Read Toraja-Sa'dan MIKHA 4 Bible Online

MIKHA 4 - Toraja-Sa'dan bible

MIKHA 4

¹Sia la dadi, ke allo ma’katampakannai, kumua iatu buntu banuanNa PUANG la bantang butung tu buntu malangka’na mintu’ buntu, sia la layuk untongloi mintu’ tanete, anna mintu’ bangsa lolong sae lako kalena.

²Sia buda to sangpetayanan la ke’de’ male anna ma’kada nakua: Maikomi anta male langngan buntunNa Puang, langngan banuanNa Kapenombanna Yakub, anNa ada’iki’ diona mintu’ lalanNa sia anta olai tu mai lalanNa, belanna lan mai Sion la nanii bu’tu tu Sukaran aluk sia iatu kadanNa lan mai Yerusalem.

³Sia Ia la umpaolai salunna tu mintu’ bangsa sia urra’ta’ kara-karana mintu’ to sangpetayanan tarompo’ sae lako tondok mambela. Attu iato iatu pa’dangna la natampa pole’ tengko bassi sia iatu dokena la natampa pole’ pese’bo’, moi misa’ bangsa tae’mo la umbua’ pa’dangna la unnea bangsa senga’ sia tae’mo nala melada’ tu tau iato mai parari.

⁴Sangadinna la pantan unno’ko’ diong lu garonto’ anggoro’na sia diong lu garonto’ arana, anna moi misa’ tae’mo la umpatiramban lenni tu tau iato mai, belanna pudukNa PUANGna mintu’ ma’dandan maritik tu mangka umpokadai te.

⁵Belanna mintu’ bangsa pantan lolang tete dio sanganna deatanna, apa iatu kita la lolangki’ tete dio sanganNa PUANG, Kapenombanta, tontong sae lakona.

⁶Allo iato, kadanNa PUANG, la Kurampun tu to keppa, sia la Kupulung tu to tisambo’ sia iatu mai to Kuparampoi kamandasan.

⁷Iatu to keppa la Kupadadi to torrona sia iatu to dirambai male la Kupadadi misa’ bangsa mawatang, anNa PUANG, la Undatui dao buntu Sion, randuk totemo tontong sae lakona.

⁸Na iatu iko, e Migdal-Eder, e Ofelna anak dara Sion, la nareke’moko sia narampoiko kaparentan dolo, iamotu kadatuanna anak dara Yerusalem.

⁹Ma’apai ammu melallak-lallak susito? Tae’raka datummu? Ba’tu sabu’raka tu pa’bisarammu, muurunganni mapa’di’ susito mangurria’?

¹⁰Malimukku-mukkuko sia melallakko, e anak dara Sion, susito manguria’; belanna totemo la tassu’ko lan mai kota, ammu torro dio lu padang sia la rampoko lako Babel. Inde to dio la dinii urrampanangko; inde to dio la Nanii PUANG ullendokangko lan mai limanna ualimmu.

¹¹Moi totemo budamo tu bangsa sirampun unneako, tu ma’kada nakua: Da’ito namatuna, sia naporai matanta mentiro lako Sion!

¹²Apa tae’ natandai tau iato mai tu tangnga’Na PUANG sia pa’timbanganNa, kumua la Narampun susi patuku gandung dao panglulluran.

¹³Bendanko sia lullu’i, e anak dara Sion, belanna iatu tandukmu la Kupopendadi bassi sia iatu kanukummu la Kupopendadi tambaga ammu nisak-nisakki tu ba’tu pira-pira bangsa sia la musabu’i, dipemalian PUANG tu saro bu’tu kadakena sia mintu’ apanna la mupa’pemalian Puangna mintu’ lino.

¹⁴Totemo la ma’tuntunangkomi, e kamu to naala bilanganna tuntunan! Nagaragaimo tau tu panampo la untalimbung tamaki’. Iatu to ma’parentana to Israel la dibamba tekken tu popona.