Read Toraja-Sa'dan KADIBILANGAN 7 Bible Online

KADIBILANGAN 7 - Toraja-Sa'dan bible

KADIBILANGAN 7

¹Iatonna mangkamo tu Musa umpabendan kema, allo ia dukato naminnakki sia napamaindan sola mintu’ pareananna. Naminnakki sia napamaindan tu pareanan iato.

²Mangkato nabaami arungna to Israel tu pemala’na, iamotu pangulu rapunna; tau iato mai arungna suku, iamotu pangulunna tau dibilang.

³Iatu tau iato mai umpennoloan pamengan pemala’na dio olona PUANG, iamotu annan kareta tu ditendai sia sapi sangpulo dua; da’dua arung namisa’o kareta, simisa’ arung nasimisa’o sapi; anna baai dio tingo kema.

⁴Ma’kadami tu PUANG lako Musa, Nakua:

⁵Tarima nasangmi te dio mai tau iato mai, anna dipake dio pentoean dio Kema Kasitammuan; sorongi lako to Lewi, pantan sitinaya pentoeanna.

⁶Natarimami Musa tu mintu’ kareta sia sapi iato anna sorongi lako to Lewi.

⁷Da’dua kareta sia a’pa’ sapi nasorong lako to Gerson sitinaya pentoeanna,

⁸sia a’pa’ kareta sia karua sapi nasorong lako to Merari, sitinaya pentoeanna, tu napoissan Itamar, anakna Harun, to minaa.

⁹Apa iatu Kehat moi misa’ tae’ apa nasoronganni, belanna tau iato mai dipatage’i pentoean mintu’ apa maindan tu napassan.

¹⁰Nabaa duka arung tu mai pamengan lako tu inan pemalaran dirara, tonna allo dinii umminnakki; nabaa arung tu pamengan pemala’na dio tingo inan pemalaran.

¹¹Ma’kadami tu PUANG lako Musa, Nakua: lan sangallo simisa’ arung la umbaa pamengan pemala’na lako inan pemalaran dirara.

¹²Iatu umbaa pamengan pemala’na tonna allo bunga’na, iamo Nahason, anakna Aminadab, lan mai suku Yehuda.

¹³Iatu pamengan pemala’na misa’ pindan salaka, saratu’ tallungpulo sikele’ timbanganna sia misa’ pindan pa’pi’pikan salaka pitungpulo sikele’ timbanganna, situru’ sikele’ maindan,[4] ponno dua ta’pung manisak, tu dipasigerok minna’, la dipokande dipemalaran;

¹⁴sia misa’ dolong-dolong bulaan sangpulo sikele’ timbanganna ponno dupa diong;

¹⁵sia misa’ anak sapi laki, misa’ domba laki sia misa’ domba sangtaunmo, dipopemala’ ditunu pu’pu’;

¹⁶sia bembe’ laki misa’ la diposuru’ pengkalossoran;

¹⁷sia da’dua sapi, lima domba laki sia lima bembe’ laki sia lima domba sangtaunmo dipopemala’ kasalamaran. Mintu’nate iamo pamengan pemala’na Nahason, anakna Aminadab.

¹⁸Iatonna allo ma’penduan Netaneel, anakna Zuar, arungna Isakhar, umbaa pamengan pemala’na.

¹⁹Iatu pamengan pemala’na nabaa, iamotu misa’ piring salaka saratu’ tallungpulo sikele’ timbanganna sia misa’ pindan pa’pi’pikan salaka pitungpulo sikele’ timbanganna, situru’ sikele’ maindan, ponno dua ta’pung manisak, tu dipasigerok minna’ la dipokande dipemalaran,

²⁰sia misa’ dolong-dolong bulaan sangpulo sikele’ timbanganna ponno dupa diong;

²¹sia misa’ anak sapi laki, misa’ domba laki sia misa’ domba sangtaunmo dipopemala’ ditunu pu’pu’;

²²sia bembe’ laki misa’ la diposuru’ pengkalossoran;

²³sia da’dua sapi, lima domba laki, lima bembe’ laki sia lima domba sangtaunmo dipopemala’ kasalamaran. Mintu’nate iamo pamengan pemala’na Netaneel, anakna Zuar.

²⁴Iatonna allo ma’pentallun arungna to Zebulon, disanga Eliab, anakna Helon.

²⁵Iatu pamengan pemala’na misa’ pindan salaka saratu’ tallungpulo sikele’ timbanganna sia misa’ pindan pa’pi’pikan salaka pitungpulo sikele’ timbanganna, situru’ sikele’ maindan, ponno dua ta’pung manisak, tu dipasigerok minna’, la dipokande dipemalaran,

²⁶sia misa’ dolong-dolong bulaan sangpulo sikele’ timbanganna ponno dupa diong;

²⁷sia misa’ anak sapi laki, misa’ domba laki sia misa’ domba sangtaunmo dipopemala’ ditunu pu’pu’;

²⁸sia bembe’ laki misa’ la diposuru’ pengkalossoran;

²⁹sia da’dua sapi, lima domba laki, lima bembe’ laki sia lima domba sangtaunmo dipopemala’ kasalamaran. Mintu’nate iamo pamengan pemala’na Eliab, anakna Helon.

³⁰Iatonna allo ma’penna’pa’ arungna to Ruben, disanga Elizur, anakna Syedeur.

³¹Iatu pamengan pemala’na misa’ pindan salaka saratu’ tallungpulo sikele’ timbanganna sia misa’ pindan pa’pi’pikan salaka pitungpulo sikele’ timbanganna, situru’ sikele’ maindan, ponno dua ta’pung manisak, tu dipasigerok minna’, la dipokande dipemalaran;

³²sia misa’ dolong-dolong bulaan sangpulo sikele’ timbanganna ponno dupa diong;

³³sia misa’ anak sapi laki, misa’ domba laki sia misa’ domba sangtaunmo dipopemala ditunu pu’pu’;

³⁴sia bembe’ laki la diposuru’ pengkalossoran;

³⁵sia da’dua sapi, lima domba laki, lima bembe’ laki sia lima domba sangtaunmo dipopemala’ kasalamaran. Mintu’nate iamo pamengan pemala’na Elizur, anakna Syedeur.

³⁶Iatonna allo ma’pellima arungna to Simeon, disanga Selumiel, anakna Zurisyadai.

³⁷Iatu pamengan pemala’na misa’ pindan salaka saratu’ tallungpulo sikele’ timbanganna sia misa’ pindan pa’pi’pikan salaka pitungpulo sikele’ timbanganna, situru’ sikele’ maindan, ponno dua ta’pung manisak, tu dipasigerok minna’, la dipokande dipemalaran;

³⁸sia misa’ dolong-dolong bulaan sangpulo sikele’ timbanganna ponno dupa diong;

³⁹sia misa’ anak sapi laki, misa’ domba laki sia misa’ domba sangtaunmo dipopemala’ ditunu pu’pu’;

⁴⁰sia bembe’ laki misa’ la diposuru’ pengkalossoran;

⁴¹sia da’dua sapi, lima domba laki, lima bembe’ laki sia lima domba sangtaunmo dipopemala’ kasalamaran. Mintu’nate iamo pamengan pemala’na Selumiel, anakna Zurisyadai.

⁴²Iatonna allo ma’pennannan arungna to Gad, disanga Elyasaf, anakna Rehuel.

⁴³Iatu pamengan pemala’na misa’ pindan salaka saratu’ tallungpulo sikele’ timbanganna sia misa’ pindan pa’pi’pikan salaka pitungpulo sikele’ timbanganna, situru’ sikele’ maindan, ponno dua ta’pung manisak, tu dipasigerok minna’, la dipokande dipemalaran;

⁴⁴sia misa’ dolong-dolong bulaan sangpulo sikele’ timbanganna ponno dupa diong;

⁴⁵sia misa’ anak sapi laki, misa’ domba laki sia misa’ domba sangtaunmo dipopemala’ ditunu pu’pu’;

⁴⁶sia bembe’ laki misa’ la diposuru’ pengkalossoran;

⁴⁷sia da’dua sapi, lima domba laki, lima bembe’ laki sia lima domba sangtaunmo dipopemala’ kasalamaran. Mintu’nate iamo pamengan pemala’na Elyasaf, anakna Rehuel.

⁴⁸Iatonna allo ma’pempitu arungna to Efraim, disanga Elisama, anakna Amihud.

⁴⁹Iatu pamengan pemala’na misa’ pindan salaka saratu’ tallungpulo sikele’ timbanganna sia misa’ pindan pa’pi’pikan salaka pitungpulo sikele’ timbanganna, situru’ sikele’ maindan, ponno dua ta’pung manisak tu dipasigerok minna’, la dipokande dipemalaran;

⁵⁰sia misa’ dolong-dolong bulaan sangpulo sikele’ timbanganna ponno dupa diong;

⁵¹sia misa’ anak sapi laki, misa’ domba laki sia misa’ domba sangtaunmo dipopemala’ ditunu pu’pu’;

⁵²sia bembe’ laki misa’ la diposuru’ pengkalossoran;

⁵³sia da’dua sapi, lima domba laki, lima bembe’ laki sia lima domba sangtaunmo, dipopemala’ kasalamaran. Mintu’nate iamo pamengan pemala’na Elisama, anakna Amihud.

⁵⁴Iatonna allo ma’pengkarua arungna to Manasye, disanga Gamaliel, anakna Pedazur.

⁵⁵Iatu pamengan pemala’na misa’ pindan salaka saratu’ tallungpulo sikele’ timbanganna sia misa’ pindan pa’pi’pikan salaka pitungpulo sikele’ timbanganna, situru’ sikele’ maindan, ponno dua ta’pung manisak, tu dipasigerok minna’, la dipokande dipemalaran;

⁵⁶sia misa’ dolong-dolong bulaan sangpulo sikele’ timbanganna ponno dupa diong;

⁵⁷sia misa’ anak sapi laki, misa’ domba laki sia misa’ domba sangtaunmo dipopemala’ ditunu pu’pu’;

⁵⁸sia bembe’ laki misa’ la diposuru’ pengkalossoran;

⁵⁹sia da’dua sapi, lima domba laki, lima bembe’ laki sia lima domba sangtaunmo, dipopemala’ kasalamaran. Mintu’nate iamo pamengan pemala’na Gamaliel, anakna Pedazur.

⁶⁰Iatonna allo ma’pengkasera arungna to Benyamin, disanga Abidan, anakna Gideoni.

⁶¹Iatu pamengan pemala’na misa’ pindan salaka saratu’ tallungpulo sikele’ timbanganna sia misa’ pindan pa’pi’pikan salaka pitungpulo sikele’ timbanganna, situru’ sikele’ maindan, ponno dua ta’pung manisak, tu dipasigerok minna’, la dipokande dipemalaran;

⁶²sia misa’ dolong-dolong bulaan sangpulo sikele’ timbanganna ponno dupa diong;

⁶³sia misa’ sapi laki, misa’ domba laki sia misa’ domba sangtaunmo dipopemala’ ditunu pu’pu’;

⁶⁴sia bembe’ laki misa’ la diposuru’ pengkalossoran;

⁶⁵sia da’dua sapi, lima domba laki, lima bembe’ laki sia lima domba sangtaunmo dipopemala’ kasalamaran. Mintu’nate iamo pamengan pemala’na Abidan, anak Gideoni.

⁶⁶Iatonna allo ma’pessangpulo arungna to Dan, disanga Ahiezer, anakna Amisyadai.

⁶⁷Iatu pamengan pemala’na misa’ pindan salaka saratu’ tallungpulo sikele’ timbanganna sia misa’ pindan pa’pi’pikan salaka pitungpulo sikele’ timbanganna, situru’ sikele’ maindan, ponno dua ta’pung manisak, tu dipasigerok minna’, la dipokande dipemalaran;

⁶⁸sia misa’ dolong-dolong bulaan sangpulo sikele’ timbanganna ponno dupa diong;

⁶⁹sia misa’ anak sapi laki, misa’ domba laki sia misa’ domba sangtaunmo dipopemala’ ditunu pu’pu’;

⁷⁰sia bembe’ laki misa’ la diposuru’ pengkalossoran;

⁷¹sia da’dua sapi, lima domba laki, lima bembe’ laki sia lima domba sangtaunmo dipopemala’ kasalamaran. Mintu’nate iamo pamengan pemala’na Ahiezer, anakna Amisyadai.

⁷²Iatonna allo ma’pessangpulomisa, arungna to Asyer, disanga Pagiel, anakna Okhran.

⁷³Iatu pamengan pemala’na misa’ pindan salaka saratu’ tallungpulo sikele’ timbanganna sia misa’ pindan pa’pi’pikan salaka pitungpulo sikele’ timbanganna, situru’ sikele’ maindan, ponno dua ta’pung manisak tu dipasigerok minna’, la dipokande dipemalaran;

⁷⁴sia misa’ dolong-dolong bulaan sangpulo sikele’ timbanganna ponno dupa diong;

⁷⁵sia misa’ anak sapi laki, misa’ domba laki sia misa’ domba sangtaunmo dipopemala’ ditunu pu’pu’;

⁷⁶sia bembe’ laki misa’ la diposuru’ pengkalossoran;

⁷⁷sia da’dua sapi, lima domba laki, lima bembe’ laki sia lima domba sangtaunmo dipopemala’ kasalamaran. Mintu’nate iamo pamengan pemala’na Pagiel, anakna Okhran.

⁷⁸Iatonna allo ma’pessangpulo dua arungna to Naftali, disanga Ahira, anakna Enan.

⁷⁹Iatu pamengan pemala’na misa’ pindan salaka saratu’ tallungpulo sikele’ timbanganna sia misa’ pindan pa’pi’pikan salaka pitungpulo sikele’ timbanganna’ situru’ sikele’ maindan, ponno dua ta’pung manisak, tu dipasigerok minna’, la dipokande dipemalaran;

⁸⁰sia misa’ dolong-dolong bulaan sangpulo sikele’ timbanganna ponno dupa diong;

⁸¹sia misa’ anak sapi laki, misa’ domba laki sia misa’ domba sangtaunmo dipopemala’ ditunu pu’pu’;

⁸²sia bembe’ laki misa’, la diposuru’ pengkalossoran;

⁸³sia da’dua sapi, lima domba laki, lima bembe’ laki sia lima domba sangtaunmo dipopemala’ kasalamaran. Mintu’nate iamo pamengan pemala’na Ahira, anakna Enan.

⁸⁴Iamote tu pamengan lako inan pemalaran dirara, tonna allo dinii umminnakki, tu nasorong arung Israel, iamotu sangpulo dua piring salaka, sangpulo dua pindan salaka pa’pi’pikan, sangpulo dua dolong-dolong bulaan.

⁸⁵Simisa’ pindan salaka saratu’ tallungpulo sikele’ timbanganna, na pitungpulo, ke simisa’ pindan pa’pi’pikan; iatu mintu’ salakana pareanan iato den duangsa’bu nna’pa’ratu’ sikele’ situru’ sikele’ maindan.

⁸⁶Sia sangpulo dua dolong-dolong bulaan ponno dupa diong; simisa’ dolong-dolong sangpulo sikele’ timbanganna, situru’ sikele’ maindan; iatu mintu’ bulaanna dolong-dolong iato saratu’ duangpulo sikele’.

⁸⁷Iatu mintu’ patuoan dipopemala’ ditunu pu’pu’ den sangpulo dua anak sapi laki, sangpulo dua domba laki, sangpulo dua domba sisangtaunmo sola kande dipemalaran, tu tontong dipasisola; sia ia dukapa tu sangpulo dua bembe’ laki la diposuru’ pengkalossoran.

⁸⁸Iatu mintu’ patuoan dipopemala’ kasalamaran den duangpulo nna’pa’ anak sapi laki, annan pulona domba laki, annan pulona bembe’ laki sia annan pulona domba sisangtaunmo. Mintu’nate pamengan lako inan pemalaran dirara, tonna mangka diminnakki.

⁸⁹Iake tamaomi Tenda Kasitammuan tu Musa la sipa’kada Puang, narangimi tu misa’ gamara, tu ma’kada lako kalena dao mai tutu’ pebase kasalan, tu dao patti kasa’bian, dio alla’na karubion. Susimoto tu Puang ma’kada lako kalena.