Read Toraja-Sa'dan MATIUS 13 Bible Online

MATIUS 13 - Toraja-Sa'dan bible

MATIUS 13

¹Iatonna allo iato sunmi tu Yesu lan mai banua iato, Naunno’ko’ dio randan tasik.

²Budami tau sae sirampun lako Kalena. Iamoto Nakendek langngan misa’ lopi Naunno’ko’, anna ke’de’ nasang bang tu to buda dio randan tasik.

³Budami tu Napokadanni Naalan pa’pasusian, Nakua: Den misa’ to mangambo’ sun la unnambo’ banne;

⁴iatonna marassanmo mangambo’, denmi pira ta’pa rokko biring lalan, saemi manuk-manuk napura ungkandei.

⁵Den pira ta’pa rokko to’ batu-batu, tae’ nabuda litak dio; nata’pa tuo, belanna tae’ namandalan litakna.

⁶Apa iatonna kendekmo allo, malayumi sia belanna tae’ namennuaka’, marangkemi.

⁷Den duka pira tu ta’pa tama tangnga to’ duri, napada tuo duri nataloi tu banne.

⁸Sia den pira tu ta’pa rokko to’ padang lunak namembua, den manglokkon pessaratu’, den pennannan pulona den pentallungpulo.

⁹Minda-minda tu ketalinga, nama’perangi.

¹⁰Saemi tu anak gurunNa nakua lako: Ma’apari amMi ala pa’pasusian ma’pangada’ unnada’i tu tau?

¹¹Mebalimi sia Nakua ungkuanni tu tau: Iatu kamu dibenkomi pa’kamasean la unnissanni tu rasia diona Parenta Suruga, apa iatu mati’ tau tae’ ia dikamaseanni.

¹²Belanna minda-minda tu den dio, la diben dukapa lako, anna kala’bian pissan. Apa minda-minda tu tae’ dio, la dialai pissan dio mai moi iatu dionamo kalena.

¹³Iamoto angKu ala pa’pasusian umpa’kadai tu tau, belanna iatu mati’ tau pakita tang pakita, sia parangi tang parangi ba’tu tang paissan.

¹⁴Nasusito disundunnimi lako tinde tau tu kadanna nabi Yesaya, tu nakua: Pa’perangimmi la parangi, apa tae’ mila unnissan lenni, sia pentiromi la pakita, apa tae’ mikanassai.

¹⁵Belanna makarra’mo penaanna te bangsa iate, sia bantangmo pa’peranginna, sia napamamma’mo tu matanna, kumua da anna pakita tu matanna, sia parangi tu talinganna, sia mangingaran tu penaanna, namengkatoba’ sule angKu pamalekei.

¹⁶Apa maupa’ kamu tu matammi belanna pakita, sia talingammi belanna parangi.

¹⁷Belanna tonganna tongan Kukua mati’; Budamo nabi sia to malolo penaanna maduang la ungkitai te mintu’na mikitanna, anna tae’ nabelai ungkitai; sia la urrangii tu mintu’na miranginna, na tae’ duka nabelai urrangii.

¹⁸Dadi perangiimi kamu battuanna tu pa’pasusian to unnambo’banne!

¹⁹Iatu mintu’nato urrangii tu diona Parenta Suruga iato, natae’ napemanassai, saemi to bulituk unnalai tu apa diambo’ tama penaanna; iamoto tu tiambo’na dio biring lalan.

²⁰Apa iatu tiambo’na dio to’ batu-batu, iamotu to urrangii tu kada iato, naparannu len penaanna ta’pa untarimai;

²¹apa tae’ namennuaka’ lan penaanna, sangadinna sattu’ri, nanii mananna’. Ianna sae peroso ba’tu pa’pakario-rio tu diona kada iato, ta’pa napamo’dongmi tu penaanna.

²²Na iatu tiambo’na tama tangnga to’ duri, iamotu to urrangii tu kada iato, apa nataloi sara’ lan te lino sola pea’panna kasugiran tu kada iato, naurunganni tang membua.

²³Na iatu tiambo’na rokko to’ padang lunak, iamotu to urrangii tu kada iato anna pemanassai; namembua melo tongan, naumpakendek burana, den manglokkon pessaratu’, den pennannan pulona, den pentallungpulo.

²⁴Napokada pole’omi tu pa’pasusian senga’ misa’ dio tingayona tinde tau, Nakua: Iatu Parenta Suruga susi misa’ to unnambo’ banne melo dio umanna;

²⁵na iatonna mamma’mo tau, saemi to mabiri’ lako kalena unnambo’i pole’i pare-pare tama tu banne, anna male.

²⁶Na iamira tonna kendek sia membua, namane dikita tu pare-pare.

²⁷Saemi tu mai kaunanna tinde to ma’uma sia nakua lako: Umbaraka nakua na banne melo sia tu miambo’ dio umammi? Naumba ia nanii sae tu pare-pare?

²⁸Nakuami mebali lako tau iato mai: To mabiri’ ia, tu umpogau’i to. Nakuami tu mai kaunanna lako: Miporai siaraka, kilao urrampunni tu pare-pare?

²⁹Nakuami: Da’ito, belanna iake la laoi mirampun tu pare-pare, umbai la mentuang tu pare tilampi’ sola.

³⁰Da’ito anna tuo bangpa sola sae lako peparean, na iapa ke peparean angku kuanni tu to mepare kumua: Rampunni dolo tu pare-pare sia pori sisanguyunni anna diballa, apa iatu pare pakissinni langngan alangku.

³¹Napokada pole’omi tu pa’pasusian senga’ misa’ dio tingayona tinde tau, Nakua: Iatu Parenta Suruga susi lise’ sawi sanglise’, naala tau natananni lan pa’lakna.

³²Tonganna iamo bitti’na tu mintu’na uluanna lise’ tananan, apa ianna tuomo, kapuami na iatu mintu’na utan, sia mengkayu, anna ma’din nanii manuk-manuk dao mai langi’ sae mentiongan tu mai tangkena.

³³Sia misa’ dukapa pa’pasusian senga’ Napokadanni tu tau Nakua: Iatu Parenta Suruga susi ragi naala misa’ baine, napatamai to’ ta’pung tallung bakku’, anna silele messu’ sia lobo’.

³⁴Mintu’nate naalan pa’pasusian Yesu Napokadan to buda, sia tae’ nama’kada lako tau ke tang pa’pasusian.

³⁵Kumua anna sundun tu napokadanna nabi nakua: La umbuangNa’ kada unnala pa’pasusian, umpasomboNa’ apa kabunian tempon dio mai mai dadinna lino.

³⁶Undinnato, Nasuami Yesu male tu to buda, anNa male lako banuanNa. Saemi tu anak gurunNa lako Kalena sia nakua: Pokadangkan battuananna tu pa’pasusian pare-pare dio uma.

³⁷Nabalimi Nakua: Iatu to unnambo’ banne melo, iamotu Anak rampan dilino;

³⁸na iatu uma, iamote lino; na iatu banne melo, iamotu mai to dianak lan Parenta iato; na iatu pare-pare, iamotu anak to bulituk.

³⁹Na iatu uali unnambo’ pare-pare, iamotu deata bulituk; na iatu kapeparean, iamotu allo katampakanna te lino; na iatu to mepare, iamotu mintu’ malaeka’.

⁴⁰Dadi susitu pare-pare dirampun napura diballa api, ten dukamoto tu la dadi ke allo katampakannai te lino.

⁴¹La Nasua Anak rampan dilino tu malaeka’Na, anna rampunni tu mintu’na patua’ ba’tangna sia to umpogau’ kabulitukan lan mai ParentaNa.

⁴²Anna dipembuangan tama dapo’ nanii api; indemoto nanii katumangiran sia kasisangeran isi.

⁴³Iake attu iato la parrang susi allo tu mintu’ to malolo penaanna lan Parentana Ambe’Na. Minda-minda tu ketalinga, nama’perangi.

⁴⁴Iatu Parenta Suruga butung ianan kapua angga’na membuni diong padang, nakabu’tui tau, nabuni pole’oi; belanna kaparannuanna, malemi umbalukan nasangi tu mintu’ apa dio kalena, anna allii tu padang iato.

⁴⁵Sia iatu Parenta Suruga, butung misa’ to ma’balili undaka’ mattiara me’lok.

⁴⁶Ianna kabu’tuimi tu mattiara masu’lik allinna, malemi umbalukanni tu mintu’ apa dio kalena, anna allii tu mattiara iato.

⁴⁷Sia ia duka tu Parenta Suruga butung puka, nae’te’ tau diong tasik sia umpurru’ ma’rupa-rupa bale.

⁴⁸Ianna ponnomo, nariu’mi tau langngan randanan, naunno’ko’ umpilei, iatu melona napatama pa’pannianna, apa iatu kadakena natibean.

⁴⁹Susimo la dadi to ke katampakannai lino: mintu’na malaeka’ la sun ussarakki tu mintu’ to kadake dio mai to malolo penaanna.

⁵⁰Anna pembuanganni tama dapo’ nanii api; indemoto nanii katumangiran sia kasisangeran isi.

⁵¹Mikanassamoraka te mintu’na te? Nakuami lako: Kikanassamo.

⁵²Nakuami Yesu ungkuanni: Iamoto minda-minda tu pandita Sura’, tu digurui lan Parenta Suruga, iamo butung misa’ to makaka, umpatassu’i diong mai inan pangannana tu bangla’na sia masainnamo.

⁵³Iatonna upu’mo Yesu umpokadai tu mintu’na pa’pasusian iato, ke’de’Mi inde to dio mai.

⁵⁴Tonna rampomo lako tondok Nanii lobo’ Naada’imi tu tau lan lu banua pa’kombonganna, anna mangnga tu tau sia nakua: Umbara Ia Nanii te Tau iate unnalai tu kamatarrusan susito, sia iatu tanda mangnga?

⁵⁵Tang anak pande kayuraka te? Sia tang disangaraka Maria tu indo’Na sia iatu mai siulu’Na, Yakobus sia Yusuf sia Simon sia Yudas?

⁵⁶Sia iatu siulu’Na baine tang inde nasang siaraka te mai tasisolan? Naumbaraka Ia Nanii unnalai te mintu’na te?

⁵⁷Napomatana’mi tinde tau tu diona Yesu. Apa Nakua Yesu lako tinde tau: Misa’ nabi tae’ natang dibilang, sangadinna lan tondokna sia lan tananan dapo’na.

⁵⁸Tae’ra nabuda tanda mangnga Napogau’ inde to dio, belanna tae’ napatonganNi tau.