Read Toraja-Sa'dan ZAKHARIA 2 Bible Online

ZAKHARIA 2 - Toraja-Sa'dan bible

ZAKHARIA 2

¹Kubangunanni tu matangku, angku tiroi misa’ muane untoe ulang pesuka’.

²Mekutanamo’ kukua: Umba la muolai? Nabalimo’ nakua: La malena’ ussuka’ Yerusalem, la untiroi ba’tu la sangapai sangka’na sia landona.

³Manassa iatonna malemo lako tingayo tu malaeka’ kusipa’kadan, malemi tu misa’ malaeka’ senga’ umpessitammui,

⁴anna ma’kada lako tu malaeka’ senga’, nakua: Ma’dondoko male muma’kada lako tu to mangura, mukua: Iatu a’ganna Yerusalem la susi misa’ kota tang dibenteng, napobua’ kabudanna tau sia patuoan lan.

⁵Sia Aku kalena la napobenteng api tiku lao, kadanNa PUANG, sia la napokamala’biran lan.

⁶Madoi’komi, madoi’komi. Mallaikomi lan mai tondok rampe daanna lu! kadanNa PUANG, belanna mangkamokomi Kupatisambo’ lako a’pa’ matanna angin, kadanNa PUANG.

⁷Madoi’komi, lendokangkomi kalemi lako Sion, e kamu, tu torro sikandappi’ anak dara Babel.

⁸Belanna, inde sia tu kadanNa PUANGna mintu’ ma’dandan maritik, tu kamala’biranNa ussuana’, diona mintu’ bangsa, tu mangka umpangrampaikomi — belanna minda-minda tu urrumbukomi, iamo urrumbu mata taunNa — ,

⁹Nakua: Manassa la Kupakedo tu limangKu lako tau iato mai, anna pangrampai tu to mengkanorong lako kalena. Attu iato la mitandai, kumua mangkamo’ Nasua PUANGna mintu’ ma’dandan maritik.

¹⁰Mela’tekko sia parannu-rannuko, e anak dara Sion! belanna manassa la sae’Na angKu torro lan lu tangngamu, kadanNa PUANG.

¹¹Allo iato buda bangsa la mengkara’pa lako PUANG sia dadi taungKu. Sia la torroNa’ lan lu tangngamu. Attu iato la mutandai, kumua mangkamo’ Nasua PUANGna mintu’ ma’dandan maritik lako kalemu.

¹²Attu iato la Naala PUANG tu Yehuda la Napomana’ dao padang maindan sia iatu Yerusalem la Napilei langsa’ dukapa.

¹³Ma’pakappakomi, e mintu’ angge menono’, dio oloNa PUANG belanna ke’de’mo dio mai to’ inan maindanNa.