Read Toraja-Sa'dan MATIUS 11 Bible Online

MATIUS 11 - Toraja-Sa'dan bible

MATIUS 11

¹Iatonna upu’ Yesu umpepasananni susito lako tinde Anak gurunNa sangpulo dua, ke’de’Mi dio mai la lao mangada’i sia umpa’peissanan Kareba kaparannuan lan lu kotana tau.

²Iatonna rangii Yohanes tonna lan pa’tarungkuan tu diona mintu’na penggauranNa Kristus, mepasanmi lako anak gurunna,

³la umparampoi tu pekutananna lako Yesu kumua: Kamumoraka tu la sae, ba’tu den poleraka to senga’ misa’ sipatu la kipeagi?

⁴Mebalimi Yesu lako tinde tau, Nakua: Laomoko parampoanni Yohanes tu mintu’na miranginna sia mikitanna.

⁵Iamotu to buta pakita sia to kupi’ lumingka, to golenan dipamondo sia to taru parangi, sia to mate dipatuo sia Kareba kaparannuan dipa’peissanan lako to kalala’.

⁶Maupa’ tu to tang umpomatana’Na’.

⁷Iatonna male tinde tau, randukmi tu Yesu ma’ulelean lako to buda tu diona Yohanes, Nakua: Apara tu mangka lao mitiro lako padang pangallaran? Tilleraka sanglolo nagoyak angin?

⁸Apara pale’ tu mangka lao mitiro? To ma’pakean meloraka? Iatu to ma’pakean melo lan ia lu banua datu.

⁹Ba’tu ma’aparika pale’ to ammi lao? laorokomika untiro misa’ nabi? Kukuaria mati’: ondong ia namisa’ nabi.

¹⁰Belanna iamora te, tu disura’ a’ganna kumua: Tiromi ussuaNa’ pesuangKu undoloangKo, tu la umpasakka’ lalan dio oloMu.

¹¹Tonganna tongan Kukua mati’, kumua iatu mintu’nato dadi dio mai baine, tae’ bangpa misa’ duka bendan, tu mandu madaoan anna Yohanes Pa’dio’; apa iatu madiongna lan Parenta Suruga, iamoto tu mandu madaoan na ia.

¹²Tempon dio mai tonna Yohanes Pa’dio’ sae lako totemo masarrang kumarorak tu Parenta Suruga sia narabak to unnea parrangi.

¹³Belanna mintu’na nabi sia Sukaran aluk den pa’nubua’na sae lako tonna linona Yohanes.

¹⁴Sia iammi tarimai to: Iamora Elia la sae to.

¹⁵Minda-minda tu ke talinga, nama’perangi.

¹⁶Apara la Kupasusianni te to totemo? Susito pia unno’ko’ dio lu pasa’ nametamba-tamba lako solana,

¹⁷nakua: Mangkamokanni umpa’gandangangkomi, anna tae’ bangra miunnondo, mangkamokan umbating, natae’ bangra mimario.

¹⁸Belanna saemo tu Yohanes tang kumande sia mangiru’, nakuami tau: Nataba deata masussuk.

¹⁹Totemo saemo Anak rampan dilino kumande sia mangiru’, nakuaomi tau: Tiromi iti’ to barak sia pa’anggoro’, sangmanena passima sia to kadake gau’na. Apa iatu kakinaan natonganni penggauranna.

²⁰Tonna iato, randukmi Yesu untangdoi tu mai kota budanna tanda mangnga Napogau’ lan tu belanna tae’ nasang namengkatoba’, Nakua:

²¹Upu’ allomu, E Khorazim! Sumpu sumandakmu, e Betsaida! Belanna iakenna susinna nalan Tirus na Sidon nanni dadi tu mintu’na tanda mangnga mangka dadi lan lili’mi, tae’ natang masaimo ia namangka mengkatoba’ naumpembungku’ karoro’ sia au.

²²Apa Kukua mati’: iake allo kadiparessan la maringan ia parri’na Tirus na Sidon na iatu parri’mi.

²³Na iko, e Kapernaum! Ikomoraka la dipekalangka’i sae langngan langi’? La sarokko-rokkonako ria sae tama lino to mate, belanna iakenna lan Sodom nanii mangka dadi tu tanda mangnga dadi lan lili’mu, inang la tontong ia sae lako te attu iate.

²⁴Apa Kukua mati’; iake allo kadiparessan la maringngan ia parri’na tana Sodom anna parri’mu.

²⁵Iatonna iato umpakendekmi pa’pudian tu Yesu, Nakua: O Ambe’, Puangna langi’ na lino, KupudiKomi, belanna Misamboan to paissan sia to manarang te ianna te, anna lako pia Minii umpasomboi.

²⁶O Ambe’, belanna tenmoto tu pa’poraiamMi dio oloMi.

²⁷Mintu’na angge maritik mangkamo Nasorong Ambe’Ku lako Kaleku na moi misa’ tau tae’ untandai tu Anak, sangadinna Ambe’ manna, sia moi misa’ tau tae’ untandai tu Ambe’, sangadinna Anak manna sia iatu to la morai Napasomboan Anak.

²⁸Malekomi mai, e kamu mintu’ boyo’na sia dipapassanni magasanna, Akumote tu la umbenkomi kapelayoan.

²⁹Endekammi tu panglembaKu sia melada’komi lako Kaleku; belanna Aku malamma’ sia umpamadiongan penaa; ammi alan kapelayoan kalemi.

³⁰Belanna manaman tu panglembaKu disa’ding sia maringngan tu pamaangKu.