Read Toraja-Sa'dan MALEAKHI 2 Bible Online

MALEAKHI 2 - Toraja-Sa'dan bible

MALEAKHI 2

¹Totemo, e mintu’ to minaa, kamu napatu te apa dipa’peissanan iate:

²Iake tae’i miperangii sia tae’ mipalan penaai, ammi pangke’i tu sangangKu, kadanNa PUANGna mintu’ ma’dandan maritik, la Kuparampo tu tampak ropu lako kalemi, sia la Kupopembali tampak ropu tu pa’passakkemi; ondongpi mangkamo Kupopembali tampak ropu, belanna tae’ mipalan penaai.

³Tonganna, la Kupa’peissanan tu tampak ropu lako bati’mi, sia tai la Kutampolakanni tu lindomi, iamotu tai pa’gaurammi, ondongpi la nariu’ sembangkomi tau inde to lako.

⁴Attu iato la mitandai, kumua Kupa’peissanammo te kada iate lako kalemi, kumua anna manda’ tu basseKu sola Lewi, kadanNa PUANGna mintu’ ma’dandan maritik.

⁵Iatu basseKu tu Kutanan sola, iamotu katuoan sia kamarampasan; mangkamo Kukamaseanni tu iannato, kumua anna mengkaola, anna kataku’Na’ sia nakagiangi tu sangangKu.

⁶Iatu pangadaran manappa’ diona Sukaran aluk lan sadangna na iatu kakelokan tae’ diappa’ dio pudukna. Lolang tu tau iato mai ussikadamakanNa’ situang kamarampasan sia bulo lollong, sia buda tau napatibalik dio mai kakadakean.

⁷Belanna iatu pudukna to minaa unnanna kapaissanan sia lan mai sadangna nanii tau undaka’ pangadaran diona Sukaran aluk, belanna iamo misa’ pesuanNa PUANGna mintu’ ma’dandan maritik.

⁸Apa iatu kamu sepangmokomi dio mai lalan pa’pangada’mi diona Sukaran aluk napobannang buda tau titodo; mipakadake tu basse sola Lewi, kadanNa PUANGna mintu’ ma’dandan maritik.

⁹Iamoto Kupopendadikomi to dilo’bo sia dipopengkadiongan dio tingayona mintu’ to buda, belanna tae’ mituru’i tu mintu’ lalanKu sia mipelindo tu tau, ke mipa’pangadaranni tu Sukaran aluk.

¹⁰Tae’raka namisa’ri Ambe’ta sola nasang? Tae’raka namisa’ri tu Puang Matua umpadadiki’? Ma’apari tala sipogauranra tang maruru’ sia umpamatuna basse nene’ to dolota?

¹¹Iatu Yehuda ma’gau’ tang maruru’mo sia iatu penggauran megiangan dipogau’mo lan Israel sia lan Yerusalem, belanna iatu Yehuda umpamatuna apa maseroNa PUANG, tu Nakamali’, sia umpobaine anakna deata to salian bangsa.

¹²Kenna pisanniori PUANG tu to ma’gau’ susito lan mai tendana Yakub, sae lako bati’na sia moi umpemalaran pemala’ lako PUANGna mintu’ ma’dandan maritik.

¹³Iatu ma’penduanna mipogau’, susite, iamotu mipasitutu’i uai matammi tu inan pemalaranNa PUANG, ke tumangi’komi sia sumarro, belanna tae’mo Nasailei tu pemala’ sia tae’mo Natarimai diong mai limammi butung to apa nakalo’ penaanNa.

¹⁴Sia ma’kadakomi mikua: Ma’apai to? Iamotu belanna PUANGmo tu sa’bi lan alla’mu anna bainemu, tommu mangurapa, tu munii tang maruru’mo totemo, moi na iamo dodo’mu sia baine tonganmu.

¹⁵Tae’ misa’ tau umpogau’i susito, tu batta’ penaanna, belanna apara nadaka’ tu tau iato misa’? Bati’na Puang Matua. Katangkinni tu penaammi, da mituru’ kamoraiammi sia da mima’gau’ tang maruru’ lako bainemi tommi mangurapa.

¹⁶Belanna Kukabiri’ tu kasitantangan, kadanNa PUANG, Kapenombanna Israel sia iatu kedona to umpasitutu’i kamasa’garan tu bayu lamba’na, kadanNa PUANGna mintu’ ma’dandan maritik. Iamoto, katangkinni tu penaammi, da mituru’ kamoraiammi sia da mima’gau’ tang maruru’.

¹⁷Mipabo’yok tu PUANG napobua’ mintu’ kadammi. Ammi ma’kada kumua: Apara kipabo’yokanNi? Iamotu belanna mikua: Minda-minda tu umpogau’ kadake iamo melo dio pentiroNa PUANG, na iatu to susito nakalo’ penaanNa; umbara Nanii tu Puang Matua umpaden ukungan?