Read Toraja-Sa'dan HAGAI 2 Bible Online

HAGAI 2 - Toraja-Sa'dan bible

HAGAI 2

¹tonna allo ma’penduangpulo nna’pa’ bulan ma’pennannan, taun ma’penduan kadatuanna Darius.

²Iatonna bulan ma’pempitu, allo ma’penduangpulo mmisa, saemi tu KadanNa PUANG, nalopian nabi Hagai, nakua:

³Pokadai lako Zerubabel, anakna Sealtiel, to maraya Yehuda, sia lako Yosua, anakna Yozadak, tominaa kapua, sia lako to buda, tu torronapa kumua:

⁴Mindaparakomi tu dennapa, untiroi tu kamala’biran dolona te banua iate? Umba nakua mitiro totemo? Tae’raka nasusi to apa matuna bang ditiro?

⁵Apa totemo, pabatta’i tu peanaammu, e Zerubabel, kadanNa PUANG, sia pabatta’i tu penaammu, e Yosua, anakna Yozadak, tominaa kapua, sia pabatta’i tu penaammi, e mintu’ to budanna tondok, kadanNa PUANG, sia mengkarang tarru’komi, belanna Kurondongkomi, kadanNa PUANGna mintu’ ma’dandan maritik,

⁶situru’ tu kada Kuallu’ lako kalemi, tommi tassu’ lan mai Mesir, sia tonna bendan tu PenaangKu lan tangngami: Da mimataku’.

⁷Belanna inde sia tu kadanNa PUANGna mintu’ ma’dandan maritik, Nakua: Sattu’mora, tae’mora namasai, angKu patigega’i tu langi’ sia lino, tasik sia karangkeanna.

⁸Ondongpi la Kupatigega’ tu mintu’ bangsa sia ianan maballona mintu’ bangsa la sae, sia la Kuponnoi kamala’biran te banua iate, kadanNa PUANGna mintu’ ma’dandan maritik.

⁹Aku puangna tu mintu’ salaka sia Aku puangna tu mintu’ bulaan, kadanNa PUANGna mintu’ ma’dandan maritik.

¹⁰Iatu kamala’biran undinna te banua iate la mandu kapua na iatu kamala’biran dolona, kadanNa PUANGna mintu’ ma’dandan maritik; sia lan inan iate la Kunii umpa’kamasean kasalamaran, kadanNa PUANGna mintu’ ma’dandan maritik.

¹¹Iatonna allo ma’penduangpulo nna’pa’ bulan ma’pengkasera, taun ma’penduan kadatuanna Darius, saemi tu kadanNa PUANG lako nabi Hagai, Nakua:

¹²Inde sia tu kadanNa PUANGna mintu’ ma’dandan maritik, Nakua: Totemo pekutananni lako to minaa tu diona tu battuananna Sukaran aluk, sia ma’kadako, kumua:

¹³Iake denni misa’ tau umbaa duku’ maindan diong biring sambu’na, anna iatu biring sambu’ iato urrua roti, utan sirau uainna, uai anggoro’, minna’ ba’tu umbanna tu kande senga’, ma’dinraka maindan to? Mebalimi tu mintu’ to minaa nakua: Tae’.

¹⁴Ma’kadami Hagai nakua. Iake denni misa’ tau naruttakki batang rabuk, anna ruai ba’tu umbanna tu apa iato, ma’dinraka la maruttak to? Mebalimi tu mintu’ to minaa nakua: La maruttak to.

¹⁵Ma’kadami Hagai nakua: Susimo a’ganna te bangsa iate sia susimo a’ganna te to sangpetayanan iate dio oloKu, kadanNa PUANG, sia susimo a’ganna to tu mintu’ pengkaranganna limanna, sia iatu apa napemalaran inde to dio, maruttak nasang.

¹⁶Totemo la mipalan penaa tu mintu’ apa dolo na allo iate; tonna tae’pa nadipasitoppo’ tu batu dio Banua kabusunganNa PUANG,

¹⁷tonna tae’pa nadadi mintu’ apa iato; iake saemi tu tau lako patuku gandung, tu duangpulo suka’na, apa denri pessangpulo; iake saei lako pa’parran anggoro’ la untimbai pellimangpulo lan mai inan iato, apa denri penduangpulo.

¹⁸Kuparampoikomi kalangkoan sia pasi sia mintu’ panggaraga limammi Kupata’pai uran batu, apa tae’ kapengkilalammi lako Kaleku, kadanNa PUANG.

¹⁹Palan penaai tu mintu’ apa dolo na allo iate, iamotu allo ma’penduangpulo nna’pa’ bulan ma’pengkasera, randuk dio mai allo iato, tu dinii unnoton parandangan Banua kabusunganNa PUANG. Palan penaai:

²⁰Den paraka banne dao lu alang? Ondongpi ia duka tu garonto’ anggoro’, garonto’ ara garonto’ dalima sia garonto’ saitun tae’ namembua. Randuk allo iate la umpa’benganNa’ kamasakke-sakkean.

²¹Iatonna ma’penduanna saemi kadanNa PUANG lako Hagai tonna allo ma’penduangpulo nna’pa’ bulan iato, Nakua:

²²Pokadanni Zerubabel, to maraya Yehuda, kumua: La Kupatigega’ tu langi’ sia lino.

²³Sia la Kubalittua’ tu mintu’ isungan kadatuan, la Kusanggangi tu kuasa kadatuanna mintu’ bangsa, la Kubalittua’ tu mintu’ kareta sia mintu’ to dao, sia iatu darang sia pakkanarangna la pantan songka nakande pa’dangna solana.

²⁴Allo iato, kadanNa PUANGna mintu’ ma’dandan maritik, la Kualako, Zerubabel, anakna Sealtiel, taungKu, kadanNa PUANG, angKu padadiko misa’ sissin peca’, belanna ikomo tu mangka Kupilei langsa’, kadanNa PUANGna mintu’ na’dandan maritik.