Read Toraja-Sa'dan MIKHA 2 Bible Online

MIKHA 2 - Toraja-Sa'dan bible

MIKHA 2

¹Upu’ allona tu mintu’ to umparri-parri kakelokan sia untampa kakadakean dao inan katindoanna; iake masiangmi dio mai napalalomi, belanna nakulle limanna umpogau’i.

²Iake ungkamorai pa’lak tu tau iato mai, narampa, sia banua, naala. Susimoto tu tau iato mai umpakario-rio tau sia narampa tu banuanna sia umpakario-rio to ma’mana’ sia narampa tu mana’na.

³Iamoto, inde sia tu kadanNa PUANG, Nakua: Tonganna la Kupasae tu kasanggangan lako bangsa iate, tu tae’ minii umbelai urriu’ barokomi lan mai, ba’tu malolo lumingka lan, belanna iamo misa’ attu kadake.

⁴Allo iato la nasa’burangkomi tau misa’ parumbasan sia tumangi’ anna umbating, nakua tu tau: Sabu’mokan, masappimokan sanggang. Iatu taa mana’na bangsaku Nasorongmo Puang lako to senga’. Masang tongan tu apa naala Puang dio mai kaleku! Sia Nataa-taa Puang tu pa’lakki lako to umboko’i Puang.

⁵Iamoto moi misa’ tau tae’mo tu umbuangangko ulang pesuka’ unturu’ pa’loterei lan kombonganNa PUANG.

⁶Da mima’nubua’, nakua tau iato mai ma’nubua’ ungkuanni: tae’ nama’din tau ma’nubua’ diona apa iato. Tae’ bang upu’na tu kada ma’ta’tan.

⁷Ma’dinraka dipokada tu kada susito, e bati’na Yakub! Kondi’raka tu kama’tanan penaanNa PUANG, susiraka to tu penggauranNa? Tang masokanraka tu kadangKu lako to malolo gau’na?

⁸Apa masai allomo tu taungKu pabali-bali susi uali lako Kaleku; nalalakki tu bayu lamba’ lan mai bayunna to lendu’ malolo, iamotu to manoka massite’ge’.

⁹Mintu’ tu bainena taungKu mirambai lan mai banua karongkosanna, sia dio mai anakna mialai tu kamala’birangKu tontong sae lakona.

¹⁰Ke’de’komi mimale, belanna iate inan iate tangia inan kapelayoan; belanna maruttak te tondok iate, iamoto naumpaden katune, ondongpi misa’ katune ma’kasanggang tarru’.

¹¹Iake denni misa’ tau ma’kedo tang kebattuan sia ma’kada tang tongan, nakua: La kupa’nubuarangko tu diona uai anggoro’ sia pangiru’ palango — , iamoto tu nabinna bangsa iate.

¹²Tonganna la Kurampunkomi sola nasang, e Yakub, ondongpi la Kupulung tu to Israel, torronapa. Iatu tau iato mai la Kurampun butung domba lan misa’ bontong sia sangtinti misa’ tuntunan lan lu padang kariuan. Inde to dio la mamak bang belanna kabudanna tau.

¹³Iatu to undoloanni lumingka dolo dio tingayona solana; iatu tau iato mai ma’kakei, anna tarru’ unnolai babangan sia tassu’ inde to dio mai; iatu datunna tau iato mai lumingka undoloanni, anna PUANG umpangului.