Read Toraja-Sa'dan MATIUS 19 Bible Online

MATIUS 19 - Toraja-Sa'dan bible

MATIUS 19

¹Iatonna mangkamo tu Yesu umpaupu’i tu mintu’ kada iato, ke’de’Mi dio mai tana Galilea; Narampo lako lili’na tana Yudea, tu nabala salu Yordan lian.

²Lendu’mi budanna tau undi urrundu’I, anNa pamalekei tu mai tau dio.

³Saemi tu to Farisi lako la untobaI nakua lako: Ma’dinraka tu tau untantang bainena diona mintu’na passalan?

⁴Mebalimi Yesu, Nakua: Tang mibasaparaka kumua Ia tu Totumampa ungkombong tolino tonna mulanna umpadadii tu muane sia baine.

⁵Anna ma’kada kumua: Iamoto anna la untampe ambe’na sia indo’na tu tau anna la’ka’ lako bainena; anna mendadi sangbatang kale sola duai?

⁶Naurunganni tae’mo nada’dua sangadinna sangkalemora. Iamoto, dadi iatu mangkannamo Napasibali Puang Matua, da napasitantangi tolino.

⁷Nakuami tinde tau lako: Iake susito, ma’apai namesua tu Musa umpa’bengan sura’ kasitantangan sia untantangi?

⁸Nakuami Yesu lako tinde tau: Tu belanna kamakarrasanna penaammi anna elorangkomi Musa untantang bainemi; apa iatu tempon dio mai tae’ ia nasusito.

⁹Apa Aku Kukua mati’: minda-minda untantang bainena sangadinna diona gau’ sala, anna umpobaine to senga’, iamo pasandak salu lako rampanan kapa’. Na minda-minda umpobainei tu baine natantang, ia dukamo pasandak salu lako rampanan kapa’.

¹⁰Nakuami tu anak gurunNa lako: Iake susito tu diona muane anna baine, la’bi’ tang mendapo’.

¹¹Apa Nakua ungkuanni tinde tau: Tae’ namintu’ tau untandai te kada iate, sangadinna ia manna ia tu to dinii umpa’kamaseanni lako.

¹²Belanna den tu tau inang lupamo sun lan mai tambukna indo’na; sia den tu tau lupa belanna nabalianni tau; sia den pole’o tu tau lupa, tu ia kalenamo umpalupa kalena tu belanna Parenta Suruga. Minda-minda tu umbelai ungkaritutui tu iannate, nakaritutuimi.

¹³Tonna iato nasolammi tau lako Yesu tu mai pia’-pia’, kumua anNa remme’i limanNa sia Napassambayanganni, apa nasarabai anak gurunNa tinde tau.

¹⁴Apa Nakua Yesu: Popa’elo’nai tu pia’-pia’, da migagai sae lako Kaleku, belanna iamotu to susito tu unnampui Parenta Suruga.

¹⁵Naremme’mi limanNa tu pia’-pia’, Namane ke’de’ dio mai.

¹⁶Pakalan saemi tu tau misa’ lako Kalena nakua: O Guru, kameloan apara tu sipatu la kupogau’, angku kabu’tui katuoan sae lakona?

¹⁷Nakuami Yesu lako: Ma’apari na iara tu kameloan mupekutanan lako Kaleku? Misa’ri Ia tu melo. Apa iake la moraiko tama katuoan, turu’i tu Sukaran alukNa Puang Matua.

¹⁸Nakuami lako: Sukaran aluk umbara to? Nakuami Yesu: Da mupapatean, da mupasandak salu lako rampanan kapa’, da muboko, da musa’bi tang tongan.

¹⁹Kasiri’i tu ambe’mu sia indo’mu, sia: Kamasei tu padammu tolino susi kalemu.

²⁰Nakuami tinde to mangura lako: Mintu’na to kukanandai nasangmo; apapara tu kakurangangku?

²¹Nakuami Yesu ungkuanni: Iake la moraiko tae’ sayuammu, malemoko, mubalukanni tu apa-apa dio kalemu, mupa’kamaseanni lako to kalala’, ammu ampui ianan dao suruga; ammu male mai undi urrundu’Na’.

²²Apa iatonna rangii tinde to mangura te kada iate, rossomi penaanna male, belanna buda iananna.

²³Nakuami Yesu lako anak gurunNa: Tonganna tongan Kukua lako kalemi, malia’ tongan misa’ to sugi’ tama Parenta Suruga.

²⁴Sia Kukuapa lako kalemi: Malomo ia misa’ unta tama to’tok darun ke la to sugi’mora tama Parentana Puang Matua.

²⁵Iatonna rangimi anak gurunNa tu iannato, lendu’mi tu’pena penaanna, nakuami: Iake susito, mindapa tu la ungkabu’tui kasalamaran?

²⁶Mentiromi tu Yesu lako tinde tau Nama’kada, Nakua: Iake tolino tae’ nadadi te iannate, apa iake Puang Matua tae’ apa tang dadi.

²⁷Tonna iato mebalimi Petrus, nakua lako: Kami te kitampe nasangmo tu mintu’na, angki undi urrundu’Komi. Apara tu la kikabu’tui undinna?

²⁸Nakuami Yesu lako tinde tau: Tonganna tongan Kukua lako kalemi, iake dipaba’rui lino, to ke unno’ko’mi tu Anak rampan dilino dao isungan kapayungan mala’bi’Na, kamu duka te undinnamo urrundu’Na’, la unno’ko’ duka dao sangpulo dua isungan kapayungan sia urrengnge’ sangpulo dua sukunna to Israel.

²⁹Sia minda-minda tu untampemo banuanna, ba’tu siulu’na muane ba’tu siulu’na baine, ba’tu ambe’na ba’tu indo’na ba’tu anakna, batu pa’lakna tu belanna sangangKu, iamo la ungkabu’tui pessaratu’ manglokkon, sia umpomana’ katuoan tontong sae lakona.

³⁰Apa buda tu to dolo iamo la undinna, sia iatu undinna iamo la dolona.