti kasa’bian.

⁶Namane ussamboi kuli’ taka’, namane ussamboi sampin lango-lango massang, sia napalakoi kayu pebulle.

⁷La nasamboi duka sampin lango-lango tu meda nanii roti dipennoloan, napatorroi dao piring, dolong-dolong, balubu sia sere’ dipa’bolloan; sia roti dipatontong bang, la torro dao.

⁸Mangkato namane unnampa’i sampin karamisi, sia nasamboi kuli’ taka’, sia napalakoi kayu pebulle.

⁹Sia la naala tu sampin lango-lango, anna samboi tu tongkonan palita tu dipadukku sola palitanna, pesipi’na, inan pa’pa’deanna sia mintu’ pa’minnakanna, tu dipake dio pengkarang iato.

¹⁰Iatu tongkonan palita sola mintu’ pareananna napatorro dao kuli’ taka’, namane umpadaoi bullean.

¹¹Iatu inan pemalaran bulaan la naampa’i sampin lango-lango, namane ussamboi kuli’ taka’, sia napalakoi kayu pebulle.

¹²Mangkato la naala tu mintu’ pareanan kamenomban tu dipake menomba lan inan maindan, anna padaoi sampin lango-lango sia nasamboi kuli’ taka’, sia napadao bullean.

¹³Napa’dii tu au dao tu inan pemalaran namane unnampa’i sampin lango-lango makaseda,

¹⁴sia la napadao tu mintu’ pareananna, tu dipake lan pentoean iato, iamotu mai peroyan, petossok, pesodok, inan pa’pi’pikan, sia mintu’ pareananna inan pemalaran, anna ampa’i kuli’ taka’ sia napalakoi kayu pebulle.

¹⁵Iake la ke’de’mi tu tau dio mai to’ tenda sia iake mangkami tu Harun sola anakna ussamboi tu apa maindan sia mintu’ pareanan maindan, namane tama tu to Kehat la umbullei; apa da’ narumbui tu apa maindan iato, kumua da’ namate tu tau iato. Iate pareananna Tenda Kasitammuan sipatu nabulle to Kehat.

¹⁶Iatu Eleazar, anakna to minaa Harun la untu’gun minna’ dipatama inan palita, dupa busarungngu’, kande dipemalaran kiallo-kiallo sola minna’ dipa’tokkoan; la natu’gun nasang tu mintu’ kema sia mintu’ apa lan, la apa maindan la iatu pareananna.

¹⁷Ma’kadami tu PUANG lako Musa sia Harun, Nakua:

¹⁸Kanandai tonganni tu suku pa’rapuanna Kehat, da nadisabu’i dio mai to Lewi.

¹⁹Apa la mipogau’ te iannate lako tau iato mai, kumua anna marendeng, da’ namate, ke la urreke’i tu apa tarru’ maindan. La tama tu Harun sola anakna umpadulluanni inan, la nanii sipatu pantan mengkarang ba’tu mamulle.

²⁰Apa da’ natama tu tau iato mai, naurungan untiroi tu apa maindan, moi sattu’ri, belanna manassa la mate.

²¹Ma’kadami tu PUANG lako Musa, Nakua:

²²Alami tu bilanganna to Gerson situru’ tu mai rapunna sia pa’rapuanna,

²³randuk dio mai tallungpulo taunna sia la’bi sae lako limangpulo taunna, la muia’, iamotu pantan sipatu mengkarang la ungkarang pentoean lan Tenda Kasitammuan.

²⁴Iamote tu pentoeanna pa’rapuanna to Gerson, tu sipatu la natoe sia la nabulle.

²⁵La nabulle tu mintu’ tenda pererungna kema sia iatu Tenda Kasitammuan sia iatu pesambona sia iatu pesambo kuli’ taka’, ussamboi dao mai sia iatu kulambu dio to’ ba’ba Tenda Kasitammuan,

²⁶sampin pererungna tarampak sia kulambu babangan tama tarampak, tu untikui kema sia inan pemalaran, situang ulangna sia mintu’ pareanan kamenomban; sia mintu’ tu apa dipake dio, la natoe nasang tau iato.

²⁷Situru’ parentana Harun sia anakna la natoe to Gerson tu mintu’ pentoeanna, tu mintu’ la nabullena sia mintu’ la natoena; la mipatiroan nasang tu apa dipatanggunganni, iamotu mai apa la nabulle.

²⁸Iamote tu pentoeanna pa’rapuanna to Gerson dio Tenda Kasitammuan sia iatu apa sipatu natoe tau iato mai, napenniroi Itamar, anakna to minaa Harun.

²⁹Iatu mai to Merari la muia’ situru’ pa’rapuanna sia rapunna,

³⁰randuk dio mai tallungpulo taunna sia la’bi sae lako limangpulo taunna, la muia’, iamotu pantan sipatu mengkarang la ungkarang pentoean, dio Tenda Kasitammuan.

³¹Iamote tu sipatu la natoe tu apa dibulle, tu mintu’ pentoeanna dio Tenda Kasitammuan, iamotu mai papanna kema, pesa’pi’na, lentongna, sia lette’na,

³²iatu lentongna tarampak tiku lao situang lette’, petangki’ sia ulang, mintu’ tu pareananna sia mintu’ apa dipogau’ dio. La misangai tu mintu’ pareanan, tu sipatu nabulle.

³³Iamote tu pentoeanna pa’rapuanna to Merari situru’ mintu’ pentoean dio Tenda Kasitammuan tu napenniroi Itamar, anakna to minaa Harun.

³⁴Naia’mi Musa sola Harun sola pangulu kasirampunan to Kehat situru’ pa’rapuanna sia rapunna,

³⁵randuk dio mai tallungpulo taunna sia la’bi sae lako limangpulo taunna, iamotu pantan sipatu mengkarang la ungkarang pentoean dio Tenda Kasitammuan.

³⁶Iatu mangkanna diia’ situru’ pa’rapuanna, den duangsa’bu pituratu’ llimangpulo.

³⁷Iamote tu mintu’ to diia’ dio mai pa’rapuanna to Kehat, iamotu mintu’ to untoe pentoean dio Tenda Kasitammuan, tu mangka naia’ Musa sola Harun unturu’ parentana PUANG tu nalopian Musa.

³⁸Iatu mangkanna diia’ dio mai to Gerson situru’ pa’rapuanna sia rapunna,

³⁹randuk dio mai tallungpulo taunna sia la’bi sae lako limangpulo taunna, iamotu pantan sipatu mengkarang la ungkarang pentoean dio Tenda Kasitammuan,

⁴⁰iatu mintu’ mangkanna diia’ situru’ pa’rapuanna sia rapunna, den duangsa’bu annan ratu’ ntallungpulo.

⁴¹Iamote tu mintu’ to diia’ dio mai pa’rapuanna to Gerson, iamotu mintu’ to untoe pentoean dio Tenda Kasitammuan, tu mangka naia’ Musa sola Harun unturu’ parentaNa PUANG.

⁴²Iatu mangkanna diia’ dio mai pa’rapuanna to Merari situru’ pa’rapuanna sia rapunna,

⁴³randuk dio mai tallungpulo taunna sia la’bi sae lako limangpulo taunna, iamotu pantan sipatu mengkarang la ungkarang pentoean dio Tenda Kasitammuan,

⁴⁴iatu mintu’ mangkanna diia’ situru’ pa’rapuanna, den tallungsa’bu nduaratu’.

⁴⁵Iamote tu mintu’ to diia’ dio mai pa’rapuanna to Merari, tu naia’ Musa sola Harun unturu’ parentaNa PUANG nalopian Musa.

⁴⁶Iatu mintu’ mangkanna diia’, tu mangka naia’ Musa sola Harun sola pangulunna to Israel situru’ pa’rapuanna sia rapunna, iamotu to Lewi,

⁴⁷randuk dio mai tallungpulo taunna sia la’bi sae lako limangpulo taunna, iamotu pantan sipatu mengkarang la mentoe sia la mamulle dio Tenda Kasitammuan,

⁴⁸iatu mintu’ mangkanna diia’, den karua sa’bunna limaratu’ ngkarua pulona.

⁴⁹Situru’ tu parentaNa PUANG tu nalopian Musa pantan dipasan tu tau apa tu la natoe sia la nabulle, iamotu to mangka diia’, susitu Napepasanan PUANG lako Musa.