Read Toraja-Sa'dan MIKHA 5 Bible Online

MIKHA 5 - Toraja-Sa'dan bible

MIKHA 5

¹Na iatu iko, e Betlehem Efrata, moi ammu bitti’ dio lu mintu’ tongkonanna Yehuda, apa dio mai kalemu la nanii bu’tu lako Kaleku tu misa’ tau tu la dadi to ma’parentana to Israel, tu bu’tu tempon dio mai, dio mai allo tae’ tipamulanna.

²Iamoto la Nasa’biangan Puang tu tau iato mai sae lako attu, kumua iatu tau la kianak, kianakmo. Attu iato iatu to torropa tu siulu’na la sule sola to Israel.

³La tunannang ungkambi’ tau iato mai tete dio kamatotoranna PUANG sia kamala’biranNa sanganNa PUANG, Kapenombanna; sia la torro marampa’ tu tau iato mai, belanna la tarompo’ tu Mesias sae lako mintu’ randan langi’.

⁴Sia Ia la oto’na kasalamaran. Iake la tamai tondokta tu to Asyur sia iake la ullesei tongkonan layukta, manassa la tapabendanan pitu to mangkambi’ sia karua arung dio mai tolino la unneai,

⁵tu la umpakandei domba tu tondok Asyur sia tondokna Nimrod lan lu babanganna, anna purai pa’dang. Sia la mangrampanan dio mai Asyur, ke saei tu tau iato mai tama tondokta sia iake ullesei lili’ta.

⁶Sia iatu to torronapa Yakub la dio lu ba’tu pira-pira budanna bangsa sangtinti ambun dio mai PUANG, sangtinti uran kamban dao lu taruk maluna, tu tang untayan tolino ba’tu umpeagi rupa tau.

⁷Sia iatu to torronapa Yakub la dio lu mintu’ to sangpetayanan sia la lan lu ba’tu pira-pira budanna bangsa susi misa’ singa dio lu olo’-olo’ lan pangala’, sia sangtini misa’ singa mangura dio lu tuntunan domba. Iake tamai inde to dio nadammak sia nase’bu’-se’bu, na moi misa’ tau tae’ urrampananni.

⁸Iatu limammu la matande daona lu mintu’ to unneako, sia mintu’ ualimmu la dipisanni.

⁹La dadi allo iato, kadanNa PUANG, kumua la Kupisanni tu mintu’ darangmu dio mai kalemu sia la Kusanggangi tu mintu’ karetamu.

¹⁰La Kupisanni tu mai kota lan lu padangmu sia la Kuro’pokan tu mintu’ tambakukummu.

¹¹La Kupisanni duka tu balik mata lan mai limammu sia la tae’mo to pakita-kita dio kalemu.

¹²La Kupisanni tu rapang-rapang dipodeata dipa’mu sia batu dipodeatammu lan mai tangngamu, sia tae’mo mula tukku menomba lako panggaraga limammu.

¹³La Kulampi’i duka tu lentong dipodeatammu lanmai tangngamu sia la Kusanggangi tu mintu’ kotamu.

¹⁴Sia la mapallaNa’ sia re’dek ara’Ku la umpabala’i tu bangsa manoka ma’perangi.