Read Toraja-Sa'dan ZAKHARIA 14 Bible Online

ZAKHARIA 14 - Toraja-Sa'dan bible

ZAKHARIA 14

¹Manassa la sae misa’ alloNa PUANG, la dinii untaa-taai lan lu benteng tembo’mu tu pangrampa diala dio mai kalemu.

²Attu iato la Kurampun tu mintu’ bangsa urrarii Yerusalem; iatu mai kota la ditalo, iatu mai banua la dipangrampai sia iatu mai baine la diparuku digau’ sala. Sesena tu pa’tondokan la male dipali’, apa iatu torronapa tu to buda tae’ nala disabu’i lan mai kota iato.

³Attu iato la tassu’ tu PUANG, anNa sirari tu mintu’ bangsa iato susitu kapararianNa dolona, tonna allo kasirarian.

⁴Allo iato la mellese tu lette’Na dao buntu Saitun, tu dio tingayo Yerusalem rampe matallona; attu iato iatu buntu Saitun la tipa’dua ma’palulako rampe matallo sia lako rampe matampu’, dadi misa’ lombok tarru’ kapua, iatu sesena buntu iato menono’ ma’palurekke, na iatu sangsesena pole’o menono’ ma’palusau’.

⁵Attu iato la mallaikomi rokko lombok buntungKu, belanna iatu lombokna buntu iato la sumpu sae lako Azal, ondongpi la mallaikomi, susi kamallaiammi dio mai lino’ tonna linona Uzia, datu Yehuda. Sia iatu PUANG, Kapenombangku, la sae sola mintu’ to masero.

⁶Allo iate tae’mo nala den arrang mala’bi’ sia iatu uai tae’mo namakko;

⁷ondongpi iatu iannato la mennallo bangmo — tu kaissanan lako PUANG — tu tangia allo sia tangia bongi; apa ianna makaroenmo, la masero.

⁸Allo ia dukato ba’tu pira-pira kalimbuang boba la lolong lan mai Yerusalem, sesena la lu lako tasik rampe matallo na iatu sesena la lu lako tasik rampe matampu’; moi anna pealloan, moi anna attu madingin la dadi susito.

⁹Sia PUANG la dadi datu lan mintu’ lino; allo iato la misa’ri tu PUANG sia iatu sanganNa la misa’ dukari.

¹⁰Iatu mintu’ padang tiku lao la dadi susi Padang marante randuk dio mai Geba sae lako Rimon, rampe lo’na lu Yerusalem; iatu kota iato la dipamatande sia la tontong dio inanna, randuk dio mai babangan Benyamin sae lako inan babangan dolo, sae lako babangan Tetuk, sia randuk dio mai menara Hananeel sae lako pa’parran anggoro’ datu.

¹¹La natorroi tau tu kota iato, sia tae’mo ukungan pasabu’i, sangadinna iatu Yerusalem la torro marampa’.

¹²Inde sia tu kasanggangan tu la Napata’pa PUANG lako mintu’ bangsa, tu ullaoi Yerusalem: la Napapoppong Puang tu duku’na ke marassanpi bendan, sia la pu’pu’ tu matanna lan lo’ko’na, sia la poppong tu lilana lan sadangna.

¹³Ondongpi, allo iato la den kamarukkan kapua dio lu tau iato mai, tu Napaden PUANG, naurunganni pantan la undammak limanna solana, sia pantan la unnangka’ limanna unnea solana.

¹⁴Ondongpi, ia duka tu Yehuda la urrarii Yerusalem, na iatu iananna mintu’ bangsa tiku lao la dirampun, iamotu bulaan, salaka sia pakean tarru’ buda.

¹⁵Sia iatu mintu’ darang, bagala’, unta, keledai sia mintu’ patuoan, tu lan kaponan surodadu iato la narua kasanggangan susite kasanggangan iate.

¹⁶Mintu’ tu torronapa tu mintu’ bangsa, tu ullaoi Yerusalem, la male, ke taunoi menomba lako olona Datu, iamo tu PUANGna mintu’ ma’dandan maritik, sia la umpakaraya allo kapua pekalumban.

¹⁷Apa umba-umba tu suku dao kuli’na padang tae’ namale lako Yerusalem la menomba lako olona Datu, iamotu PUANGna mintu’ ma’dandan maritik, manassa tae’ nala sae uran lako kalena.

¹⁸Sia iake tae’i namale sia sae tu sukunna to Mesir, tu tae’ nato’doi uran, la sae duka tu kasanggangan, tu la Naparampo PUANG lako mintu’ bangsa, tu tae’ namale umpakaraya allo kapua pekalumban.

¹⁹La susimote tu ukunganna to Mesir sia mintu’ bangsa, tu tae’ namale umpakaraya allo kapua pekalumban.

²⁰Allo iato la tisura’ dio lu mintu’ giring-giring darang susite nakua: Dipamaindanan PUANG, sia iatu mintu’ kurin lan banuanNa PUANG la susi pindan pa’pi’pikan dio tingayo inan pemalaran.

²¹Ondongpi mintu’ kurin lan Yerusalem sia lan Yehuda dipamaindanan PUANG, naurunganni mintu’ to memala’ ma’din sae sia la napantollo’i. Sia allo iato la tae’mo to Kanaan lan banuanNa PUANGna mintu’ ma’dandan maritik.