Read Toraja-Sa'dan MATIUS 18 Bible Online

MATIUS 18 - Toraja-Sa'dan bible

MATIUS 18

¹Tonna attu iato saemi tu anak gurunNa lako Yesu nakua: Mindara tu kapuanna lan Parenta Suruga?

²Natambaimi Yesu tu pia’-pia’ misa’ Napalanni tangnga,

³sia Nakua: Tonganna tongan Kukua mati’, iake tae’i mipasondai penaammi, midadi pia, dennoraka mila tama len Parenta Suruga?

⁴Iamoto, minda-minda tu umpamadiongan kalena susite pia’-pia’, iamo la madaoanna lan Parenta Suruga.

⁵Na minda-minda tu untammui tu pia’-pia’ susite diona sangangKu, iamo untammuiNa’.

⁶Minda-minda untumangi moi misa’i te to bongko umpatonganNa’, la’bi’ sia ia lako kalena ke ditoke’i batu parandangan tu barokona, nadilammu’ lan tangnga-tangnga tasik.

⁷Upu’ allona te lino, belanna angganna patumangna. Belanna tae’ nasalai tang sae tu patumangna, apa upu’ allona tu to napobannang tu patumangna.

⁸Iamoto, iake limammu ba’tu lentekmu untumangko, ta’takki mutibei, belanna la’bi’ sia ia ke popponko ba’tu sondo’ko tama katuoan na iake dio patomalii tu limammu sia lentekmu mudipembuangan tama api tontong sae lakona.

⁹Sia iake matammu untumangko, su’be’i ammu tibei, belanna la’bi’ sia ia ke sangbaliri matammu tama katuoan, na iake dio patomalii tu matammu mudipembuangan tama api naraka.

¹⁰Kanandai tonganni, da naden misa’ mitapa’ te to bongko iate. Belanna Kukua mati’, iatu mintu’ malaeka’na lan suruga tontong untiro lindo Ambe’Ku dao suruga.

¹¹(Belanna iatu Anak rampan dilino sae la ungkarimmanni tu pa’dena.)

¹²Umba nakua tu misanganna? Ke denni tau misa’ unnampui domba saratu’, anna pusa tu misa’, tae’raka nala untampei tu kaseranna pulona ngkasera dao lu tanete, anna male undaka’i tu pusanna misa’?

¹³Na iake nakabu’tui siai, tonganna tongan Kukua mati’, ondong ia napoparannunna to na iatu tang pusanna kasera pulona ngkasera.

¹⁴Ten dukamoto tu Ambe’mi dao suruga tae’ dio tu pa’poraian kumua anna sanggang misa’ te to bongko iate.

¹⁵Iake kasalanni tu siulu’mu lako kalemu, laoko umpakilalai podo iko simisa-misanan; iake natarimai tu pa’pakilalammu, sikadulu’ omoko sule to tu siulu’mu.

¹⁶Apa iake tae’i natarimai, solan pole’ko tau misa’ ba’tu da’dua dikua anna pudukna tinde to sa’bi’ da’dua ba’tu tallu umpamanassai tu mintu’ kada.

¹⁷Na iake natumpui tu kadanna tinde tau, pokadai tu iannato tama kombongan; apa iake tae’ siaoi naperangii da’ito nabutung to kapere’ sia passima lako kalemu.

¹⁸Tonganna tongan Kukua mati’: apa-apa tu miarra’i lan lino, iamo la maarra’ lan suruga, sia apa-apa tu miko’ka’i lan lino, tiko’ka’ duka lan suruga.

¹⁹Sia Kukua duka lako kalemi: Iake denkomi da’dua lan lino sanginaa umpalaku ba’tu apa-apa, la Napadenangkomi Ambe’Ku dao suruga tu iannato.

²⁰Belanna umba-umba nii tau da’dua ba’tu tallu sirampun belanna sangangKu, dio dukaNa’ lan tangnga- tangngana.

²¹Tonna iato saemi tu Petrus umpentireke’i Yesu nakua: O Puang, pempiran sala tu siulu’ku lako kaleku tu sipatu la kupagarri’? Saeraka lako ma’pem- pitunna?

²²Nakuami Yesu lako: Kukua mati’: tae’ nasae manna lako ma’pempitunna, sangadinna sae lako ma’pempitungpulona pempitu.

²³Iamoto iatu Parenta Suruga dipasusi misa’ datu, la sisalu taunna.

²⁴Iatonna parandukki sisalu, nabaami tau lako tu to kaindanan sangpulo sa’bunna talenta.

²⁵Apa belanna tae’ apa dio la napamayaran, napesuammi puangna, kumua ia la dibalukan sola anakna sia bainena, sia mintu’ tu apa dio kalena, napopamaya’.

²⁶Lumbangmi tinde taunna, mennolo lako, nakua: Dapa mipupu’ bangna’ la kubaya’ nasang sia lako kalemi.

²⁷Tilaomi massena tu puangna tinde tau, narampananni, sia iatu indanna napamasero bangmo.

²⁸Apa iatonna sun tinde tau, sitammumi misa’ solana, tu kaindanan lako kalena saratu’ dinar; nala’ka’imi anna kalessekki, nakua: Baya’i tu indanmu lako kaleku.

²⁹Lumbangmi tinde solana mengkamoya-moya lako sia nakua: dapa mipupu’ bangna’, inang la kubaya’na mati’.

³⁰Apa manoka, sangadinna napa’petarungkuan, sae lako naseroinna tu indanna.

³¹Iatonna tiroi mintu’ solana tu penggauran iato, lendu’mi masussanna, nalao umparampoi lako puangna tu mintu’nato.

³²Pakalan natambaimi puangna tinde tau, nakuami ungkuanni: E to kadake, mangkamo kupamasero nasang tu indanmu, belanna mengkamoya-moyako umpalakui lako kaleku.

³³Tang sipaturokoka la unnala mase solamu susi aku mangka unnala maseko?

³⁴Sengkemi tu puangna, nasorongi lako sapiri la umpakario-rioi, sae lako nabaya’na nasang tu indanna.

³⁵Ten dukamoto tu Ambe’Ku dao suruga la umpogau’i lako kalemi, ke tae’i naponno tongan penaammi pada umpagarri’ salana tu mai siulu’mi.