Read Toraja-Sa'dan MIKHA 6 Bible Online

MIKHA 6 - Toraja-Sa'dan bible

MIKHA 6

¹Perangii tu apa Napokada PUANG: Ke’de’ko, ammu tunannang butung to ma’parapa’, anna perangii mintu’ buntu, sia natananni talinga mintu’ tanete tu gamarammu.

²Perangii, e mintu’ buntu, tu pa’parapa’Na PUANG, sia kamu duka, e parandanganna lino, tu tang tigoyang. Belanna ma’parapa’mo tu PUANG unnea taunNa, sia la sikara-kara Israel.

³E taungKu, apara tu Kupogau’ lako kalemu sia apara Kupamasussangko? Bendan sa’biko untingoiNa’!

⁴Tae’raka Kumangka ussolangko tassu’ lan mai tondok Mesir sia Kula’bakko lan mai inan munii dipokaunan, sia Kusua tu Musa, Harun sia Miryam undoloangko?

⁵E taungKu, kilalai tu apa natangnga’-tangnga’ Balak, datu Moab, sia iatu apa napebalian Bileam, anakna Beor, lako, sia apa dadi randuk dio mai Sitim sae lako Gilgal, kumua mukanassai tu katongananNa PUANG.

⁶Apara la kubaa la mennolo lako Puang sia la kubaa tukku menomba lako Puang Matua dao inan madaona? Ma’dinraka kupennoloan tu pemala’ ditunu pu’pu’, iamotu anak domba sangtaun dadinna?

⁷Umbani’ apa nala ungkalo’i penaanNa PUANG tu domba laki ma’sa’bu-sa’bu, ba’tu ma’lampa-lampa tu salu minna’? Ma’dinraka la kupemalaran tu anak pa’bunga’ku belanna kapatodo-tintinganku, ba’tu anak sun di kaleku belanna kasalanna deatangku?

⁸Napokadammoko, e tolino, umba tu melo sia apa tu Natuntun PUANG dio mai kalemu: tae’ senga’na, sangadinna umpogau’ kamalamburan sia ungkamali’kamarurusan sia umpamadiong penaa lolang sikadamak Kapenombammu.

⁹Ma’perangikomi! metamba tu PUANG lako kota — maupa’ tu tau ungkataku’ sangamMi — : Perangii tu pebamba sia iatu tau umpamanassai.

¹⁰Denparaka lan banuanna to tang mekaaluk tu ba’tu pira-pira ianan bu’tu tete dio katangmekaalukan sia epa tang ganna’ tu ditampakki ropu?

¹¹La Kusangaraka malolo tu timbangan to tang mekaaluk sia kandu’ ponno batu timbangan palassu?

¹²Iatu mai to sugi’na untambuk kamasa’garan sia iatu pa’tondokanna ma’kada tang tongan sia iatu lilana lan sadangna nanii pa’pakena.

¹³Apa la Kupa’di’iko, la Kubamba sia la ma’kasanggangNa’ natumang kasalammu.

¹⁴La kumandeko, apa tae’ mula dia’, sangadinna iatu katangdiaran la torro lan tambukmu; la umpallaiangko apa-apa, apa tae’ mula unnannai; sia apa-apa tu munanna, la Kusorong lako pa’dang.

¹⁵La mangambo’ko apa tae’ mula ma’ke’te’, la ullullu’ko bua saitun, apa tae’ mula umpa’minnakanni kalemu, sia la ullullu’ko bua anggoro’ ba’ru, apa tae’ mula unniru’ uai anggoro’.

¹⁶Belanna mintu’ tu apa napondok Omri dikaritutui sia mintu’ penggauranna to lan banuanna Ahab, sia lolangko unturu’ pa’timbanganna, kumua angKu popendadiko misa’ apa metirambanan sia iatu mintu’ pa’tondokkanna la Kupadadi misa’ apa ditatta; susimokomito la umpassanni tu kadilo’boanna taungKu.