Read Toraja-Sa'dan ZAKHARIA 8 Bible Online

ZAKHARIA 8 - Toraja-Sa'dan bible

ZAKHARIA 8

¹Undinnato saemi kadanNa PUANGna mintu’ ma’dandan maritik susite:

²Inde sia tu kadanNa PUANGna mintu’ ma’dandan maritik, Nakua: Lendu’ Kukamali’na tu Sion, angKu posara’i. Kukamali’ tongan, angKu posara’i.

³Inde sia tu kadanNa PUANG Nakua: La suleNa’ lako Sion, angKu torro lan Yerusalem; iatu Yerusalem la disangai kota kamarurusan, na iatu buntunNa PUANGna mintu’ ma’dandan maritik, la diganti buntu kamaindanan.

⁴Inde sia tu kadanNa PUANGna mintu’ ma’dandan maritik, Nakua: La den pole’ tu to matua muane sia baine unno’ko’ dio lu tana lapang Yerusalem, pantan untoe tekken, belanna tarru’ matuamo.

⁵Sia dio duka lu tana lapang kota iato la ponno tu pia muane sia pia baine maningo.

⁶Inde sia tu kadanNa PUANGna mintu’ ma’dandan maritik, Nakua: Moi nakalle-kallean tu mintu’ apa iate dio pentirona te bangsa torronapa, umbaniapa nala kalle-kallean dio pentiroKu? KadanNa PUANGna mintu’ ma’dandan maritik.

⁷Inde sia tu kadanNa PUANGna mintu’ ma’dandan maritik, Nakua: Tonganna la Kurampanan tu taungKu dio mai tondok kabu’tuan allo sia dio mai tondok kalambunan allo.

⁸La Kupasule tu tau iato mai anna torro lan Yerusalem. Tau iato mai la dadi taungKu na Aku la dadi Kapenombanna situang kamarurusan sia kamaloloan.

⁹Inde sia tu kadanNa PUANGna mintu’ ma’dandan maritik, Nakua: Pamatoto’i tu limammi, e kamu, tu urrangii te kada iate sun dipudukna nabi allo iate, tu tuo tonna dioton tu parandangan banuanNa PUANGna mintu’ ma’dandan maritik, iamotu Banua kabusungan, la dibangun.

¹⁰Belanna dolo dio mai attu iato tae’ naappa’ saro ra’ta’na tu tau, tang me’duk tu patuoanna; tae’ kamanamananna to male sia to sae napobua’ uali; ondong pissan Kuroso tu mintu’ tolino nasipakka.

¹¹Apa totemo tae’mo Kususi dolona lako te bangsa torronapa, kadanNa PUANGna mintu’ ma’dandan maritik.

¹²Belanna iatu banne diambo’ la dadi, iatu garonto’na anggoro’ la membua, iatu padang la membura sia iatu langi’ la umpato’do ambunna; angKu pa’kamasean nasangi te lako te bangsa torronapa la napomana’.

¹³Susitu mangkakomi dadi kada tampak ropu dio lu mintu’ bangsa, e to Yehuda sia to Israel, la susi dukakomito la dadi pa’passakke, belanna Kukamaseangkomi kasalamaran; da mimataku’, pamatoto’i tu limammi.

¹⁴Belanna inde sia tu kadanNa PUANGna mintu’ ma’dandan maritik, nakua: Susimoto tu tanan penaangKu la umparampoikomi kamandasan, tonna pare’dekki nene’ to dolomi tu ara’Ku, kadanNa PUANGna mintu’ ma’dandan maritik, Kuurunganni tang menassanmo,

¹⁵susi dukato te allo iate dennomo tanan penaangKu la umpogau’ melo lako Yerusalem sia lako to Yehuda; iamoto da mimataku’.

¹⁶Inde sia tu mintu’ apa la mipogau’, iamotu la sipokadangkomi tu tonganna, ma’paolaikomi salu lan lu babanganmi situang kamalamburan, anna bu’tu karapasan,

¹⁷sia da misitangnga’ kadake lan penaammi sia da miporai tu umpalao sumpa tang tongan, belanna Kukagi’gi’ te mintu’ apa iate, kadanNa PUANG.

¹⁸Sia rampo duka tu kadanNa PUANGna mintu’ ma’dandan maritik lako kaleku, Nakua:

¹⁹Inde sia tu kadanNa PUANGna mintu’ ma’dandan maritik, Nakua: Iatu pa’puasa lan bulan ma’penna’pa’na, ma’pellimanna, ma’pempitunna sia ma’pessangpulona la membali kasendean sia kaparannuan, ondongpi pa’maruasan ponno kapaimanan lako to Yehuda; iamoto sipatu la mikamali’ tu tonganna sia karapasan.

²⁰Inde sia tu kadanNa PUANGna mintu’ ma’dandan maritik, Nakua: La saeomo ba’tu pira-pira bangsa sia to umpa’tondokki buda kota,

²¹sia iatu tau lan misa’ kota la male lako misa’nao, nama’kada nakua: Maikomi anta pada male umpengkamoyai pa’kamaseanNa PUANG sia undaka’ PUANGna mintu’ ma’dandan maritik; morai dukana’ male lako.

²²Ondongpi, buda to sangpetayanan sia bangsa tarompo’ la sae undaka’ PUANGna mintu’ ma’dandan maritik dio Yerusalem sia umpengkamoyai pa’kamaseanNa PUANG.

²³Inde sia tu kadanNa PUANGna mintu’ ma’dandan maritik Nakua: Allo ia dukato la sangpulo tu tau dio mai mintu’ bangsa ma’rupa-rupa basana la untoe, ondongpi la natoe tongan tu tampak bayu lamba’na to Yahudi, anna ma’kada nakua: La moraikanni undi unturu’komi, belanna kirangimo, kumua Narondongkomi Puang Matua.