Read Toraja-Sa'dan MATIUS 17 Bible Online

MATIUS 17 - Toraja-Sa'dan bible

MATIUS 17

¹Ma’annan allona lendu’nato, Nabaami Yesu tu Petrus sia Yakobus sia Yohanes siulu’na Yakobus, Nasolanni langngan misa’ buntu malangka’, male messarak.

²Membalimi tu rupanNa dio tingayona tinde tau, naparrang tu lindoNa susi allo, sia iatu pakeanNa mandu mabusssang susi arrang masiang.

³Pakalan nakitami tinde tau tu Musa sia Elia nasipa’kadan Yesu.

⁴Ma’kadami Petrus lako Yesu, nakua: O Puang, melo ke indemoki’ te; iake Miporai, kugaragamora lantang tallu indete, misa’ Kamu, na misa’ Musa na misa’ Elia.

⁵Marassan bangsia ma’kada-kada, pakalan denmi sangleon gaun parrang unnonganni; narangimi tu gamara lan mai gaun iato nakua: Iamote tu Anak Pa’kaboro’Ku, Ia dukamo nanii kasendeangKu; perangii.

⁶Iatonna rangii tinde anak gurunNa tu gamara iato, tobangmi tipessussuk, lendu’ mataku’na.

⁷Saemi tu Yesu ungkaka’i tinde tau sia Nakua: Malimbangunkomi sia da mimataku’.

⁸Iatonna bangunammo matanna tinde tau, tae’ bangmo misa’ tau nakita, Yesu mannamo misa-misa.

⁹Iatonna solo’mo dao mai buntu iato, ma’pakainga’mi tu Yesu lako tinde tau sia Nakua: Da mipokada lenni te mikitanna lako misa’ duka tau, ke tae’pi Namalimbangun tu Anak rampan dilino diong mai to’ to mate.

¹⁰Mekutanami tu anak gurunNa lako nakua: Ma’apari nakuara pandita Sura’, kumua tae’ nasalai tang sae dolo tu Elia?

¹¹Mebalimi tu Yesu Nakua: Inang la sae ia tu Elia, sia umpasirundunan mintu’ sakka’ saeanna.

¹²Apa Kukua mati’, kumua saemo tu Elia, na tae’ natandai tau, sangadinna napogau’ora lako tu pa’poraianna. Ten dukamoto tu Anak rampan dilino la napakario-rio tau iato.

¹³Maneri naissan anak gurunNa, kumua diona Yohanes Pa’dio’ tu Napokada lako kalena.

¹⁴Iatonna rampomo lako to’ to buda, saemi tu tau misa’,

¹⁵malinguntu’ dio oloNa Yesu nakua: O Puang, kamasei dikka’ tu anakku muane, belanna ta’taran, sia lendu’ maparri’na; belanna pembuda tobang tama to’ api sia pembuda dukamo rokko to’ uai,

¹⁶kusolammo lako anak gurumMi, apa tae’ nabelai umpamatanai.

¹⁷Mebalimi tu Yesu Nakua: E bati’ to tang ma’patongan sia to leko’ penaanna, sangapaPa’ la ussisolangkomi? Sia sangapaPa’ la umpama’tanangkomi penaa? Solanni mai.

¹⁸Nasarabaimi Yesu, nasun lan mai kalena tu deata masussuk; ta’pa matanami tinde pia to attu iato.

¹⁹Iatonna iato sae misami tu anak gurunNa lako Yesu sia nakua: Ma’apai kami natae’ kibelai urrambai tu deata?

²⁰Nakuami ungkuanni: Tu belanna mandalle’ pa’patonganmi. Apa tonganna Kukua mati’: iake denni kapatonganammi pada lise’ sawi, ammi kua lako te buntu: Tilengka’ko indete lako, manassa tilengka’; inang tae’ tu tang la dadi dio kalemi.

²¹(Apa iatu ianna te tae’ nama’din sun moi dipatumba, sangadi massambayangpiki’ sia ma’puasa.)

²²Iatonna torro dio tana Galilea sumalong sola anak gurunNa. Nakuami Yesu lako: Iatu Anak rampan dilino la disorong lako tau;

²³anna patei, anna allo ma’pentallun Namalimbangun sule. Lendu’mi masussanna tu anak gurunNa.

²⁴Iatonna rampomo lako Kapernaum saemi lako Petrus tu to undurukki tu sima Banua Kabusungan sia nakua: Tae’ raka ia Nabaya’i Gurummi tu sima da’dua dirham?

²⁵Nakuami: Nabaya’. Iatonna tamamo banua tu Petrus, Napadoloimi Yesu umpa’kadai, Nakua: E Simon, umbara musanga? Mindara nanii tu mai datu lan te lino unnala sassung ba’tu sima? Dioraka mai anakna ba’tu dio mai to salian?

²⁶Nakuami mebali: Dio ia mai to salian. Nakuami Yesu lako: Iake susii to, lessu’ ia tu mai mintu’ anak datu.

²⁷Apa dikuari daa’ anna katannarangki’ tu mati’ tau, dadi laoko mamekan rokko tasik, ammu alai tu bale bunga’ pealammu; sia iammu bungka’i tu sadangna, la mukabu’tui tu doi’ a’pa’ dirham; alai tu doi’ iato, ammu sorongi lako tu tau, pamaya’Ku na iko.