Read Toraja-Sa'dan ZAKHARIA 4 Bible Online

ZAKHARIA 4 - Toraja-Sa'dan bible

ZAKHARIA 4

¹Sulemi tu malaeka’ kusipa’kadan, anna tundanna’ susito untundan to mamma’.

²Ma’kadami lako kaleku nakua: Apara mutiro? Mebalimo’ kukua: Untirona’ misa’ tongkonan palita bulaan nasang, anna toppo’ daona lu tu inan minna’, pitu tu palitanna, susi duka tu sulingna pitu lako tu palita daona lu,

³sia da’dua garonto’ saitun untongloi daona lu, misa’ dio sa’de kananna na misa’ dio sa’de kairinna tu inan minna’.

⁴Mebalimo’ lako tu malaeka’ kusipa’kadan kukua: O puang, apara battuananna te?

⁵Mebalimi tu malaeka’ kusipa’kadan nakua: Tae’raka mutandai apara battuananna te? Ma’kadamo’ kukua: Tae’ kutandai, puang.

⁶Ma’kadami lako kaleku nakua: Inde sia tu kadanNa PUANG lako Zerubabel Nakua: Tangia tete dio kamatotoran sia tangia tete dio kamasa’garan, sangadinna tete dio PenaangKu, kadanNa PUANGna mintu’ ma’dandan maritik.

⁷Mindarako, e buntu malangka’? Dio tingayona Zerubabel la dadiko padang marante, la natassu’i tu batu daona lu naunnarrak-arrak tu tau, nakua: Salama’, salama’ lako kalena.

⁸Saemi tu kadanNa PUANG lako kaleku, Nakua:

⁹Mangkamo naoton Zerubabel te parandanganna te Banua iate, naia duka la ussundunni, ammi issanni kumua Nasuana’ PUANGna mintu’ ma’dandan maritik lako kalemi.

¹⁰Belanna mindara tu untapa’ allo nanii bitti’pa tu mintu’ apa? Manassa la parannu penaanna tu tau iato mai, ke natiroi tu batu petimbang lan lu limanna Zerubabel. — Iate pitu apa iate iamotu matanNa PUANG tu umpenunu mintu’ lino tiku lao.

¹¹Mebalina’ lako kukua: Apara battuananna tu da’dua garonto’ saitun tu dio kananna sia kairinna tongkonan palita iato?

¹²Ma’penduannamo’ ma’kada lako kukua: Apara battuananna tu da’dua tangke saitun, tu nalolongi mintu’ saitun susi bulaan unnola da’dua suling bulaan?

¹³Ma’kadami lako kaleku nakua: Tae’raka mutandai apara battuananna tu apa iato? Mebalimo’ kukua: Tae’, puang.

¹⁴Ma’kadami nakua: Iamote tu da’dua to diminnakki, tu bendan dio oloNa Puangna mintu’ lino.