Read Toraja-Sa'dan MATIUS 10 Bible Online

MATIUS 10 - Toraja-Sa'dan bible

MATIUS 10

¹Natambaimi tu anak gurunNa sang pulo dua, Nabenni kamatotoran la ungkuasai deata masussuk sia la urrambai sia la umpasoro’ mintu’ saki sia rammun.

²Inde sia tu sanganna tu rasulu’ sangpulo dua: Bunga’na Simon tu diganti Petrus, sia Andreas siulu’na; sia Yakobus, anakna Zebedeus, sia Yohanes siulu’na Yakobus;

³Filipus sia Bartolomeus; Tomas sia Matius passima; Yakobus anakna Alfeus sia Tadeus;

⁴sia Simon to parruk na Yudas Iskariot, tu mangka umpa’peturoan Yesu.

⁵Iamote tau sangpulo dua tu Nasua Yesu sia Napepasanan kumua: Da misepang lu lako lalan ma’palulako tondok to kapere’ sia da mitama kota to Samaria,

⁶sangadinna la’bi’ ke lu lakokomi domba pa’dena to Israel.

⁷Iammi male lako lalan pa’peissananni kumua: Mengkareke’mo tu Parenta Suruga.

⁸Pamalekei tu to masaki, patuoi tu to mate, pamondoi tu to golenan sia rambai tu deata masussuk. Belanna dikamasean bangkomi, dadi pa’kamasean duka bangi.

⁹Da mibaa bulaan ba’tu salaka ba’tu tambaga lan salipi’mi;

¹⁰ba’tu kandu’, ba’tu bayu da’dua, ba’tu lapik lentek, ba’tu tekkenraka, belanna iatu to mengkarang sipatu dipakande.

¹¹Iake tamakomi misa’ kota ba’tu kampong, tiroi dio tu to la sipatu, ammi torro dio, sae lako ke’de’mi pole’o inde to dio.

¹²Iammi tama banuanna tau, kambaroan marampa’i.

¹³Sia iake sipatui tu to lan banua iato, narampoi kamarampasammi tu banua iato; apa iake tae’i, nasule lakomora kalemi tu kamarampasammi.

¹⁴Minda-minda tu tang untarimakomi, ba’tu tang umperangii kadammi, sunkomi lan mai banua ba’tu kota iato, mipentambakanni tu barra’-barra’ dio pala’ lentekmi.

¹⁵Tonganna Kukua mati’ kumua, iake allo kadiparessan la maringngan ia tu parri’na tondok Sodom na Gomora anna parri’na kota iato.

¹⁶Pengkilalai, Kusuakomi male susi domba lako to’ guruk. Iamoto, dadi la ma’tangnga’komi susi ula’, sia la ma’bulo sanglampa, susi bu’ku.

¹⁷Apa kanandai tu tau, belanna la nabaakomi tama to’ kombongan ada’, sia la nabambakomi ulang lan lu banua pa’kombonganna.

¹⁸Sia la napakendekkomi lako olona to maraa sia datu tu belanna Aku, la napotanda sa’bi tau iato sia mintu’ to kapere’.

¹⁹Apa ianna pakendekkomi tau iato, da miposelangi kumua umba la mikua ba’tu apa tu la mipokada, belanna ia bangsiamoto attu iato, nala dipa’kamasean lako kalemi tu sipatunna la mipokada.

²⁰Belanna tae’ na kamu tu la ma’kada, sangadinna PenaanNa Ambe’mi tu la ma’kada lan kalemi.

²¹To siulu’ la ussorong penaanna siulu’na anna mate dipongko, sia ambe’ la ussorong penaanna anakna. Sia iatu mai pia la umbalibali indo’ ambe’na sia napa’pepatean.

²²La nakabiri’komi mintu’ tau tu belanna sangangKu, apa minda-minda tu mengkabatta’ sae lako ma’katampakanna, iamo la dikarimmanni.

²³Ianna pakario-riokomi tau lan misa’ kota, mallaikomi lako kota senga’, belanna tonganna tongan Kukua mati’, kumua tae’ naupu’ misalongi tu mintu’ kota Israel, ke tae’i nasae tu Anak rampan dilino.

²⁴Misa’ to digurui tae’ nadaoanni tu gurunna, ten dukato tu kaunan tae’ nadaoanni tu puangna.

²⁵Madaoammo tu to digurui ke pada-padai gurunna, ten dukato tu kaunan anna puangna. Iake nasangai tau Beelzebul tu ampu banua, ontong pissanpa tu to lan banuanna.

²⁶Iamoto, da mikataku’i tu tau iato, belanna moi misa’ duka tu kasamboanna, tae’ tang la dipasombona, sia moi misa’ duka tu membuninna, tae’ tang la kaissananna.

²⁷Iatu Kupokadannakomi lan malillinna, la mipokada lan to’ maserona; sia iatu dipa’bisikanna dio to’ talingammi, la mipetamban dao mai bubungan banua.

²⁸Da mikataku’i tu to umpatei batang kaleta, apa tang nakulle umpatei deatanta; apa iatu sipatunna tongan la mikataku’, Iari tu kuasanna ussanggangi nala batang kaleta nala deatanta, lan naraka.

²⁹Tang misa’raka seng lompo nabalukananni tau tu dena’ da’dua? Apa moi misa’ tae’ duka natobang rokko padang, ke tangia pangeloranNa Ambe’mi.

³⁰Iatu kamu Natoe nasang dukamo iaranna tu beluak dao ulummi.

³¹Tenmito, dadi da mimataku’: apa iate kamu te mandukomi losong na iatu dena’ buda.

³²Iamoto, minda-minda tu unnakuNa’ dio tingayona tau, la Kuaku duka dio oloNa Ambe’Ku dao suruga.

³³Apa minda-minda tu umpeonganniNa’ dio tingayona tau, la Kupeonganni duka dio oloNa Ambe’Ku dao suruga.

³⁴Da misangai kumua saeMo’ umbaa karapasan lan te lino. Tae’ Kusae umbaa karapasan, sangadinna la’bo’.

³⁵Belanna saeMo’ umpasisala tau anna ambe’na, sia anakna baine anna indo’na sia mimintunna baine anna matusanna baine,

³⁶sia to nasiruranan la mendadi to nasisallangan.

³⁷Minda-minda tu umpalosong ambe’na ba’tu indo’na nakamali’ na Aku, tae’ nasipatu lako Kaleku; sia minda-minda tu umpalosong anakna muane ba’tu anakna baine nakamali’ na Aku, tae’ nasipatu lako Kaleku.

³⁸Sia minda-minda tu tang unnendekan kayu pea’ta’na naundi urrundu’Na, tae’ nasipatu lako Kaleku.

³⁹Minda-minda tu ungkabu’tui katuoanna, iamo la kapa’dean katuoanna, sia minda-minda tu kapa’dean katuoanna, tu belanna Aku, iamo la ungkabu’tui.

⁴⁰Minda-minda tu untammuikomi, iamo untammuiNa’, na minda-minda tu untammuiNa’, iamo untammui tu To ussuaNa’.

⁴¹Minda-minda tu untammui misa’ nabi, belanna nabi sangananna iamo la ungkabu’tui kameloan susitu nakabu’tuinna nabi; na minda-minda untammui to malolo penaanna, belanna to malolo penaanna sangananna, iamo la ungkabu’tui kameloan susitu nakabu’tuinna misa’ to malolo penaanna.

⁴²Sia minda-minda tu umpairu’i moi anna sangirusanri uai sakke’ te to bongko iate, tu belanna anak guru sanganna, tonganna tongan Kukua mati’, tae’ nala pa’de len tu poleanna.