Read Toraja-Sa'dan HABAKUK 1 Bible Online

HABAKUK 1 - Toraja-Sa'dan bible

HABAKUK 1

¹Iatu kada Napa’petanggungan Puang Matua, tu dipasombo lako nabi Habakuk.

²O PUANG, ba’tu sangapamo’ meongli’ umpalaku pa’tunduan, apa tae’ Miperangii, melallakna’ mati’ Kalemi, kukua: Kamasa’garan! Apa tae’ Mibengan katilendokan.

³Ma’apai amMi patiroanna’ tu kakelokan sia Mitiro, tu kamandasan? ondongpi iatu pa’pakario-rio sia kamasa’garan dio pentiroku, sia den kasigagan, sia bu’tu tu kasite’geran.

⁴Iamoto natangkan kepatu tu Sukaran aluk sia tae’mo napayan len tu salunna, belanna iatu to tang mekaaluk untikui to malambu’, iamoto napayan tibalik sule tu salunna.

⁵Tiro tikui male tu mintu’ to kapere’, sia pemarangai, ammi mangnga sia pussak, belanna Kupogau’ tu misa’ penggauran lan attummi, tu tae’ mila umpatonganni, ke diuleleanni.

⁶Belanna tonganna iatu to Kasdim Kupabendan, misa’ bangsa masa’ga’ sia malinta’, tu lumingka unnoloi lua’na lino, la unnala inan katorroanna tau la napoapa, tu tangia apanna.

⁷Megiangan sia metakuran, iatu salunna sia kataromposanna tu dio mannapi mai kalena nanii sun.

⁸Iatu darangna mandu malinta’ na iatu arimau buluh, sia mandu matira’ na iatu guruk ke bonginna; mintu’ tu darangna sia pakkanarangna sae tiantak-antak, mambela nanii sae langkan maega tu ussiok kandena.

⁹Mintu’ bangsa iato sae umpogau’ kamasa’garan, iatu to undoloanni lumumpa’ susi angin rampe matallo, sia urrampun to dirampa susi karassik budanna.

¹⁰Natelle-telle tu mai datu sia napetaai tu mai pangulu. Napetaai tu mintu’ benteng, belanna natopporan losso’ ullaoi, anna taloi.

¹¹Tarru’ bang susi angin sia male tarru’; susimoto tu naposala, belanna kamatotoranna tu napodeata.

¹²O PUANG, tae’raka na Kamu tu Kapenombangku tempon dio mai sia To maseroku? Tae’ kila mate. O PUANG, Kamumo umpadenni tu tau iato mai la mangukung, sia o Buntu Batu, Kamu umpamanassai tu tau iato mai la umpalalo peada’.

¹³Mandu masero tu matamMi untiro kakadakean, sia tang Mitanan umpemarangai tu pa’pakario-rio, ma’apai Minenne’ umpemarangai tu to tang maruru’ sia kappaKomi, ke naampello’i to tang mekaaluk tu to mandu malambu’ na ia.

¹⁴Miurunganni umpadadi tolino, susito bale diong tasik sia susito olo’-olo’ mendonglo’, tu tae’mo to ma’parentana.

¹⁵Napekan nasang kendek, napaalai dalla’na, anna riu’i sia narampun tama bundena; iamoto naparannu sia mela’tek-la’tek.

¹⁶Iamoto anna memala’ lako dalla’na sia untunu pemala’ lako bundena, belanna bannang iarite namalompo tu taana sia sebo tu kandena.

¹⁷Iamoto anna lo’bangiraka tu dalla’na sia tontong umpateiraka ba’tu pira-pira bangsa tae’ bang nakasayangi?