Read Toraja-Sa'dan ZEFANYA 1 Bible Online

ZEFANYA 1 - Toraja-Sa'dan bible

ZEFANYA 1

¹Inde sia tu kadanNa PUANG, tu sae lako Zefanya, anakna Kusyi anakna Gedalya, anakna Amarya, anakna Hizkia, tonna linona Yosia, anakna Amon, datu Yehuda.

²La Kuputtai nasang tu mintu’ apa dao mai kuli’na padang, kadanNa PUANG.

³La Kuputtai tu tolino sia olo’-olo’ la Kuputtai tu manuk-manuk dao lu langi’ sia bale diong lu tasik, sia iatu kamasaki-inaan tete dio mai to tang mekaaluk, tu umpabu’tu kamasussan; ondongpi la kupisanni tu tolino dao mai kuli’na padang, kadanNa PUANG.

⁴La Kue’te’ tu limangKu unnukung Yehuda sia mintu’ to lan Yerusalem, sia la Kusabu’i lan mai inan iate tu mintu’ apa torronapa Baal sia sanganna mintu’ to untoean deata sola mintu’ to minaa,

⁵sia mintu’ tu to tukku menomba dao papa dio tingayona mintu’ ma’dandan maritik dao langi’, sia iatu to tukku menomba sia umpalao sumpa tete dio PUANG sia umpalao sumpa tete dio Milkom, deatanna;

⁶sia mintu’ tau iato mai, tu umboko’i PUANG sia tae’ nadaka’ PUANG sia tae’ nareke’ Puang la mekutana.

⁷Pakappako kalemu dio oloNa Puangta PUANG, belanna mareke’mo tu alloNa PUANG; belanna Napasakka’mo PUANG tu misa’ pemala’ sia Napamarimbangammo tu mintu’ to Natambai.

⁸La dadi, ke allo pemala’Na PUANG, kumua la Kuukung tu mintu’ arung sia mintu’ anakna muane datu sia mintu’ tu mai to ma’pakean to sae.

⁹Allo ia dukato la Kuukung tu mintu’ to ungkondongi ampang sia iatu to umponnoi kamasa’garan sia pa’pakena tu banuanna puangna.

¹⁰Allo iato, kadanNa PUANG, la den urruk kapua dio mai babangan Bale sia tangi’ dio mai kota ba’ru sia ongngo’ memassan dao mai tanete.

¹¹Tumangi’komi, e kamu to untorroi Issong batu, belanna iatu mintu’ to ma’balili sanggang sia mintu’ to untimbang doi’ dipisanni.

¹²La dadi attu iato, kumua la Kubia’i Kuparessa tu Yerusalem; la Kuukung tu mintu’ muane malompona tu mari’pi bang unniru’ anggoro ponno tainna, sia iatu ma’tangnga’ lan penaanna, nakua: Iatu PUANG tae’ Napogau’ melo sia tae’ Napogau’ kadake.

¹³Iatu kasugiranna tau iato mai la dirampa sia iatu banuanna la disanggang. Moi naumpabendan banua, tae’ nala unnii torro, moi nauntanan garonto’ anggoro’, tae’ nala unniru’i tu uai anggoro’na.

¹⁴Mareke’mo tu allo kapuanNa PUANG, mareke’mo sia madomi’ bangmo rampo mengkareke’. Perangiimi tu alloNa PUANG. Moi anna iatu to lalong metamba duka diona kamaparrisan.

¹⁵Allo iato iamo misa’ allo kare’dekan ara’, misa’ allo kapussakan sia kamatakuran, misa’ allo kasanggangan sia kasaburan, misa’ allo kapittukan sia kamalillinan, misa’ allo nakabu’ salebu’ sia lillinan parrak;

¹⁶misa’ allo nanii oni napiri tanduk sia arrak kasirarian tu ullaoi mintu’ kota ditambakuku sia ullaoi menara malangka’ dio tetuk kota.

¹⁷Attu iato la Kupapussak tu tolino, naurunganni male butung to buta, belanna kasalammo tu tau iato lako PUANG, sia la tibollo tu rarana susi barra’-barra’ sia iatu tambuk barinni’na la tiampa’ susi tai.

¹⁸Moi salakana moi bulaan tae’ nakullei urrampananni tu tau iato mai, ke allo kare’dekan ara’Na PUANG. Api kamangimburuanNa la umpurai nakande tu mintu’ lino, belanna la Napaden tu kasanggangan, ondongpi katappuran megiangan lako mintu’ to untorroi kuli’na padang.