Read Toraja-Sa'dan MIKHA 7 Bible Online

MIKHA 7 - Toraja-Sa'dan bible

MIKHA 7

¹Upu’ alloku, belanna iatu a’gangku susi ke attu pangalan bua, sia susi ke attu ungkatote bua anggoro’; moi sanglise’ bua anggoro’ tae’mo la dikande, ba’tu moi sanglise’ bua ara tae’ dukamo, tu kukaduangi.

²Iatu to mekaaluk tae’mo lan tondok sia to ma’bulo sanglampa tae’mo dio lu torro tolino. Pada ma’penunumo tu tau iato mai la umpatibollo rara; pantan undaka’ lalan la umpoya siulu’na.

³Matira’ tu limanna tau iato mai umpogau’ kadake; iatu arung ma’tuntun bang sia iatu to ma’paolai salu untarima pappe’, sia iatu mai to kapua tae’ bang namasiri’ umpokada pa’poraian kalena; susimoto tu tau iato mai unnalai tu apa nakaduangi.

⁴Iatu melona dio lu tau iato mai susi bang to duri na iatu ma’bulo sanglampana mandu kadake na rompo pondan. La rampo tu allona to ma’kampamu, sia ukungammu! Attu iato la narampoi kamagiangan tu tau iato mai.

⁵Da’mo mipatonganni tu solami, da’mo mikatappa’i tu sangmanemi; kanandai tu pudukmu lako tu baine mamma’ diong riammu.

⁶Belanna iatu pia muane umpamatuna ambe’na; iatu pia baine bendan umbali-bali indo’na sia minintu baine umbali-bali matusanna baine; na iatu mai tau, siruranna mendadi ualinna.

⁷Apa iatu aku la ma’penununa’ untayan PUANG, sia la umpeagina’ Puang Matua, oto’na kasalamarangku; la Naperangiina’ Kapenombangku.

⁸Da muposendei tu a’gangku, e uali baine: moi angku tobang, manassa la bendanna’ sule; moi angku unno’ko’ lan kapittukan, manassa PUANG la dadi arrangku.

⁹Iatu aku untanggung kare’dekan ara’Na PUANG — belanna umpogau’na’ kasalan lako kaleNa — sae lako nasanda tongannina’ lan kara-karaku sia Napasirundunan tu salunna lako kaleku. La Napatassu’na’ lako masiang; sia la kutiro kumua umba Nakua umpogau’i tu kamaloloan.

¹⁰Iatu iannato la natiro ualingku baine, anna samboi siri’ tu lindona, tu to ma’kada lako kaleku, nakua: Umbamira tu PUANG, Kapenombammu? La natiro matangku. Totemo la dilullu’ susi so’mak dio lu lalan.

¹¹Allo iato, ke nabangunni tau sule tu rinding tembo’mu, allo ia dukato mintu’ tu lili’mu la tarru’ dipekalua’i.

¹²Attu ia dukato la sae tu tau dio mai Asyur sae lako Mesir, sia dio mai Mesir, sae lako Salu, sia dio mai tasik sae lako tasik, sia dio mai buntu sae lako buntu.

¹³Apa iate lino la mempadang lo’bang natumang to untorroi, belanna bua penggauranna.

¹⁴Kambi’i tekkenMi tu taumMi, iamotu tuntunan domba mana’Mi, tu torro makarorrong lan lu pangala’, lan lu tangnga padang malompo. Popa’elo’nai ungkande riu dio lu Basan sia dio Gilead, susitu attu dolo-dolona.

¹⁵Susito allo, tommu tassu’ lan mai tondok Mesir, susi dukamoto la Kunii umpatiroanni tu ba’tu pira-pira tanda mangnga.

¹⁶La masiri’ tu mintu’ bangsa untiroi, anna pa’de tu mintu’ kamatotoranna; la natampun limanna tu pudukna, sia la taru tu talinganna.

¹⁷La ullepa’i barra’-barra’ tu tau iato mai, susi ula’, sia susito olo’-olo’ mendonglo’ dao kuli’na padang; la ma’parondo sun lan mai tambakukunna sia ma’paganggang la sae lako PUANG, Kapenombanta, sia la nakataku’Komi.

¹⁸Mindara tu Kapenomban susi Kamu, tu umpagarri’ kakadakean sia umpaboko’i kapatodo-tintinganna mana’ torroNapa, tu tang unnanna kasengkeanNa tontong sae lakona, sangadinna umpopaiman kamasokanan!

¹⁹Manassa Puang la ungkamasei pole’ki’, sia Iamo la ullullu’i tu mintu’ kakadakeanta. Manassa la Mitibe tu mintu’ kasalangki rokko tasik mandalan.

²⁰La Mipatiroan Yakub tu kamarurusan sia kamasokanan lako Abraham, susitu sumpaMi dolo-dolona lako nene to doloki.