Read Toraja-Sa'dan MATIUS 16 Bible Online

MATIUS 16 - Toraja-Sa'dan bible

MATIUS 16

¹Saemi tu to Farisi sia to Saduki la untoba Yesu, umpalakui lako la Napakitan misa’ tanda kakuasan dao mai langi’.

²Apa mebali sia Nakua ungkuanni: Ianna kekaroen mikuami: Manta’ allo, belanna masero langi’.

³Sia ianna melambi’na mikuami: La ma’paliu bara’ te allo iate, belanna mararang langi’ sia maru’gun. Tonganna iatu lilinganna langi’ manarangkomi umpasisengaranni, apa iatu tanda makalaen-laenna attu iate tae’ mitandai.

⁴Misa’ bangsa kadake sia pasandak salu lako rampanan kapa’ la morai bang ungkita tanda kakuasan, anna tae’ nala diben tanda, sangadinna tanda kalle-kallean diona nabi Yunus. Natampemi tu tau iato, Namale.

⁵Iatonna rampomo tu anak gurunNa lian, tang nakilalaimi umbaa roti.

⁶Nakuami Yesu ungkuanni: Pengkilalai tongan-tonganni, penandaikomi kalemi dio mai raginna to Farisi sia to Saduki.

⁷Sipa’kada-kada kalenami, nakua: Ia sia Nama’kada susi to, belanna tae’ tabaa roti.

⁸Iatonna issanmi Yesu tu diongna penaanna, Nakuami ungkuanni: E to tangkan ma’patongan, ma’apari ammi sipa’kada-kada misara, iaraka tu kataeranna roti dio kalemi?

⁹Tae’paraka miissanni sia tae’moraka mikilalai tu diona roti lima anna limangsa’bu tau, napirang karandangra tu sesanna mangka mialai?

¹⁰Ba’tu iatu diona roti pitu na patang sa’bu tau, napirang bakara tu sesanna mangka mialai?

¹¹Umba nakua natae’ miissanni kumua tangia diona roti tu Kupokada lako kalemi? Apa penandaikomi kalemi dio mai raginna to Farisi sia to Saduki.

¹²Maneri naissan tinde tau, kumua tangia Napokada tu la umpenandai kalena dio mai ragi, sangadinna dio mai pangadaranna to Farisi sia to Saduki.

¹³Iatonna rampomo Yesu lako lili’na Kaisarea Filipi, mekutanami lako anak gurunNa Nakua: Mindara nasanganni tau tu Anak rampan dilino?

¹⁴Nakuami tinde tau: Den tu kumua: Yohanes Pa’dio’; sia den tu kumua Elia; den pole’o tu kumua: Yeremia, ba’tu umbannaraka misa’ tu mintu’ nabi.

¹⁵Nakuami lako: Apa iake kamu misangaRa’ minda?

¹⁶Mebalimi Simon Petrus, nakua: Kamumo Kristus, AnakNa Puang Matontongan.

¹⁷Mebalimi Yesu sia Nakua ungkuanni: Maupa’moko, e Simon, anakna Yunus! Belanna tangia mentolinona umpaombo’i lako kalemu tu iannato, sangadinna Ambe’Ku dao suruga.

¹⁸Sia Aku Kukua mati’ kumua, ikomo te tu Petrus, sia dao batu iate la Kunii umpabendan kombongangKu, sia bambana mukkun tae’ nabelai untaloi.

¹⁹La Kubenko tu gontingna Parenta Suruga. Sia apa-apa tu muarra’i lan lino, ia dukamo la maarra’ lan suruga, sia apa-apa tu muko’ka’i lan lino, ia dukamo la tiko’ka’ lan suruga.

²⁰Napakare’nami tu anak gurunNa, da napokadai lako misa’ duka tau, kumua Iamo Kristus.

²¹Randuk tonna iato Napa’peissanammi Yesu lako anak gurunNa kumua sipatu la lao lako Yerusalem anNa perasai buda parri’ dio mai pekaamberan sia dio mai pangulu to minaa sia pandita Sura’, naurunganni dipatei, Nadipamalimbangun sule tonna allo ma’pentallun.

²²Natambai misami Petrus, naparandukki unta’tanNi, nakua: Napamambela-bela Ia Puang Matua to, Puang! Tae’ maro’ ia nala dadi lako Kalemi tu iannato.

²³Apa memboko’ tu Yesu, anNa kua lako Petrus: Pallaiko lako boko’Ku, e deata bulituk! Ikomo misa’ tu la untumangNa’, belanna tangia diona Puang Matua muinaa-naa, sangadinna diona tolino.

²⁴Tonna iato Nakuami Yesu lako anak gurunNa: Iake denni tau la morai undi urrundu’Na’, la ussa’biangan kalena sia unnendekan kayu pea’ta’na, naundi urrundu’Na’.

²⁵Belanna minda-minda la morai ungkatirinnai katuoanna, iamo la kapa’dean katuoan, apa minda-minda tu kapa’dean katuoanna tu belanna Aku, iamo la ungkabu’tui katuoan.

²⁶Belanna apara la napomaupa’ tau, moi naassangi te lino, apa karugian deatanna? Ba’tu apara tu sipatu la nasorong tau la nasondan deatanna?

²⁷Belanna iatu Anak rampan dilino la sae nakabu’ kamala’biranNa Ambe’Na naturu’ mintu’ malaeka’Na; attu iato pantan la Napapakkanni lako tau sitinaya penggauranna.

²⁸Tonganna tongan Kukua mati’: Den ba’tu pira-pira tu to ke’de’ indete, tu tae’ nala sikita kamatean, ke tae’pi nakitaI tu Anak rampan dilino sae umpotoding kamala’biran tanda kadatuanNa.