Read Toraja-Sa'dan MATIUS 14 Bible Online

MATIUS 14 - Toraja-Sa'dan bible

MATIUS 14

¹Iatonna iato napelelemi Herodes, tu digente’ datu sangtepona tondok, tu diona karebanNa Yesu.

²Nakuami tu datu lako solana: Yohanes Pa’dio’mo tu; malimbangunmo diong mai to’ to mate, iamoto nakedo tu mintu’ kamatotoran lan kalena umpogau’ tanda mangnga.

³Iatu Herodes mangkamo untingkan Yohanes anna pungoi, napatamai pa’tarungkuan tu belanna Herodias bainena Filipus, siulu’na.

⁴Belanna mangkamo ma’kada lako Herodes tu Yohanes nakua: Pemali ke mipobainei.

⁵La moraimi Herodes umpatei, apa mataku’ siao lako to buda belanna inang nasanga tau nabi tu Yohanes.

⁶Apa iatonna pa’maruasan allo kadadianna Herodes, ma’gellu’mi tu anakna baine Herodias lan tangnga tau, naposendei penaanna datu.

⁷Iamoto anna massumpa tu Herodes umpokadai, la umbenni apa-apa tu napalaku.

⁸Iatinde pia inang mangkamo napatunduk indo’na, iamoto nama’kada nakua: Tabenmo’ mai tu ulunna Yohanes Pa’dio’ indete, diong misa’ pindan.

⁹Massemi penaanna tu datu, apa belanna iamotu sumpana sia belanna iamotu to nasisolan ma’talimbungan kumande, napesuammi la umbenni lako.

¹⁰Nasuami tu tau lao umpoloi tu ulunna Yohanes lan pa’tarungkuan.

¹¹Nabaami tau tu ulunna diong pindan, napennoloanni lako tinde pia baine, nabaai lako indo’na.

¹²Saemi tu anak gurunna Yohanes unnalai tu batang rabukna, anna peliangi; nalao tinde tau umpokadai lako Yesu.

¹³Iatonna rangii Yesu tu kareba iato, umpaseremi Kalena, inde to dio mai, Namale misa ma’lembang lako to’ kasalanna. Tonna rangii to buda tu iannato, pada sunmi lan mai tondokna naundi urrundu’I unnola gantanan.

¹⁴Rampomi tu Yesu, Nakitai tu tau lendu’ budanna; mamassengmi lako tau iato mai, Napamalekei tu mai mintu’na masakinna.

¹⁵Iatonna makaroenmo, saemi tu anak gurunNa lako sia nakua: Iatu inan iate to’kasalan, sia la bongi dukamo, melo ke Misuami te mai tau male, nalao unnalli kande dio lu tondok.

¹⁶Apa Nakua Yesu lako tinde tau; Dai’mito namaleo tu mati’ tau, kamumo umpakandei.

¹⁷Nakuami tu anak gurunNa lako: Tae’ bang apa inde, sa’bamora roti lima na bale da’dua.

¹⁸Nakuami: Banna’ mai.

¹⁹Nasuami tu to buda unno’ko dio to’ riu; Naalami tu roti lima na bale da’dua, Namentingara langngan langi’ sia massambayang, Namane untepu-tepui tu roti, Nabenni anak gurunNa, na anak gurunNa umben pole’i to buda.

²⁰Kumandemi sola nasangi sadia’na. Naalaimi tau tu roti sesanna tu mangkanna ditepu-tepu sangpulo dua karandang ponno.

²¹Iatu to kumande agi-agi limangsa’bu tu muane, diboko’pa tu mai baine sia pia.

²²Ta’pa Napasassa’mi tu anak gurunNa kendek langngan lembang, la ma’lembang dolo lian, tonna marassan ussuai sule tu to buda.

²³Iatonna mangkamo ussuai male sule tu to buda, kendekmi langngan misa’ tanete la massambayang. Tonna la bongimo, torro bangmi dao misa-misaI.

²⁴Iatinde lembang ma’tangnga tasikmo, nalendu’ ia maparri’na napobua’ bombang, belanna angin ma’sissang.

²⁵Iatonna dannarimo saemi tu Yesu umpellambi’i, untete uai tasik.

²⁶Iatonna kitaI anak gurunNa untete uai tasik, tiramban nasangmi sia nakua: Bombo ia tu! Sikarrakammi belanna kamatakuranna.

²⁷Apa ta’pa Napa’kadai Yesu, Nakua: Parapa’i tu penaammi, Akumote anna, da mimataku’.

²⁸Mebalimi Petrus nakua lako: O Puang, iake Kamu tonganmo, suana’ angku male mati’ untete uai tasik.

²⁹Nakuami: Maimoko. Mengkalaomi tu Petrus dao mai lembang, nama’lingka untete uai la umpellambi’i Yesu.

³⁰Apa iatonna tiromi tu bara’, mataku’mi; sia iatonna la tallanmo, kumarrak-marrakmi, nakua: O Puang kanana’ina’!

³¹Tikarami tu Yesu ussorongan limanNa. Natoei sia Nakua ungkuanni: E to tangkan ma’patongan, ma’apai anna bata penaammu?

³²Iatonna kendekmo langngan lembang, radanmi tu angin.

³³Sangsaeammi tu mintu’ to lan lembang tukku umpennoloi Yesu sia nakua: Kamu tonganmo tu AnakNa Puang Matua.

³⁴Malemi ma’lembang, narampo lako gantananna dio Genesaret.

³⁵Iatonna kanassami pa’tondokan tu Yesu, mesuami tu tau lako mintu’na tondok untikui, nasae tu tau umbaai tu mintu’ to masaki;

³⁶malakumi tinde tau lako kumua anna kaka’ bangi tu rombe sambu’Na. Padami tau ungkaka’I padami maleke.