Read Toraja-Sa'dan KADIBILANGAN 6 Bible Online

KADIBILANGAN 6 - Toraja-Sa'dan bible

KADIBILANGAN 6

¹Ma’kadami tu PUANG lako Musa, Nakua:

²Ma’kadako lako to Israel sia kuanni kumua: Iake den misa’ tau, muane ba’tu baine, mangallonan ma’iringanna, iamotu mangallonan la dadi nasirinNa Puang Matua, la umpamarimbangan kalena lako PUANG,

³manassa la untoyangan kalena dio mai uai anggoro’ sia pangiru’ mepamalango, sia da’ nairu’i tu uai anggoro’ messu’mo ba’tu pangiru’ mepamalango tu messu’mo, sia da’ nairu’i moi misa’ pangiru’ dio mai bua anggoro’ sia da’ nakandei tu bua anggoro’ la tang marangkena la marangkena.

⁴Lan mintu’ attu nanii nasirinNa Puang Matua da’ nakandei tu misa’ apa dio mai garonto’ anggoro’ randuk dio mai lise’na sae lako taru’-taru’na.

⁵Lan mintu’ attu nanii mangallonan nasirinNa Puang Matua, tae’ na la urrampoi piso peku’ku’ tu ulunna; sae lako ganna’na tu allo nanii umpamarimbangan kalena lako PUANG, la masero sia la naeloran bang tu beluakna tuo.

⁶Lan mintu’ attu nanii umpamarimbangan kalena lako PUANG, da’ nareke’i tu to mate.

⁷Da’ naruttakki kalena, ke untoei batang rabukna ambe’na ba’tu indo’na, ba’tu siulu’na muane ba’tu siulu’na baine, belanna iatu tanda nasirinNa Puang Matua dao ulunna.

⁸Lan mintu’ attu nanii nasirinNa Puang Matua, la masero dio oloNa PUANG.

⁹Apa iake den misa’ tau mate tang dikapang-kapang dio sa’dena, anna ruttakki tu beluakna, tanda nasirinNa Puang Matua, la naku’ku’i tu ulunna, ke allo kadipamaseroanna, ke allo ma’pempitu la nanii ungku’ku’i.

¹⁰Ianna allo ma’pengkarua la nabaa tu da’dua bu’ku’ ba’tu da’dua anak dangan-dangan lako to minaa dio to’ ba’ba Tenda Kasitammuan.

¹¹La napemalaran to minaa tu misa’ diposuru’ pengkalossoran na iatu senga’na la dipopemala’ ditunu pu’pu’, anna padenanni kadiseroian kasalan, belanna kasalan untoe batang rabuk, anna allo ia dukato la nanii umpamasero ulunna.

¹²Anna pamarimbanganan polei PUANG tu attu nasirinNa Puang Matua, anna pennoloanni tu misa’ domba sangtaunmo la diposuru’ pangakuan sala; iatu attu dolo tang la dibilangmo, belanna iatu Kanasirinna maruttakmo.

¹³Inde sia tu atoran diona nasirinNa Puang Matua, Iake ganna’mi tu allo nanii kanasirianna, manassa la disolan lako to’ ba’ba Tenda Kasitammuan,

¹⁴sia la napennoloan lako PUANG tu pemala’na, iamotu misa’ domba sangtaunmo tu tang tattan la dipopemala’ ditunu pu’pu’ sia misa’ domba birang sangtaunmo tu tang tattan la diposuru’ pengkalossoran sia misa’ domba laki tu tang tattan la dipopemala’ kasalamaran,

¹⁵sola misa’ baka nanii roti tang diragii, tu ta’pung manisak digaraga, sia pa’ranggina dipasigerok minna’ sia roti manipi’ tang diragii, tu disapu’ minna’ sola kande dipemalaran tu tontong dipasisola sia iatu pemala’ pantedok dipasisolanni.

¹⁶La napennoloan to minaa tu iannato dio oloNa PUANG, anna pemalaranni tu suru’ pengkalossoranna sia pemala’ ditunu pu’pu’na.

¹⁷Mangkato la napemalaran tu domba laki dipopemala’ kasalamaran lako PUANG sisola tu baka nanii roti tang diragii; la napemalaran duka to minaa tu kande dipemalaran tu tontong dipasisola sia iatu pemala’ pantedok dipasisolanni.

¹⁸Naku’ku’imi to nasirinNa Puang Matua tu beluak tanda nasirinNa Puang Matua dio tingngo ba’ba Tenda Kasitammuan, anna alai tu beluak tanda nasirinNa Puang Matua, nabuangi tama to’ api, diongna lu pemala’ kasalamaran.

¹⁹La naala to minaa tu sepak dolona domba laki iato, tu mangka ditollo’ sia misa’ deppa tang diragii lan mai baka, sia misa’ deppa manipi’ tang diragii, anna parokkoi pala’na to nasirinNa Puang Matua, ke mangkami naku’ku’i tu beluak tanda nasirinNa Puang Matua.

²⁰Mangkato la nasorong natarima sule to minaa te ianna te dio oloNa PUANG susi pemala’ disorong ditarima sule; iamote tu maserona napotaa to minaa sola tu dada disorong ditarima sule sia pesesena tu dipamarimbangan. Mangkato namane ma’din unniru’ uai anggoro’ tu to nasirinNa Puang Matua.

²¹Iamote tu atoranna to nasirinNa Puang Matua. Iatu apa napopangallonan la napemalaran lako PUANG tete dio nasirinNa Puang Matua, senga’pi tu ma’din napemalaran la’bi, la napogau’. La napogau’ tu iannato, susitu allu’na unturu’ atoranna nasirinNa Puang Matua.

²²Ma’kadami tu PUANG lako Musa, Nakua:

²³Ma’kadako lako Harun sia lako anakna, mukua: Susimote tu kada la mipassakkean to Israel:

²⁴Na PUANGmora umpamasakkekomi sia ungkatirinnaikomi;

²⁵na PUANGmora umpaarrangikomi lindoNa sia ungkaturu-turuikomi;

²⁶na PUANGmora umpatiroangkomi lindo masokanNa sia umpasiriakomi kamarampasan.

²⁷Susimoto iatu sangangKu la napatorro dio lu to Israel, angKu pamasakkei tu tau iato mai.