Read Toraja-Sa'dan HABAKUK 2 Bible Online

HABAKUK 2 - Toraja-Sa'dan bible

HABAKUK 2

¹La bendanna’ dao menara pa’kampangku sia la tunannangna’ dao benteng tembo’ tu kunii ummanta-mantai tu apa la Napokada Puang lako kaleku sia apa la kupebalian sarroku.

²Attu iato Napebaliimo’ PUANG Nakua: Sura’i te patiro mendeata iate sia pamarorronganni dao ba’tu pira-pira papan, kumua na iatu to lendu’ ma’din la umbasai.

³Belanna iatu patiro mendeata umpeagipa tu attu dipamanassa, apa la madoi’ male lako ma’katampakanna sia tae’ nabuttok; iake malelanpi, la mukampai, belanna la sae tongan, sia tae’ nala torro.

⁴Manassa matampo sia tang malolo tu penaanna, apa iatu to malambu’ la umpotuo kapatongananna.

⁵Tonganna iatu to matampo ma’pakena iamo to ma’kada layuk, apa tae’ ia nala tontong; umpopenganga sadangna susi lino to mate sia tae’ len nadia’ susi kamatean, naurunganni urrampun mintu’ bangsa sia umpulung mintu’ to sangpetayanan lako kalena.

⁶Tang la nasa’buranraka parumbasan mintu’ bangsa tu diona kalena, petelle sia ponto bannang, nakua: Upu’ allona tu to umpopemba’ka’ tangia apanna la sangapara? sia iatu to umpassan apa dipa’pentoean.

⁷Tae’raka nala ta’pa bendan tu to ungkeke’ko sia malimbangun tu to umpatirambanko, naurunganni umpangrampaiko?

⁸Belanna mangkamoko umpangrampai buda bangsa, ia toda tu torronapa bangsa iato la umpangrampaiko, tu belanna rarana tolino tu tibollo sia belanna kamasa’garan, tu diparampoan tondok, kota sia mintu’ pa’tondokanna.

⁹Upu’ allona tu to urrampun saro bu’tu kadake lako to lan banuanna, tu unggaragai serangna dao inan madao, la urrampanan kalena dio mai pa’dammakna kamandasan.

¹⁰Mutangnga’-tangnga’ tu kaditattan urrampoi to lan banuammu, tonna sae lan penaammu la ussanggangi ba’tu pira-pira budanna bangsa; iamoto sipatuko la kapa’dean katuoammu.

¹¹Belanna metamba tu batu dio mai rinding tembo’, sia mebali tu lentong dio mai pa’pasitammuan kayu.

¹²Upu’ allona tu to umpatibollo rara umbangun kota, sia unnoton benteng dao pa’pakario-rio.

¹³Tonganna, tae’raka nalu dio mai PUANGna mintu’ ma’dandan maritik, kumua mintu’ bangsa tang mekata’ka’ umpandakaran api sia mintu’ to sangpetayanan tang mekabo’yo’ umpandakaranni tu apa tae’ gai’na.

¹⁴Belanna la naponnoi kapaissanan diona kamala’biranNa PUANG tu mintu’ lino, susi uai buda ussamboi salinna tasik.

¹⁵Upu’ allona tu to umpairu’ solana, ammu ranganni rasunmu, sia iatu to umpamalangoi la untiroi tu kama’kambelanganna.

¹⁶Mupedia’imo apa mesirisan tu kalemu ussonda kamala’biran, iamoto iru’ dukami iko, ammu kambelangi kalemu. La tibalik lako kalemu tu irusan lu dio mai kananNa PUANG, sia kamasirisan kapua la ungkabu’ kamala’birammu.

¹⁷Belanna iatu kamasa’garan mupogau’ dao Libanon la ungkabu’ko sia iatu kaussabuirammu olo’-olo’ la umpatirambanko, napobua’ rarana tolino tu tibollo sia kamasa’garan, tu diparampoan tondok, kota sia mintu’ pa’tondokanna.

¹⁸Apara gai’na tu rapang-rapang dipodeata dipa’, belanna to ma’pa’ unggaragai? Apara gai’na tu rapang-rapang dipodeata dipati’no’, iamotu misa’ panganda’ tang tongan, moi anna posande’ bangi to unggaragai tu panggaraga limanna? Tae’raka nadeata mamang tu nagaragai?

¹⁹Upu’ allona tu to ma’kada lako kayu sanglontok, nakua: Malimbangunko sia lako misa’ batu mamang, nakua: Pana’dingko, Ma’dinraka tu apa iato mai la mangada’? Manassa moi disapu’ bulaan sia salaka, apa tae’ duka penaa lan.

²⁰Apa iatu PUANG lan Ia Banua Kabusungan maindanNa. Ma’pakappakomi dio oloNa, e issinna mintu’ lino.