Read Toraja-Sa'dan NAHUM 2 Bible Online

NAHUM 2 - Toraja-Sa'dan bible

NAHUM 2

¹Iatu tau ma’patisambo’-sambo’ ke’de’mo la ullaoiko; kampai tu tambakuku, ma’penniroko dio lu lalan, pori tu aakmu, pematoto’i tonganni tu kalemu.

²Belanna la Nabangun PUANG sule tu kamala’biranna Yakub, susi dukato tu kamala’biranna Israel, belanna mangkamo narampa to mangrampa sia nasanggangi tu tangke anggoro’na.

³Iatu balulangna mintu’ to lalongna mararang, sia iatu pa’barani ma’pakean karamisi; iatu karetana bendan umpoarrang bae’-bae’na susi api, ke allo kadipasakkaranna, sia mintu’ doke dipopangandu.

⁴Iatu mintu’ kareta sigalunturan dio lu lalan, sia sisarrukan dio lu mintu’ tana lapang; iatu arrangna susi dama’, sia susi kila’ sipellepa’-leparan.

⁵Nainaa-naamo tu mintu’ pa’baraninna — sasa-sasa tu tau iato mai anna tilende’, tikara-kara tu tau iato mai male lako rinding tembo’na — , apa sakka’mo tu papa menarana to ma’tumbuk tembo’.

⁶Iatu babangan dio mintu’ randan salu tibungka’mo, na iatu tongkonan layuk tiseno-seno.

⁷Upu’mo: iatu kota dipuraimo tu mintu’ apanna sia dipali’ tu pa’tondokan, na iatu mai kaunanna baine sumarro susi oni bu’ku’, namarassan ussa’pa-sa’pa ara’na.

⁸Iatu Niniwe susi misa’ limbong ponno uai randuk bendanna; totemo lolongmo tu uainna male. Tadangkomi, tadangkomi, apa moi misa’ tau tae’ tibalik.

⁹Rampai tu salaka, rampai tu bulaan! Tae’ upuranna tu mintu’ ianan makamban, iamotu kala’bianna ma’rupa-rupa ianan maballo.

¹⁰Mangsan, lo’bang, sanggang! pussak tu penaa, sia ma’parondo-rondomo tu mintu’ guntu’; iatu mintu’ aak sipa’dikan sia mintu’ lindo pa’de rupanna.

¹¹Umbamira totemo tu lo’ko’ singa, umbara tu inan dinii umpakande singa mangura, tu nanii lumingka singa laki sia singa birang sola anakna sia moi misa’ tae’ tau umpatirambanni?

¹²Umbara nanii tu singa, tu undammak pealanna la naben anakna sia untakessekki tu apa nadammak la naben birangna, sia umponnoi pangrampa tu lo’ko’na sia iatu inanna naponnoi apa nase’bu-se’bu?

¹³Manassa la Kulaoiko!, kadanNa PUANGna mintu’ ma’dandan maritik, la Kuballa nasang tu karetamu namerambu; iatu mintu’ singa mangurammu la nakande pa’dang, sia iatu pangrampamu la Kupisanni dao mai kuli’na padang, sia iatu gamaranna mintu’ sumbungan pudukmu tae’mo nala dirangi len.