Read Toraja-Sa'dan HAGAI 1 Bible Online

HAGAI 1 - Toraja-Sa'dan bible

HAGAI 1

¹Iatonna taun ma’penduan kadatuanna Darius, bulan ma’pennannan, allo bunga’na bulan iato, saemi tu kadanNa PUANG nalopian nabi Hagai lako Zerubabel, anakna Sealtiel, to maraya Yehuda, sia lako Yosua, anakna Yozadak, tominaa kapua, nakua:

²Inde sia tu kadanNa PUANGna mintu’ ma’dandan maritik, Nakua: Ma’kada te bangsa iate, nakua: Tae’pa nalambi’i tu allona, iamotu allo la dinii umbangunni sule tu banuanNa PUANG.

³Saemi tu kadanNa PUANGna lopian nabi Hagai, nakua:

⁴Denraka tu attummi la torro lan banuammi tu melo rinding papanna na iate banua iate sanggangpa?

⁵Totemo, kadanNa PUANGna mintu’ ma’dandan maritik, Nakua: Tangnga’ meloi tu apa urrampoikomi.

⁶Buda tu miambo’, apa ia tu mialanna sidi’ri; kumandekomi, apa tae’ midia’; mangiru’komi, apa tae’ nabossakomi, ma’pakeankomi, apa tae’ namalassu tu kalemi, sia minda-minda tu male sumaro, untarima sarona lan poro’-poro’ lo’po’.

⁷Inde sia tu KadanNa PUANGna mintu’ ma’dandan maritik, Nakua: Tangnga’ meloi tu apa urrampoikomi.

⁸Malekomi langngan buntu unnala kayu, ammi bangunni sule te banua iate, manassa la naposende penaangKu, angKu dipakala’bi’, kadanNa PUANG.

⁹Misanga pangrekenmi la buda, apa tonganna sidi’ri, apa iatommi patamami, Kupamurru’mi tama. Ma’apai nasusito?, kadanNa PUANGna mintu’ ma’dandan maritik. Belanna bannang dio tu banuangKu, tu sanggangpa, na iatu kamu pantan umposara’komi banuammi.

¹⁰Iamoto na iatu langi’ umpatadangangkomi ambun, sia iatu kuli’na padang tae’mo napakendekangkomi burana.

¹¹Sia Kutambai tu pealloan karing urrampoi padang sia buntu, gandung, uai anggoro’ ba’ru, minna’ sia mintu’ burana padang, tolino sia olo’-olo’ sia mintu’ panggaraga lima.

¹²Attu iato naperangiimi Zerubabel, anakna Sealtiel sia Yosua, anakna Yozadak, tominaa kapua, sia mintu’ to buda, tu torronapa, tu gamaranNa PUANG, Kapenombanna, sia iatu kadanna nabi Hagai, tu Nasua PUANG, Kapenombanna, umparampoi lako tau iato mai, anna mataku’ tu to buda dio olona PUANG.

¹³Ma’kadami Hagai, pesuanNa PUANG, tete dio pepasanNa PUANG, lako to buda, nakua: La Kurondongkomi kadanNa PUANG.

¹⁴Napatiakka’mi PUANG tu penaanna Zerubabel, anakna Sealtiel, to maraya Yehuda, sia penaanna Yosua, anakna Yozadak, tominaa kapua, sia penaanna mintu’ to buda, tu torronapa, anna sae tu tau iato mai ungkarangi tu pengkarangan dio banuanNa PUANGna mintu’ ma’dandan maritik, Kapenombanna tau iato mai,