Read Toraja-Sa'dan ZAKHARIA 12 Bible Online

ZAKHARIA 12 - Toraja-Sa'dan bible

ZAKHARIA 12

¹Inde sia tu kada Napa’petanggungan Puang Matua, iamotu kadanNa PUANG diona Israel. Susite tu kadanNa PUANG, tu umballa’ langi’ sia umparandanganni lino sia ungkombong penaanna tolino lan ba’tengna.

²Iatu Yerusalem la Kupadadi misa’ irusan nanii apa palango lako mintu’ bangsa tiku lao; ondongpi la urrampoi duka Yehuda, ke dipatama limbui tu Yerusalem.

³Attu iato iatu Yerusalem la Kupadadi misa’ batu tu manassa la naangka’ mintu’ to sangpetayanan; apa mintu’ tu tau unnangka’i, manassa la nabangkei tongan tu kalena. Sia mintu’ bangsa lan te lino la sirampun ullilingi.

⁴Attu ia dukato, kadanNa PUANG, la Kuparampoi katirambanan tu mintu’ darang, sia la Kupabomboan tu mintu’ to ussakei; lako mintu’ to Yehuda la tontong tibungka’ tu matangKu, apa iatu mintu’ darangna to sangpetayanan la Kupabuta.

⁵Attu iato iatu mintu’ pangulu pa’rapuanna Yehuda la ma’kada lan penaanna nakua: Iatu to lan Yerusalem misa’ lima matoto’ lako kaleku tete dio PUANGna mintu’ ma’dandan maritik, Kapenombanna tau iato mai.

⁶Allo iato iatu mintu’ pangulu pa’rapuanna Yehuda la Kupasusi misa’ puaro lan lu alla’ kayu sia la Kupasusi misa’ sulo lan lu alla’ patuku; iamoto la napurai nakande tu mintu’ to sangpetayanan dio kananna sia dio kairinna tiku lao; apa iatu Yerusalem la tontong bendan dio inanna, iamotu dio Yerusalem.

⁷La Narampanan PUANG dolo tu tendana Yehuda, kumua na iatu passattuanna rapunna Daud sia to lan Yerusalem, da napakapuai na Yehuda.

⁸Allo iato PUANG la urrerungi tu mintu’ to lan Yerusalem, naminda-minda tu titodo dio lu tau iato mai allo iato la susi Daud, na iatu bati’na Daud la susi Puang Matua, sia la sangtinti Malaeka’na PUANG dio tingayona tau iato mai.

⁹Allo iato la Kudakaran lalan ussanggangi tu mintu’ bangsa sae ullaoi Yerusalem.

¹⁰Lako to lan tongkonan layukna Daud sia lako to lan Yerusalem la Kubarrakan tu Penaa kamaturu-turuan sia passambayang; iatu tau iato mai la mentiro lako tu to mangka narok, anna sa’buranni bating, susito umbatingi anak tungga’, ondongpi la si’dan-si’dan untangi’i butung to untangi’i anak pa’bung’a.

¹¹Allo iato la den bating kapua dio Yerusalem, susi bating diona Hadad-Rimon diong lombok Megido.

¹²Mintu’ tau lan tondok la ussa’bu’ bating, pantan simisa’-misa’ pa’rapuan; pa’rapuanna manna bati’na Daud sia ia manna tu mintu’ bainena, pa’rapuanna manna bati’na Natan sia ia manna tu mintu’ bainena;

¹³pa’rapuanna manna bati’na Lewi sia ia manna tu mintu’ bainena; pa’rapuanna manna Simei sia ia manna tu mintu’ bainena;

¹⁴iatu mintu’ pa’rapuan senga’, pantan simisa’-misa’ pa’rapuanna sia pantanni simisa’-misa’ bainena.