Read Toraja-Sa'dan MATIUS 15 Bible Online

MATIUS 15 - Toraja-Sa'dan bible

MATIUS 15

¹Tonna iato, saemi lako Yesu tu mai to Farisi sia pandita Sura’ dio mai Yerusalem sia nakua:

²Ma’apari tu anak gurumMi anna lendai tu aluk panganna to dolo? Belanna tae’ nabasei tu limanna, ke la kumandei.

³Mebalimi Yesu sia Nakua ungkuanni tinde tau: Ma’apai anna kamu duka untengkai Sukaran alukNa Puang Matua tu belanna aluk panganna to dolomi?

⁴Belanna Nakua Puang Matua: Kasiri’i tu ambe’mu sia indo’mu sia: Minda-minda unggatai ambe’na ba’tu indo’na, iamo la mate dipongko.

⁵Apa mikua kamu: Minda-minda tu ma’kada lako ambe’na ba’tu indo’na kumua: Iatu la mipotuona tu lu diona mai kaleku, iamo kupenomban (lako Puang Matua);

⁶tae’mo namanggi’ tau la ungkasiri’opi tu ambe’na ba’tu indo’na. Susimoto tu kaumpa’deimmi bisaranNa Puang Matua, tu belanna aluk panganna to dolomi.

⁷E to belo puduk, tonganna bang tu apa mangka napoparunde nabi Yesaya pirambongi’ tu diona kamu, kumua:

⁸Manassa iate tau iate pudukna manna ungkasiri’Na’, apa iatu penaanna tae’ nalattu’ lako Kaleku.

⁹Tae’ bua’na to tau iato umpenombaiNa’, belanna umpa’pangadaran panganna napondok tolino.

¹⁰Natambaimi tu to buda, Nama’kada lako Nakua: Perangiimi ammi issanni!

¹¹Tae’ ia na iatu apa lu tama sadang tu urruttakki tau, sangadinna iari tu lu lanna mai sadang, iamo iato tu urruttakki tau.

¹²Pakalan saemi tu anak gurunNa, nakua lako: Miissan siaraka kumua mapa’di’ penaa tu to Farisi, tonna rangii tu kada susi to?

¹³Mebalimi Nakua: Umba-umba tu tananan, tu tang Natanan Ambe’Ku dao suruga, la dilampi’i.

¹⁴Elo’na ia namale. Perenden butanna ia to buta tu tau iatu mati’. Iake to buta urrenden to buta, inang la tobang sola duai rokko garuang.

¹⁵Mebalimi Petrus sia nakua lako: Pokadangkan battuananna to pa’pasusian iato.

¹⁶Apa Nakua Yesu: Tangkan dukaparaka mitandai melo sae lako totemo?

¹⁷Tae’paraka miissanni, kumua apa-apa tu lu tama sadang, tarru’ rokko tambuk nadipasun rokko pekkueran?

¹⁸Apa iatu apa sun dio puduk, iamo ia lu lan mai penaa; iamo ia to tu urruttakki tau.

¹⁹Belanna lan mai penaa sun tu tangnga’ kadake, kapapatean, pasandak salu lako rampanan kapa’, gau’ sala, kabokoan, sa’bi tang tongan, kada solang;

²⁰ia nasangmo ia te ianna te tu urruttakki tau, apa iatu kumande tang membase dolo, tae’ ia na ia urruttakki tau to.

²¹Ke’de’mi tu Yesu indeto dio mai, Namale misa lako lili’na Tirus na Sidon.

²²Denmi misa’ baine to Kanaan lu dio mai parenta iato sae nametamba-tamba nakua: O Puang, o Anakna Daud, kamaseina’ dikka’ belanna iatu anakku baine, nataba deata masussuk, napandasa tongan.

²³Apa moi sangbuku duka kada tae’ Napebalian lako baine iato. Saemi tu anak gurunNa urreke’I napalakui nakua: suai tu baine iatu male, belanna undi bang melalla-lalla dio boko’ta.

²⁴Mebalimi Nakua: Tae’ra Kudisua lako senga’na sangadinna lako mintu’ domba pa’dena to Israel.

²⁵Saemi tinde baine tukku umpennoloI, nakua: O Puang, tulungna’ dikka’!

²⁶Apa mebali, Nakua: Tae’ napato’ dialai tu kande dio mai pia, nadibuangan asu.

²⁷Nakuami tinde baine: Tonganna Puang, apa iatu asu ungkande duka mintu’ kande mara’, tu rondonna dao mai medana puangna.

²⁸Mebalimi Yesu, sia Nakua lako: E baine! matoto’ tongan kapatonganammu; dadimo lako kalemu susitu mukamorainna. Matana bangsiami tu anakna baine to attu iato.

²⁹Ke’de’mi tu Yesu inde to dio mai, Namale urrundunan biring tasik Galilea; kendekmi langngan misa’ tanete, Naunno’ko’ dao.

³⁰Budami tu tau sae lako Kalena umbaa to kupi’ sia to kope limanna sia to buta sia to mamang, sia buda to senga’ natarru’ umpatorroi diong to’ lentekNa Yesu. Napamalekemi tu tau, naurunganni mangnga bangmi

³¹tu to buda, untiroi tu to mamang ma’kada-kada, to kope limanna matoto’, sia to kupi’ lumingka, sia to buta pakita; napakala’bi’mi tu Kapenombanna to Israel.

³²Natambaimi Yesu tu anak GurunNa, Nakuami: MamassengNa’ untiroi te to buda, belanna tallung allomo Kusisolan, na tae’ bang apa dio lu la nakande, na tae’ Kumorai la ussua tangdia’ bangi male sule, apa limpu manii lako lalan.

³³Nakuami tu anak gurunNa lako: Umbara la tanii unnala roti pada budanna to, indete padang pangallaran la dipediaranni te tau pada to?

³⁴Nakuami Yesu lako: Pirara roti iti’? Nakuami: Pitu na bale’-bale’ sidi’.

³⁵Nasuami tu to buda unno’ko’ rokko padang.

³⁶Naalami tu roti pitu sia iatu bale, Nama’kurre sumanga’ Natepu-tepui, Nabenni anak gurunNa, na anak gurunNa pole’ o umbenni to buda.

³⁷Kumandemi sola nasangi sadia’na; naalaimi tau tu roti sesanna, tu mangkanna ditepu-tepu, pitu baka ponno.

³⁸Iatu to kumande patangsa’bu tu muane, diboko’pa tu mai baine sia pia.

³⁹Iatonna suami male tu to buda, kendekmi langngan lembang, Narampo lako lili’na Magadan.