Read Toraja-Sa'dan MATIUS 2 Bible Online

MATIUS 2 - Toraja-Sa'dan bible

MATIUS 2

¹Iatonna dadimo tu Yesu dio Betlehem, tana Yudea, tonna linona datu Herodes, saemi to patanda-tandan, to dio mai padang rampe matallo, lako Yerusalem,

²nakua: Umbara nanii tu datu to Yahudi, tu mane dadi? Belanna dellekmo tu bintoenNa kikita, angki sae la umpenombai.

³Iatonna rangii datu Herodes tu iannato, tirambanmi sola tu mintu’ pa’tondokan dio Yerusalem.

⁴Narampunmi tu mintu’ pangulu to minaa sia iatu mai pandita Sura’ lan tondok, anna kutanai lako tu tau kumua, umba la nanii dadi tu Kristus.

⁵Ma’kadami tinde tau lako, nakua: Dio Betlehem, dio tana Yudea, belanna susimoto tu nasura’na nabi, nakua:

⁶E Betlehem, dio tana Yehuda, inang tae’ ia nala iko bitti’na tu mintu’ pangulu Yehuda, belanna iko nanii sun misa’ panglalan, tu la ungkambi’ taungKu to Israel.

⁷Pakalan natambai bunimi Herodes tu to patanda-tandan, anna pesumpui lako kumua sangapamo dukkunna tu bintoen.

⁸Nasuami tinde tau lako Betlehem sia nakua: Laomokomi umpemanassa tonganni tu diona Pia iato, sia iammi kabu’tui, paissannina’, angku lao duka umpenombai.

⁹Naperangii bangmi tu kadanna datu, anna male tinde tau, na iatu bintoen nakita dio rampe matallo male bang undoloanni, nasae tadang dao sipatunna langngan tinde’ Pia’-pia’.

¹⁰Iatonna kitai tu bintoen lendu’mi parannunna penaanna tinde tau.

¹¹Malemi tinde tau tama banua iato, nakitai tu Pia’-pia’ sola Maria, indo’Na; tukkumi umpenombaI, nabungka’ nasangi tu pa’pannianna napasunni tu iananna, anna penombanni lako tu pa’kasianan, iamotu mai bulaan sia dupa sia muru.

¹²Iatonna patudumi Puang Matua tinde tau lan tindona kumua da nasule lako Herodes, sulemi tinde tau lako tondokna unnola lalan senga’.

¹³Malena sia tu to patanda-tandan, nakita tindomi Yusuf tu misa’ malaeka’Na Puang, nakua: Millikko, ammu alai tu Pia sola indo’Na, ammu pallaianni lako Mesir, ammu torro dio sae lako kukuammu, belanna napengkali-kalii Herodes undaka’ lalan la umpatei tu Pia.

¹⁴Millikmi, namale ussolan bongii tinde Pia sola indo’Na, mallai lako Mesir.

¹⁵Torro bangmi dio sae lako matena Herodes, kumua anna sundun tu apa Napokada Puang tu sun dio pudukna nabi, kumua: Dio mai Mesir Kunii untambai tu AnakKu.

¹⁶Undinna tonna issanmi Herodes kumua napakena to patanda-tandan, lendu’mi sengkena, nasuami tu tau lao umpatei tu mintu’ pia’-pia’ muane, tu lanna tondok Betlehem sia lan mintu’ lili’na, tu ma’angge duang taunnamo dadinna, naagian dio mai tu mangkanna napesumpu lako to patanda-tandan.

¹⁷Tonna iato sundunmo tu apa napokada nabi Yeremia, kumua:

¹⁸Den gamara dirangi dio Rama, tangi’ sia bating merio-rio tongan; iamotu Rahel umbatingi anakna, natang pakaranga-ranganna, belanna pa’demo tu anakna.

¹⁹Iatonna matemo tu Herodes, nakita tindomi Yusuf tu misa’ malaeka’Na Puang dio tana Mesir,

²⁰sia nakua: Millikko musolanni tu Pia sola indo’Na, mumale lako tana Israel, belanna mate nasangmo tu to la morai umpatei tu Pia.

²¹Millikmi, namale ussolanni tinde Pia sola indo’Na, narampo lako tana Israel.

²²Iatonna rangimi kumua Arkhelaus dadi datu dio tana Yudea ussonda Herodes ambe’na, batami tu Yusuf lao lako; apa belanna Napatudu Puang Matua lan tindona, sepang lu lakomi parenta Galilea,

²³rampomi dio natorro lan misa’ kota disanga Nazaret, kumua anna sundun tu kadanna mintu’ nabi, kumua la digente’ To Nazaret tu Yesu.