Read Toraja-Sa'dan ZAKHARIA 11 Bible Online

ZAKHARIA 11 - Toraja-Sa'dan bible

ZAKHARIA 11

¹Bungka’i tu mintu’ ba’bamu, e Libanon, anna purai api tu mintu’ garonto’ arasi’mu.

²Sumarroko, e sanoba’, belanna songkamo tu arasi’, sia diratoimo tu mintu’ kayu umbalumbun; sumarrokomi, e mintu’ jati dio Basan, belanna tibambangmo tu pangala’ tamman.

³Perangii tu sarrona to mangkambi’, belanna sanggangmo tu kamala’biranna; perangii tu burrungna singa mangura, belanna iatu kamaballoanna Yordan sanggangmo.

⁴Inde sia tu kadanNa PUANG, Kapenombangku, Nakua: Kambi’i tu mintu’ domba la ditunu.

⁵Iatu tau unnallii untunui, apa nasanga tae’ nasala’; iatu tau umbalukanni ma’kada nakua: Mintu’ kadipudian lu lako PUANG, belanna sugi’mo’; iatu mintu’ to mangkambi’na tae’ ungkasayangi.

⁶Belanna tae’mo Kula ungkasayangi tu to untorroi kuli’na padang, kadanNa PUANG; manassa la Kusorong tu mintu’ tolino tama limanna padanna tolino sia tama limanna datunna; na tau iato mai la umpopempadang lo’bangi te lino sia tae’mo Kula urrampananni lan mai limanna tau iato mai.

⁷Iamoto kukambi’i tu mintu’ domba la ditunu — iamo napobannang to namakario-rio dio lu mintu’ domba angku alai tu tekken da’dua, misa’ kusangai Pa’kaboro’na iatu misa’ Pa’pori, susimoto kunii ungkambi’i tu tuntunan iato.

⁸Iatu to mangkambi’ tallu kuratoimo lan sangbulan, belanna tappumo tu kasa’barasangku lako sia nakanoka dukamo’ tu tau iato mai.

⁹Mangkato ma’kadamo’ kukua. Tae’mo kula ungkambi’komi, iatu to la mate, nake matei, iatu la diratoinna, nake diratoi, na iatu torronapa nake pada ungkande duku’ solana.

¹⁰Kualami tu tekkenku, tu disanga Pa’kaboro’, angku le’toi, kuurunganni umpokai tu basseku, tu mangka kutanan sola mintu’ bangsa.

¹¹Susimoto tu apa iato dipoka tonna allo iato; susi dukamoto iatu makario-riona dio lu mintu’ domba, tu umpalanna’ penaa, unnissanni, kumua iamote tu kadanNa PUANG.

¹²Ma’kadamo’ lako tau iato mai kukua: Iake misangai melo, benmo’ tu saroku, apa iake tae’i, elo’namo! Natimbangmi tu saroku tallungpulo batu salaka.

¹³Apa ma’kada tu PUANG lako kaleku Nakua: Pembuanganni lako to tumampa kurin; iatu allinna masuli’ naanggaranNa’ tau iato mai! Kualami tu tallungpulo batu salaka, angku pembuanganni lako to tumampa kurin, tu lan banuanNa PUANG.

¹⁴Mangkato kule’toomi tu tekken ma’penduangku, tu disanga Pa’pori, kuurunganni umpoka kasiuluranna Yehuda na Israel.

¹⁵Mangkato ma’kadaMi tu PUANG lako kaleku Nakua: Alanomoko kalemu pareanan to mangkambi’ baga.

¹⁶Belanna manassa la Kupadenan misa’ tu to mangkambi’ lan tondok, iamotu tang umparinaa apa la sanggang, tang undaka’ apa tisambo’, tang umpoinaa umpamondo apa bangke, tang ungkaritutui apa tang pakulle, sangadinna la ungkande duku’ olo’-olo’ malompo sia la nase’bu kanukunna.

¹⁷Upu’ allona tu to mangkambi’ tae’ gai’na, tu umpopa’elo’na mintu’ dombana. Narampoimira pa’dang tu takia’na sia iatu mata kananna! La kope tu takia’na, anna maraun tu mata kananna.