Read Toraja-Sa'dan ZAKHARIA 9 Bible Online

ZAKHARIA 9 - Toraja-Sa'dan bible

ZAKHARIA 9

¹Inde sia tu kada Napa’petanggungan Puang Matua, iamotu kadanNa PUANG. Iatu Puang diomo tondok Hadrakh, sia Damsyik tu inan Nanii torro, belanna PUANG, umpata’pai mata tu mintu’ to senga’, susi dukato tu mintu’ suku Israel;

²ondongpi ia duka tu Hamat, tu nasikandean sia iatu Tirus sola Sidon, moi nasangtumba madaona tu kapaissananna,

³sia moi nabangunan kalena benteng tu Tirus sia moi napopa’toppo’-toppo’ tu salaka susi barra’-barra’ sia bulaan butung pullan dio lu batatta.

⁴Manassa, la Natalo Puang sia la Natuan tu rinding tembo’ bentengna tama tasik, sia iatu kota la pura diballa api.

⁵La natiro Askelon anna mataku’, susi duka tu Gaza anna ma’parondo sia Ekron, belanna iatu apa narannuan la dipakasiri’; attu iato iatu datu la pa’de dio mai Gaza sia iatu Askelon tae’mo tau la untorroi.

⁶Lan Asdod la nanii torro tu to disese, sia la Kusabu’i tu mintu’ apa napokapua penaanna to Filistin.

⁷La Kupatoyang tu rara lan mai sadangna sia iatu apa megi’giran lan mai alla’ isinna sia ia duka tu torronapa la Napotau Kapenombanta, naurunganni butung to misa’ pangulu suku lan Yehuda, na iatu to Ekron la susito Yebus.

⁸La torroNa’ ungkampai banuangKu tiku lao unnea tuntunan surodadu tu male sule, sia tae’mo nala ullaoi tu to ma’pakario-rio, belanna totemo matangKu kalenamo untiroi.

⁹Sila’tekangko, e anak dara Sion, unnarrak-arrakko, e anak dara Yerusalem! Manassa iatu datummu saemo lako kalemu, malambu’ sia pasau’, umpamadiongan penaanna, sia ussakei keledai, iamotu keledai laki, anakna keledai birang.

¹⁰Attu iato la Kuputtai tu mintu’ kareta dio mai Efraim sia darang dio mai Yerusalem, sia ia duka tu pana dipake parari; sia la umpakalelean kamarampasan lako mintu’ bangsa, sia iatu kaparentanna la randuk dio mai tasik sae lako tasik sia dio mai Salu sae lako randan langi’.

¹¹La Kurampanan duka tu to dirampa dio lu kalemu lan mai bubun tu tae’ uainna tu belanna umpotoding rara kasibasseammu.

¹²La sulekomi tama kota benteng, e to ditarungku, tu den siapa rannunna; allo ia duka te Kupa’peissananni, kumua la Kupakkanniko melo manglokkon penduan.

¹³Belanna la Kue’teran Kaleku tu Yehuda susito pana, la Kupatorro dao pana tu Efraim, sia la Kusarrang tu anakmu, e Sion, sirari anakmu, e Yunani, sia la Kupadadiko misa’ padangna to lalong.

¹⁴La sombo tu PUANG lako tau iato mai sia iatu anak panaNa la tassu’ susito kila’ sia Puangta PUANG la umpannoni napiri tanduk sia la ke’de’ naturu’ angin bara’ rampe lo’na lu.

¹⁵PUANGna mintu’ ma’dandan maritik la urrerungi tu tau iato mai, naurunganni mangampello’, ondongpi nalullu’ tu batu pelobang; la mangiru’ tu tau iato mai, namareko napobua’ uai anggoro’, sia la ponno rara tu tau iato mai susi pindan pa’pi’pikan sia susi tetuk inan pemalaran.

¹⁶Allo iato, PUANG, Kapenombanna, la urrampananni tu tau iato mai susi domba ma’baanan; iatu taunNa susi tuntunan dombaNa, ondongpi sangtinti parimata dio makotaNa, tu la pandillak-dillak lan tondokNa.

¹⁷Manassa, lendu’ tongan ia kapuana kasalamaranna tu tondok iato, ondongpi lendu’ tongan ia kapuanna kamaballoanna! Iatu gandung umpamaloboran pia muane sia iatu uai anggoro’ ba’ru umpamarumbo pia baine.