Read Toraja-Sa'dan MATIUS 12 Bible Online

MATIUS 12 - Toraja-Sa'dan bible

MATIUS 12

¹Iatonna attu iato siappa’ allo katorroan malemi tu Yesu ullendu’i to’ pa’lak gandung, tangdia’mi tu anak gurunNa, sangiammi ungkalette’i tu gandung anna kandei.

²Iatonna kitai to Farisi tu iannato, nakuami ungkuanNi: Tiromi, napogau’ bangmo anak gurumMi tu tang dipogau’na ke allo katorroan.

³Apa Nakua ungkuanni tinde tau: Tae’ paraka mibasai tu apa napogau’ Daud tonna tangdia’ sia iatu to nasiban?

⁴Matumbari natama banuanNa Puang Matua, anna kandei tu roti dipennoloan, tu pemalinna nakande sola tu to nasiban, sangadinna to minaa manna ia?

⁵Ba’tu tae’paraka ammi basai tu kada lan sura’ Sukaran aluk, kumua iake allo katorroan mintu’nato minaa lan banuanNa Puang Matua untengkai pemalinna allo katorroan anna tae’ naposalai?

⁶Apa Kukua mati’ kumua: inde sia Ia tu To ondong kapuanna anna banuanNa Puang Matua.

⁷Apa iake miissanmi battuananna te kada iate kumua: Kamamaseanri tu Kukamorai, tangia pemala’, manassa tae’ mipasalai tu to tang kasalan,

⁸belanna iatu Anak rampan dilino, Iamo puangna allo katorroan.

⁹Ke’de’mi inde to dio mai, Natama banua pa’kombonganna tau iato mai.

¹⁰Denmi dio misa’ to kope limanna sangbali; kumua anna den nanii umpasalai, mekutanami tinde tau lako Yesu, nakua: ma’dinraka umpamaleke tau, keallo katorroan?

¹¹Apa Nakua lako tinde tau: Mindarokomi kamu ke denkomi unnampui misa’ domba, natobang rokko garuang ke allo katorroan, tae’raka nala madomi’ untoei nariu’i diong mai?

¹²Apa pole’pi tu tau, tumbara ondongna mala’bi’na na iatu domba? Iamoto dadi ma’din duka umpogau’ kameloan ke allo katorroan.

¹³Nakuami Yesu lako tinde tau: Angka’i tu limammu! Naangka’mi, namatoto’ sule susitu lima sangbalinna.

¹⁴Sunmi tu to Farisi la unnea Yesu sia sipakulu-kulu, kumua umba la nakua umpatei.

¹⁵Apa iatonna issanmi Yesu tu iannato, malemi inde to dio mai; budami tau undi urrundu’I anNa pamaleke nasangi,

¹⁶sia Nagagai tu tau kumua da napa’peissananNi.

¹⁷Anna sundun tu kadanna nabi Yesaya, nakua:

¹⁸Iamote tu taungKu, tu to Kutonno’, pa’kaboro’Ku, naposende penaangKu; la Kuparondongi PenaangKu, na Ia umpa’peissananni lako to kapere’ tu kadiparessan.

¹⁹Tae’ Ia nala massigaga ba’tu metamba-tamba, sia moi misa’ duka tau tae’ la urrangii gamaranNa dio lu to’ kasitammuan lalan.

²⁰Iatu tille kumpang tae’ Nara’pakki, sia iatu palita ma’millo mannamo tae’ duka Nala umpa’dei, sae lako Napopatalona tu pangra’ta’Na Puang Matua.

²¹Anna iatu sanganNa narannuan mintu’ to kapere’.

²²Tonna iato nabaami lako Yesu tu to natamai deata masussuk misa’, to buta sia mamang; Napamatanami, anna ma’kada-kada tu to mamang iato sia pakita.

²³Napotirambanmi to buda sia nakua: Tang Iamoraka Anakna Daud te?

²⁴Apa iatonna rangii to Farisi tu iannato, nakuami: Iari Naurrambai deata masussuk te tau iate, pa’tunduannari Beelzebul, pangulunna deata.

²⁵Tu belanna Natandai tu tangnga’na tinde tau, Nakuami lako: Umba-umba tu parenta usseru-seru kalena, sanggang undinna; sia umba-umba tu tondok ba’tu to sangdapo’ ia kalena sisala-sala, tae’ nala manda’.

²⁶Sia iake la deata bulituk urrambai deata bulituk, tae’ nasalai tang ia kalena sisala-sala; naumba nakua la bendan tu parentana?

²⁷Sia iake la pa’tunduannara Beelzebul angKu rambai deata masussuk, mindao pa’tunduan, anna rambai anak gurummi? Iamoto dadi ia duka la dadi to mangra’ta’mi.

²⁸Apa iake Penaanna siamo Puang Matua angKu rambai deata masussuk, manassa nalambi’mokomi tu ParentaNa Puang Matua.

²⁹Ba’tu umbara la nakua la ma’din misa’ tau tama banuanna to mawatang sia umpangrampai banuanna, sangadi ke napungoi dolo tu to mawatang? Na undinna namane ma’din umpangrampai tu banuanna.

³⁰Minda-minda tu tang mirring lako Kaleku, iamo unneaNa’, sia minda-minda tu tang Kusisolan mangrampun, iamo ma’pasisarak-sarak.

³¹Iamoto angKu kua mati’: Mintu’na kasalanna tau sia kada solangna, la dipa’dei, apa umpa’kada solangi Penaa Masallo’, tae’ nala dipa’ dei.

³²Sia minda-minda ussa’bu’ kada untingoi Anak rampan dilino, la dipa’dei sia kasalanna; apa minda-minda umpokada kada untingoi Penaa Masallo’, tae’ nala dipa’dei kasalanna, la lan te lino, la lan lino undi.

³³Umba-umbannamo mipokada, mikuaraka melo tu kayu iato, melo duka buanna, mikuaraka kadake tu kayu iato, kadake duka buanna. Belanna buannari dinii untandai tu kayu.

³⁴E bati’ ula’ rame, umba la mikua umpokadai tu melona, anna kamu kalena to kadake? Belanna kala’biammira diong penaa anna ma’kada tu puduk.

³⁵Iatu to melo penaanna umpasun siami melona dio mai anggenna melona lan lu batu ba’tangna; na iatu to kadake penaanna umpasun siami kadakena dio mai anggenna kadakena lan lu batu ba’tangna.

³⁶Apa Kukua mati’: Iatu diona mintu’na kada tang kebattuan, tu napokada tau, pada la napenandai ke allo kadiparessan.

³⁷Belanna diona kadammu la dinii untonganangko, sia kadammu duka la dinii umpasalako.

³⁸Tonna iato den ba’tu pira-pira pandita Sura’ sia to Farisi umbali sia ma’kada nakua: O Guru la moraikanni untiro misa’ tanda kuasamMi.

³⁹Apa mebali sia Nakua ungkuanni tinde tau: Misa’ bangsa kadake sia pasandak salu lako rampanan kapa’ la morai bang ungkita tanda kakuasan: apa tae’ nala diben tanda, sangadinna tanda kalle-kallean diona nabi Yunus.

⁴⁰Belanna susi nabi Yunus tallung allo tallung bongi lan tambuk bale kapua, susi dukato tu Anak rampan dilino la lan maririnna litak tallung allo tallung bongi masainna.

⁴¹Iake allo kadiparessan la ke’de’ tu to Niniwe sisola tau totemo te sia la napasala, apa mengkatoba’mo belanna pangadaranna Yunus; anna tiromi, inde Ia tu ondongna na Yunus.

⁴²Iatu datu baine lo’ mai pollo’na uai la ke’de’ ke allo kadiparessan sisola tau totemo te anna pasalai, belanna iatu datu iato ke’de’ lo’ mai engkokna padang la umperangii kakinaanna Salomo; anna tiromi: inde Ia tu ondongna na Salomo.

⁴³Apa ianna sunmo tu deata masussuk lan mai tau, sumayomi dio lu padang rangke sia undaka’ pelayoan, apa tae’ nakabu’tui.

⁴⁴Nakuami: La sulemo’ lako banuangku, tu inan mangka kunii tassu’; ianna saemo, nakarampoimi tu inan iato lo’bangmo sia mangkamo disapui sia dikassa’i.

⁴⁵Undinna lao pole’ omi untambai deata senga’ pitu nasisolan, tu masussukna pissan na ia, natama namembanua lan; dadi ma’katampakanna ondong pissanmi masua-suanna tu to natamai na iatonna dolona. Ten dukamoto la dadi lako te bangsa kadake.

⁴⁶Marassan bangsia tu Yesu sipa’ulelean tu to buda, Nakitai tu indo’Na sia siulu’Na ke’de’ dio salian la morai ussipa’kadanNi.

⁴⁷Nakuami tau misa’ lako: Tiroi, tu indo’Mi sua siulu’Mi ke’de’ bangmo dio salian, la morai ussipa’kadangKomi.

⁴⁸Nakuami mebali lako tu to ungkuanNi: Mindara tu indo’Ku sia mindara tu mai siulu’Ku?

⁴⁹Napasayoimi limanNa tu anak gurunNa sia Nakua: Kitami, iari indo’Ku sia siulu’Ku te mai!

⁵⁰Belanna minda-minda tu umpogau’ pa’poraianNa Ambe’Ku dao suruga, iamoto tu siulu’Ku muane sia anak darangKu sia indo’Ku.