Read Toraja-Sa'dan ZEFANYA 3 Bible Online

ZEFANYA 3 - Toraja-Sa'dan bible

ZEFANYA 3

¹Upu’ allona tu kota pabali-bali, sia maruttak sia ma’pakario-rio.

²Tae’ naperangii pa’pakilala, sia tae’ natarima peada’; tae’ naposande’ PUANG sia tae’ namengkareke’ lako Kapenombanna.

³Mintu’ arungna dio lu tangngana susi bang singa umburrung-burrung, mintu’ to ma’paolainna salu susi bang, guruk ke bongi, tu tang massesa sae lako melambi’na.

⁴Mintu’ nabinna ma’kada punala bang, iamoto ma’gau’ tang maruru’; iatu to minaanna urruttakki mintu’ apa maindan sia ullullu’ Sukaran aluk.

⁵Apa iatu PUANG malambu’ dio lu tangngana; tae’ Napogau’i tu tang malambu’; melambi’oi Napasombooi Puang tu atoran malambu’Na; ianna masiangmo, sae dukami. Apa iatu to leko’ tae’ natandai siri’.

⁶Kusabu’imo tu ba’tu pira-pira bangsa; sanggangmo tu manarana dio tetuk kota; Kusanggangngimo tu batattana, naurunganni moi misa’ tau tae’mo unnolai; iatu mintu’ kotana daun lauanmo, tae’mo tau lan sia tae’mo tau umpa’tondokki.

⁷Ma’kadaNa’ Kukua: Kataku’Na’ sia tarimai tu peada’; iake susito, iatu inanna tae’ nala disabu’i situru’ tu mintu’ ukungan tu la Kuparampoanni. Apa natikarai pissan umpogau’i tu mintu’ kakadakeanna.

⁸Iamoto, tayanNa’, kadanNa PUANG, to allo la Kunii ke’de’ unnala pangrampa; belanna mangkamo Kura’ta’ la urrampunni tu bangsa sia umpulungi tu kadatuan, sia umbarrakanni tu kare’dekan ara’Ku lako tau iato mai, iamotu mintu’ kasengkean dukkungKu, belanna api kamangimburuangKu la umpurai nakande tu mintu’ kuli’na padang.

⁹Apa attu iato la Kuben lila senga’, tu masero, tu mintu’ bangsa, anna sa’bu’i mintu’ tau iato mai tu sanganNa PUANG, kumua anna sangmamullean umpassan kapengkaolan lako Puang.

¹⁰Lu sambalinna mai mintu’ salu Etiopia tu nanii sae tu to umpenombaiNa’, iamotu tau tisambo’Ku, la umpennoloanNa’ pemala’ sipatu dibaa lako Kaleku.

¹¹Allo iato tae’mo mula masiri’ belanna mintu’ penggaurammu, tu mupobannangmo patodo tinting lako Kaleku, belanna la Kualai lan mai alla’mu tu mintu’ to unnarrak tete dio kamatampoanna, sia tae’mo mula umpakapua kalemu dao buntu maindanKu.

¹²Sia la Kupatorro dio lu kalemi tu mai to mase-mase sia to bitti’ sia iatu mai to umpentilindungi sanganNa PUANG.

¹³Iatu to torrona Israel tae’mo nala ma’pakario-rio ba’tu ma’kada tang tongan sia iatu lila pa’pakenan la tae’mo lan sadangna, belanna tau iato mai la ungkande riu dio padang kariuan sia la matindo sia tae’mo misa’ tau la umpatirambanni.

¹⁴Mela’tekko, e anak dara Sion, unnarrakko, e Israel; sende paimanko sia ponno penaammu parannu-rannu, e anak dara Yerusalem.

¹⁵Napa’deimo PUANG tu kadiukungammu, Naputtaimo tu ualimmu. Iatu Datunna Israel, iamotu PUANG, lan lu tangngamu, tae’mo mula ungkataku’i tu kamandasan.

¹⁶Alo iato la ma’kada tu tau lako Yerusalem nakua: Da mumataku’, e Sion, da mupopa’elo’nai langga’ tu limammu.

¹⁷Iatu PUANG, Kapenombammu, lan lu tangnga’mu, iamotu to lalong mangrampanan. La parannu tu Puang umposendeko, la umpakappa kaleNa tete dio pa’kaboro’Na; la mela’tek sia unnarrak umpopaimanko.

¹⁸Mintu’ tu to rosso penaanna, sikambela kasirampunan pa’gauran, manassa la Kurampun; inang naala bilangammu. Nati’tin kadilo’boan tu tau iato mai butung panglemba.

¹⁹Manasa attu iato la Kupapakkanni tu mintu’ to umpakario-rioko, apa la Kurampanan tu to gento sia la Kurampun tu to tisambo’, belanna la Kupadadi misa’ kadipudian sia sanga kalelean tu tau iato mai, iamo tu to kaissanan siri’na lan mintu’ lino.

²⁰Attu iato la Kupasaekomi, iamotu attu la Kunii urrampunkomi. Belanna la Kupadadikomi misa’ sanga kalelean sia kadipudian dio lu mintu’ bangsa dao kuli’na padang, ke Kupopembalimi tu dalle’mi dio pentiromi, kadanNa PUANG.