Read Toraja-Sa'dan ZAKHARIA 3 Bible Online

ZAKHARIA 3 - Toraja-Sa'dan bible

ZAKHARIA 3

¹Undinnato Napakitammo’ tu Yosua, tominaa kapua, bendan dio olona Malaeka’Na PUANG, anna bendan tu deata bulituk dio sa’de kananna la umparapa’i.

²Apa ma’kada tu PUANG lako deata bulituk, nakua: Nagarrakko PUANG, e deata bulituk, ondongpi PUANG, tu mangka umpilei langsa’ Yerusalem, la unggarrakko. Tae’raka na iate tu misa’ lalotin disintak lan mai api?

³Iatu Yosua ma’pakean mariga tonna bendan dio olona Malaeka’ iato.

⁴Ma’kadami tu Malaeka’ iato sia nakua lako tu tau iato mai, tu bendan dio oloNa: Lossokanni dio mai kalena tu pakean mariga. Mangkato ma’kadami lako Yosua, Nakua: Kupa’dei tu kakadakeammu dio mai kalemu, angKu pakeiko pakean pa’gauran.

⁵Ma’kadamo’ kukua: La dipassapui tali bate’ masero tu ulunna. Nataliimi tali bate’ masero tu ulunna sia napakei bayu lamba’, tonna bendan dio ren tu Malaeka’Na PUANG.

⁶Napakilalami Malaeka’Na PUANG tu Yosua, Nakua:

⁷Inde sia tu kadanNa PUANGna mintu’ ma’dandan maritik, Nakua: Iake muturu’i tu mintu’ lalanKu sia mukaritutui tu apa Kupatagerangko, manassa la muparenta tu banuangKu sia la mukampai duka tu tarampakKu, angKu elorangko male sola tu tau bendan inde te.

⁸Ma’perangiko, Yosua, tominaa kapua, la iko la mintu’ solamu tu unno’ko dio tingayomu — belanna iatu tau iato mai iamo muane dipotanda kalle-kallean — tonganna la Kupasae tu taungKu, iamo tu Taruk.

⁹Tonganna iatu batu, tu Kupadio tingayona Yosua — dio misa’ batu iato, nanii pitu mata — , Aku kalena la ussura’i tu sura’na, kadanNa PUANGna mintu’ ma’dandan maritik, sia sangallori la Kunii umputtai tu kakadakeanna tondok iate.

¹⁰Attu ia dukato, kadanNa PUANGna mintu’ ma’dandan maritik la pada mitambai tu solami diong lu garonto’ anggoro’ sia diong lu garonto’ saitun.