Read Toraja-Sa'dan MIKHA 1 Bible Online

MIKHA 1 - Toraja-Sa'dan bible

MIKHA 1

¹Inde sia tu kadanNa PUANG rampo lako Mikha, to Moresyet, tu natiro diona a’ganna Samaria sia Yerusalem, tonna linona Yotam, Ahas sia Hizkia, datunna Yehuda.

²Perangiimi, e mintu’ bangsa, tanannimi talinga, e lino sola mintu’ issinna, kumua Puangta PUANG la titanan sa’bi la umpasalakomi, iamotu Puang lan mai banua maindanNa.

³Belanna iatu PUANG manassa tassu’ lan mai inanNa, anNa mengkalao umpopentengka lentekNa dao lu mintu’ inan matande dao kuli’na padang.

⁴Lolong tu mai buntu diong to’ lentekNa Puang sia menganga tu mai lombok, susito lilin nakande api sia susito sarambu dao mai aa’.

⁵Mintu’nate bannang dio kapatodo-tintinganna Yakub sia kasalanna to Israel. Apara tu kapatodo-tintinganna Yakub? Tangiaraka tu Samaria? Sia apara tu kasalanna inan madaona Yehuda? Tangiaraka tu Yerusalem?

⁶Iamoto iatu Samaria la Kupadadi misa’ inan daun lauan dio padang sia misa’ inan la digaragai pa’lak anggoro’; la Kutuan tu mintu’ batunna rokko lombok sia la Kupasombo tu parandanganna.

⁷Sia mintu’ rapang-rapang dipodeata dipa’na la dipoka, sia pamenganna tu dipennoloan lako deata la diballa api, sia mintu’ rapang-rapang dipodeatanna la Kunisak-nisak, belanna iatu saro bu’tu lu dio mai pa’gau’ salana naallianni tu rapang-rapang dipodeata narampun, na iatu apa iato la dadi duka saro gau’ sala.

⁸Diona apa iato angku umbating sia sumarro, angku lumingka tang ma’sepatu sia ma’kambelang, sia melallak susi serigala sia kumarrak susi burung unta?

⁹Belanna iatu bangke malua’na tang dampi-dampiammo, belanna narua dukamo tu Yehuda sia nalambi’mo tu babanganna taungKu, sae lako Yerusalem.

¹⁰Da mipokadai tu apa iato dio Gat, da duka mitumangi’ dio! Pentombanganni tu kalemi diong to’ barra’-barra’ dio Afra.

¹¹Tarru’komi male, e to Safir, situang siri’ belanna kama’kambelangammi. Iatu to Zaanan tae’ nabarani tassu’. Iatu kaumbatingan dio Bet-Haezel undampakomi torro inde to dio.

¹²Belanna iatu to Marot ma’parondo mataku’ belanna kameloan, saba’ songlo’mo tu kasanggangan dao mai PUANG sae lako babangan Yerusalem.

¹³Papasangi kareta tu darang, e to Lakhis. Iamo tiparandukna kasalanna anak dara Sion, belanna lan kalemu dinii unnappa’i tu kapatodo-tintinganna Israel.

¹⁴Iamoto benni pamengan kasisarakan Moresyet-Gat. Iatu banuanna Akhzib dadimo misa’ salu’-salu’ ma’pakena lako datu Israel.

¹⁵La Kuparampoi pole’komi misa’ to patalo, e to Maresya; iatu kamala’biranna Israel la rampo lako Adulam.

¹⁶Galettungi sia ku’ku’i tu ulummu, belanna mintu’ tu anak pa’kaboro’mu; papada lua’i galepo’mu tu galepo’ dio langkan maega, belanna toyangmo male dipali’ tu tau iato mai dio mai kalemu.